މާލޭގައި ދިވެއްސަކާ ކައިވެނިކޮށްގެން ދިރިއުޅެމުންދިޔަ ޔަމަނުގެ ރައްޔިތެއް ކަމަށްވާ ޔާސިރު ޔަހުޔާ ސޯލިހާއި ޓެރަރިޒަމާއި ގުޅުން އެބަހުރި ކަމަށާއި, އޭނާ ރާއްޖެއިން ފުރައިގެން ދިއުމަށް އަންގާފައިވާ ކަމަށް ހޯމް މިނސްޓަރ އިމްރާން އަބްދުﷲ ވިދާޅުވެއްޖެއެވެ.

ފުލުހުންގެ އިދާރާއިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އިމްރާން ވިދާޅުވީ ޔާސިރު ޔަހުޔާގެ މައްސަލައަކީ ދުނިޔޭގެ "އޯޕަން މީޑިއާ" ގައި ޓެރަރިސްޓެއްގެ ގޮތުގައި ވާހަކަ ދެކެވޭ ފަރާތެއް ކަމަށާއި، ޓެރަރިޒަމާއި ގުޅުން ހުރި ބެކްގްރައުންޑު އޮތްކަން ދުނިޔޭގެ މީޑިއާއިންވެސް ސާފުކޮށް ފެންނަން އޮތް ކަމަށެވެ.

ޔާސިރު ކޯޓު އަމުރެއްގެ ދަށުން ހައްޔަރު ކޮށްފައިވަނީ މާޗް 3، 2017 ގައި ސައުދީ އަރަބިއްޔާގެ ރަސްގެފާނު ރާއްޖެއަށް ކުރައްވަން އުޅުއްވި ދަތުރުފުޅާ ދިމާކޮށެވެ. އޭރު އޭނާ މަސައްކަތް ކުރަމުން ދިޔައީ އަހުމަދިއްޔާ ސްކޫލާއި، އަރަބިއްޔާ ސްކޫލްގެ އަރަބި ޓީޗަރެއްގެ ގޮތުގައެވެ.

ޔާސިރުގެ މައްޗަށް ފުލުހުން ހޯދި ހެއްކާއި ގަރީނާގެ މައްޗަށް ބިނާކޮށް އޭނާ ހައްޔަރުކުރުމަށް ނެރުނު ކޯޓު އަމުރުގައިވާގޮތުން ބޭރުގެ ޓެރަރިސްޓް ޖަމާއަތަކާ ގުޅިގެން ހަނގުރާމަތަކަށް ރާއްޖެއިން މީހުން ފޮނުވާކަމުގެ ތުހުމަތު އޭނާގެ މައްޗަށް ވަނީ ކޮށްފައެވެ. އެ އަމުރުގައި އޭނާގެ މައްޗަށް ވަނީ ޓެރަރިޒަމްގެ ތުހުމަތު ކޮށްފައެވެ.

ޔާސިރު ހައްޔަރު ކުރުމަށްފަހު އޭރު ފުލުހުން ވަނީ އޭނާގެ ޕާސްޕޯޓް ހަވާލު ކުރުމަށް އެދިފައެވެ. ނަމަވެސް އޭނާ ވަނީ ޕާސްޕޯޓަކީ ޔަމަނުގެ ދައުލަތުގެ އެއްޗެއް ކަމަށާއި އެއީ ދިވެހި ދައުލަތުގެ އެއްޗެއް ނޫން ކަމަށް ބުނެ ޕާސްޕޯޓް ދިނުމަށް ދެކޮޅު ހަދާފައެވެ. އޭގެ ފަހުން މިހާތަނަށް ވެސް އޭނާގެ ޕާސްޕޯޓް އިމިގްރޭޝަނާއި ހަވާލުކޮށްފައެއް ނުވެއެވެ.

އިމްރާން ވިދާޅުވީ ޔާސިރު ޔަހުޔާ އަށް ރާއްޖެ ދޫކޮށް ދިއުމަށް އަންގާފައިވާ ކަމަށާއި ނަމަވެސް އެކަމަށް މިހާތަނަށް އެއްބާރުލުން ދީފައި ނުވާކަމަށެވެ. އަދި އޭނާގެ ވިސާ ކެންސަލް ކޮށްފައިވާކަމަށް އިމްރާން ވިދާޅުވިއެވެ. މިއަދުވެސް އޭނާ ފުރަން ބޭނުންވެއްޖެނަމަ އިމިގްރޭޝަން ކޮންޓްރޯލަރއަށް ލިބިގެންވާ ބާރުގެ ދަށުން އެކަން ހަމަޖެހިގެން ދާނެ ކަމަށް އިމްރާން ވިދާޅުވިއެވެ.

