މާލޭގައި ތެޔޮ ބައުޒަރުތައް ޕާކްކޮށްފައި ހުންނަނީ ގަވައިދާ ހިލާފަށް: ޕްލޭނިންގ މިނިސްޓްރީ
2 އޮކްޓޯބަރު 2019 | ބުދަ 18:58ތެޔޮ ބައުޒަރުތަކުން ހިދުމަތް ފޯރުކޮށްދޭނެ ދާއިމީ ތަނަކީ ތިލަފުށި ނުވަތަ ގުޅީފަޅު
އަލިފާން ރޯވި ތެޔޮ ބައުޒަރުތައް
މާލޭގެ އެކި ސަރަހައްދުތަކުގައި ހާއްސަކޮށް މާލޭ އުތުރު ހާބަރު އަދި ދެކުނު ހާބަރުގައި ޕާކްކޮށް އުޅަނދުތަކަށް ތެޔޮ ފޯރުކޮށްދިނުމުގެ ހިދުމަތް ދެމުންގެންދަނީ ގަވައިދާ ހިލާފަށް ކަމަށް ޕްލޭނިންގ މިނިސްޓްރީއިން ބުނެފިއެވެ.
ޕްލޭނިންގ މިނިސްޓްރީއިން ބުދަ ދުވަހު ނެރުނު ނޫސްބަޔާނުގައި އެ މިނިސްޓްރީއިން ބުނީ ދާދި ފަހުން އަލިފާނުގެ ހާދިސާ ހިނގައިފައިވަނީވެސް ހާބަރު ސަރަހައްދުގައި ގަވައިދާ ހިލާފަށް ޕާކުކޮށް ތެޔޮ ފޯރުކޮށްދެމުން ދަނިކޮށް ކަމަށެވެ. އަދި ތެޔޮ ބައުޒަރުތައް މާލެ ތެރޭގައި ދުއްވުމާއި، މިހާރު ބޭނުން ކުރަމުންދާ ގޮތަކީ ރައްކާތެރި ގޮތެއް ނޫންކަމަށް މިނިސްޓްރީ އިން ބުނެއެވެ.
ޕްލޭނިންގް މިނިސްޓްރީ އިން އިތުރަށް ބުނީ މި ހިދުމަތް ދާއިމީ ގޮތަކަށް ދިނުމަށް ހަމަޖެހިފައިވަނީ ތިލަފުށި ނުވަތަ ގުޅީފަޅުގެ ސަރަހައްދެއްގައި ކަމަށެވެ. އަދި މި ހިދުމަތް ދާއިމީ ގޮތެއްގައި ދެވެންދެން މާލޭގައި ދުއްވާ ތެޔޮ ބައުޒަރުތައް ޕާކުކޮށް މި ހިދުމަތް ފޯރުކޮށްދެވޭނެ ތަނެއްކަމުގައި މާލޭ ދެކުނުގައި ހިއްކާފައިވާ ސަރަހައްދު (އިންޑަސްޓްރިއަލް ޒޯން) އިން ބައެއް ކަނޑައަޅައިފައިވާ ކަމަށް ޕްލޭނިންގ ބުންޏެވެ.
މީގެ އިތުރުން ޕްލޭނިންގ މިނިސްޓްރީ އިން ބުނީ މާލޭގައި މިހާރު ބޭނުން ކުރަމުން އަންނަ ތެޔޮ ބައުޒަރު ތަކަކީ އެމްއެންޑީއެފްގެ ގައިޑް ލައިނާއި އެއްގޮތަށް ހުރި ބައުޒަރުތަކެއްތޯ ބެލުމަށްފަހު އެމިންގަނޑަށް ނުފެތޭ ބައުޒަރުތަކުގެ ހުއްދަ ބާތިލް ކުރެވޭނެ ކަމަށެވެ. އަދި ޓްރާންސްޕޯޓް މިނިސްޓްރީއިން އިތުރަށް އެއްވެސް ބައުޒަރަކަށް ރަޖިސްޓްރީ ނުދޭނެކަމަށްވެސް މި ބަޔާނުގައި ވެއެވެ.
