ޕްރެކްޓިކަލް ޓްރެއިނިން ހެދުމަށް ކްލަބް ގްރީން ސްޓްރީޓުގެ އެހީތެރިކަމާއެކު އެ ކްލަބުގެ ހެޑްކޯޗު ސޮބާހް މުހައްމަދު ސްޕެއިންގެ ބާސެލޯނާ އަށް ފުރައިފި އެވެ.

ގްރީން ސްޓްރީޓުން ބުނީ ބާސެލޯނާގެ ޓޮވޯ އެކަޑަމީ އަށް ތަމްރީންތަކެއް ހެދުމަށް ސޮބާ ފޮނުވާފައިވާ ކަމަށާއި، މި އެކަޑަމީ އަކީ ބާސެލޯނާގެ ލެޖެންޑް ޖޯހަން ކްރަޔަފް އުފެދުނު އެކަޑަމީ ކަމަށެވެ.

މީގެއިތުރުން އެ ކްލަބުން ބުނީ ޓޮވޯ އެކަޑަމީގެ ކޯޗުން ރާއްޖެ ގެނެސް ގްރީން ސްޓްރީޓް ކުޅުންތެރިންނަށް ކޯޗުކޮށްދޭން މަސައްކަތްކުރަމުން އަންނަ ކަމަށެވެ. އެގޮތުން ރާއްޖޭގެ ފުޓުބޯޅަ ތަރައްގީކޮށް ޒުވާން ކުޅުންތެރިން އުފެއްދުމުގެ މަގްސަދުގައި ކްލަބުން މުސްތަގުބަލުގައި ތަމްރީން ހެދުމަށް ސްކޮޑުން ބައެއް ކުޅުންތެރިންވެސް ޓޮވޯ އެކަޑަމީއަށް ފޮނުވަން ނިންމާފައިވާކަމަށް ގްރީން ސްޓްރީޓުން ބުނެއެވެ.

ގައުމީ ޓީމުގެ ކުރީގެ ޑިފެންޑަރު ސޮބާ އަކީ 2008 ވަނަ އަހަރު ރާއްޖެއިން ސާފް ޗެމްޕިއަންޝިޕް ކާމިޔާބުކުރިއިރު، ޓީމުގައި ހިމެނުނު ކުޅުންތެރިޔެކެވެ. އޭނާ ވަނީ ރާއްޖޭގެ މަޝްހޫރު ގިނަ ކްލަބްތަކަށް ކުޅެފައެވެ. އޭގެ ތެރޭގައި ނިއުރޭޑިއަންޓް ސްޕޯޓްސް ކްލަބް، ވިކްޓްރީ ސްޕޯޓްސް ކްލަބް އަދި ވީބީ އައްޑޫ އެފްސީ ހިމެނެއެވެ.

ސޮބާ ކޯޗިން ދާއިރާ އަށް ވަނީ ނިއުރޭޑިއަންޓް ސްޕޯޓްސް ކްލަބްގެ އެސިސްޓެންޓް ކޯޗުކަމާ ހަވާލުވި ހިސާބުންނެވެ. އެގޮތުން އޭނާ ވަނީ އެ ކްލަބުގެ ހެޑްކޯޗުކަމުން ނިކޮލާ ކަވަޒޮވިޗް ވަކިކުރުމާއެކު، އޭއެފްސީ ކަޕް އަދި ދިވެހި ލީގުގެ މެޗުތަކުގައިވެސް ނިއު އަށް އިރުޝާދީ އެ ޓީމަށް ރަނގަޅު ނަތީޖާތަކެއް ހޯދައިދީފައެވެ.

އެއަށްފަހު ދެން ސޮބާ ހަވާލުވީ ކްލަބް ގްރީން ސްޓްރީޓާއެވެ. އެގޮތުން އޭނާ ވަނީ ދެވަނަ ޑިވިޝަނުން ފުރަތަމަ ޑިވިޝަނަށް އެޓީމު ޕްރޮމޯޓްކޮށްދިނުމަށް މުހިންމު ދައުރެއް އަދާކޮށްދީފައެވެ.

މާލޭ ލީގުގައި ގްރީން ސްޓްރީޓް މިވީތަނަށް ދެ މެޗު ކުޅެފައިވާއިރު، އޭގެ ތެރެއިން އެއް މެޗުން އެޓީމު މޮޅުވިއިރު، ދެވަނަ މެޗުން ވަނީ ބަލިވެފައެވެ.