ޔާސިރު ފުރުވާނުލެވިގެން އުޅެނީ ޔަމަނުގައި މިހާރު ސަރުކާރެއް ނެތުމުން ކަމަށާއި މީގެ މަހެއްހާ ދުވަސް ފުރަން އެއްބަސްވި ނަމަވެސް ފުރުވުމުގެ ހުރިހާ ތައްޔާރީތައް ވި ފަހުން ޕާސްޕޯޓް އޮތީ ޔަމަންގައި ކަމަށް ޔާސިރު ބުނެފައިވާ ކަމަށް އިމްރާން ވިދާޅުވިއެވެ. މިހާރުން މިހާރަށް ވެސް ޔާސިރު ފުރުވާލަން ބޭނުންވާ ކަމަށާއި އެކަމަށް އިމިގްރޭޝަނާއި ފުލުހުން ވެސް ތިބީ ތައްޔާރަށް ކަމަށް އިމްރާން ވިދާޅުވިއެވެ.

ޔާސިރު ހިފަހައްޓާފައިވަނީ އިމިގްރޭޝަން ގާނޫނުގެ 21 ވަނަ މާއްދާއިން އިމިގްރޭޝަން ކޮންޓްރޯލާއަށް ލިބިގެންވާ ބާރުގެ ދަށުންނެވެ. އެމާއްދާގައިވާ ގޮތުން ރާއްޖޭގައި ހުރުމުގެ ހުއްދަ ބިދޭސީއަކަށް ދީފައިވަނިކޮށް، ނޯޓިސް ދިނުމަށް ފަހު، އެ ހުއްދަ ބާޠިލު ކޮށްފިނަމަ، އެ ހުއްދަ ބާޠިލުވާ ދުވަހުން ފެށިގެން އޭނާ ރާއްޖޭގައި ހުރެގެން ނުވާނެއެވެ. ބިދޭސީއަކު ވަގުތުން ރާއްޖެއިން ފުރައިގެން ދެވޭނޭގޮތެއް ނެތިގެން ރާއްޖޭގައި ހުންނަންޖެހިއްޖެނަމަ، އޭނާ ފުރައިގެން ދަންދެން ކޮންޓްރޯލަރ އޮފް އިމިގްރޭޝަން އެންޑް އެމިގްރޭޝަނުން ކަނޑައަޅާ ތަނެއްގައި ބެހެއްޓިދާނެ ކަމަށް އެގާނޫނުގައި ވެއެވެ.

ޔާސިރު މިހާރު ހުރީ އިމިގްރޭޝަނުން އަންގައިގެން ކަރެކްޝަނަލް ސަރވިސްގެ ބެލުމުގެ ދަށުގައެވެ. އިމްރާން ވިދާޅުވީ އިމިގްރޭޝަންގެ ބެލުމުގެ ދަށުގައި އެ ހުންނަނީ އަމިއްލަ އިހްތިޔާރުގައި ކަމަށާއި ފުރައިގެން ދާން ބޭނުންވާ ނަމަ މިހާރުވެސް އެކަން ފަހިކޮށްދޭނެ ކަމަށެވެ. މައުލޫމާތު ލިބިފައިވާ ގޮތުގައި ޔާސިރުގެ ވޯކް ވިސާއާއި އޭނާގެ މެރިއޭޖް ވިސާ ވެސް އިމިގްރޭޝަނުން ވަނީ ކެންސަލް ކޮށްފައެވެ.

ޔާސިރު ވަނީ އޭނާގެ ކަންބޮޑުވުންތައް ހިއްސާކޮށް ރައީސް އިބްރާހިމް މުހައްމަދު ސޯލިހު އަށް ސިޓީއެއްވެސް މީގެ ކުރިން ލިޔެފައެވެ. މިދިޔަ ޖުލައި މަހުގެ ތެރޭގައި އޭނާ ކުރަން ފެށި ބަނޑުހައިހޫނު ކަމުގެ ހަޅުތާލެއްގެ ސަބަބުން ހާލު ދެރަވެ މިހާރު އޮތީ އައިޖީއެމްއެޗްގައި އެޑްމިޓްކޮށްފައެވެ.

ޔާސިރާއި ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ އޭނާ އަކީ އެކި ގައުމުތަކުގައި ޓެރަރިޒަމްގެ އަމަލުތަކާއި ގުޅިގެން މީގެކުރިންވެސް ރާއްޖެއިން ބޭރުގެ ޖަލުތަކުގައި އުޅެފައިވާ މީހެއްކަމަށާއި ޓެރަރިޒަމާ ގުޅުން ހުރި ކަމަށް ބެލެވޭ ފަރާތްތަކާ އޭނާއާ ގުޅުން އޮންނަކަން ބައިނަލްއަގުވާމީ ތަހުގީގީ އިދާރާތަކުން މައުލޫމާތު ދީފައިވާ ކަމަށެވެ.

ޔާސިރު ހައްޔަރުކުރި އިރު، އޭނާގެ އަންހެނުން އިނީ ބަލިވެއެވެ.