ފަނޑިޔާރުންގެ އިސްތިއުނާފު މަޖިލީހަށް ހައިކޯޓުން ނިޔާޒު އިންތިޚާބުކޮށްފި

ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމާ ނިންމުންތައް ތަންފީޒުކުރުމާއި އިސްތިއުނާފު ކުރުމަށްޓަކައި އުފައްދާ ފަނޑިޔާރުންގެ އިސްތިއުނާފް މަޖިލީހަށް ހައި ކޯޓުގެ ފަނޑިޔާރުގެ ތެރެއިން ފަނޑިޔާރު މުހައްމަދު ނިޔާޒް އިންތިޚާބު ކޮށްފިި އެވެ.

ހައިކޯޓުގެ މީޑިއާ އޮފިޝަލް ވިދާޅުވީ ފަނޑިޔާރު ނިޔާޒު އައްޔަން ކުރެއްވީ ބުރާސްފަތި ދުވަހު ކަމަށެވެ.

ޖޭއެސްސީގެ ގާނޫނަށް މިދިޔަ މަހު ގެނައި އިސްލާހުގެ ދަށުން ޖޭއެސްސީން ފަނޑިޔާރުންނާ މެދު އަޅާ ފިޔަވަޅުތަކުގެ މައްސަލަ ކޯޓުތަކުން ނުބެލޭ ގޮތް ހަދައި، އެފަދަ މައްސަލަތައް ހަމައެކަނި ބެލޭނީ އެ އިސްލާހުގެ ދަށުން އުފެދޭ ފަނޑިޔާރުންގެ އިސްތިއުނާފް މަޖިލީހަށް ކަމަށް ވަނީ ހަމަޖައްސައިފަ އެވެ. އެ މަޖިލީހުގައި ތިއްބަވާނީ ސުޕްރީމް ކޯޓުގެ ފަނޑިޔާރުންގެ ތެރެއިން އުއްތަމަފަނޑިޔާރާއި, ޖޭއެސްސީގައި އެ ކޯޓުގެ ފަނޑިޔާރުންގެ ތެރެއިން ހިމެނޭ ފަނޑިޔާރު ފިޔަވައި އެހެން ފަނޑިޔާރަކާއި, ހައިކޯޓުގެ ފަނޑިޔާރުންގެ ތެރެއިން ޖޭއެސްސީގައި އެ ކޯޓުގެ ފަނޑިޔާރުންގެ ތެރެއިން ހިމެނޭ ފަނޑިޔާރު ފިޔަވާ އެހެން ފަނޑިޔާރެކެވެ. އަދި ދަށު ކޯޓުތަކުގެ ފަނޑިޔާރުންގެ ތެރެއިން ޖޭއެސްސީގެ މެންބަރެއްގެ ގޮތުގައި ނުހިމެނޭ ފަނޑިޔާރެކެވެ.

ބުރާސްފަތި ދުވަހު އަމަލު ކުރަން ފެށި ފަނޑިޔާރުންގެ އިސްތިއުނާފު މަޖިލީހުގެ ގަވައިދުގައި ބުނާ ގޮތުން ފަނޑިޔާރުންގެ އިސްތިއުނާފު މަޖިލިސް އެކުލަވައިލުމަށް ޓަކައި ފަނޑިޔާރުން އެމަޖިލީހަށް ހޮވާނީ އެ ކަމަށް ޓަކައި އެ ކޯޓެއްގެ ފަނޑިޔާރުންގެ މަޖިލީހުގައި ނެގޭ ވޯޓަކުންނެވެ. އަދި ކޮމެޓީގެ މުގައްރިރަކަށް ވާނީ ސުޕްރީމް ކޯޓުން އައްޔަން ކުރާ ފަނޑިޔާރަކަށް ކަމަށް އެ ގަވައިދުގައި ބުނެފައިވެއެވެ.

ފަނޑިޔާރު ނިޔާޒް ކުރިން ހުންނެވީ ހދ. ޖުޑީޝަލް ދާއިރާގެ އިސް މެޖިސްޓްރޭޓް ކަމުގެ މަގާމުގައެވެ. ފަނޑިޔާރު ނިޔާޒު ހައިކޯޓުގެ ފަނޑިޔާރުކަމަށް އައްޔަން ކުރެއްވީ މިދިޔަ އަހަރުގެ ޖެނުއަރީގައެވެ.