އެފްއައިވީބީން ރާއްޖެ ސަސްޕެންޑް ނުކުރާނެ: މިނިސްޓަރ މަހްލޫފް

ދުނިޔޭގެ ވޮލީ ބޯޅައިގެ މައި އިދާރާ ކަމަށްވާ އެއްއައިވީބީ އިން ރާއްޖެ ސަސްޕެންޑް ކޮށްފާނެ ކަމަށް ގަބޫލު ނުކުރައްވާ ކަމަށް ކުޅިވަރާއި ބެހޭ ވަޒީރު އަހްމަދު މަހްލޫފް ވިދާޅުވެއްޖެއެވެ.

ވޮލީބޯޅަ އެސޯސިއޭޝަން އޮފް މޯލްޑިވްސްގެ އެތެރޭގައި ގިނަ މައްސަލަތަކެއް ހުރިކަން ފާހަގަކޮށް ސްޕޯޓްސް ކޮމިޝަނަރު ވަނީ މިދިޔަ ޖޫން މަހުގެ 10 ވަނަ ދުވަހު ވޮލީބޯޅަ އެސޯސިއޭޝަނުގެ ނޯމަލައިޒޭޝަން ކޮމެޓީއެއް އެކުލަވާލައިފައެވެ. ނަމަވެސް ދުނިޔޭގެ ވޮލީބޯޅައިގެ މައި އިދާރާ އެފްއައިވީބީއިން ވަނީ އެ ކޮމެޓީ ބަލައި ނުގަންނަކަމަށް ބުނެފައެވެ. އަދި އެ އެސޯސިއޭޝަނުގެ ހިންގުން ލަތީފާއި ހަވާލު ކުރުމަށް އެފްއައިވީބީއިން ވަނީ ސްޕޯޓްސް ކޮމިޝަނަށް އަންގައިފައެވެ.

ސްޕޯޓްސް މިނިސްޓްރީގައި ހޯމަ ދުވަހުގެ ބޭއްވި ނޫސްވެރިންގެ ބައްދަލު ވުމުގައި ވާހަކަ ދައްކަވަމުން މިނިސްޓަރ މަހްލޫފް ވިދާޅުވީ ވޮލީ ބޯޅައިގެ ހާލަތު ސަރުކާރުންދަނީ ވަރަށް ރަނގަޅަށް ބަލަމުންކަމަށާއި އެފްއައިވީބީއިން ރާއްޖެއާއި މެދު ފިޔަވަޅު އަޅާނެކަމަށް ނުދެކޭ ކަމަށެވެ.

ވޮލީބޯޅަ އެސޯސިއޭޝަނުގެ ނޯމަލައިޒޭޝަން ކޮމެޓީ ސައްހަ ކަމަށް ރާއްޖޭގެ އޮލިމްޕިކްސް ކޮމެޓީއިން ވަނީ ނިންމައިފައެވެ.