މި ސަރުކާރު ޒިންމާދާރު ކުރުމަށް ރައީސް ޔާމީން ކ އަތޮޅަށް ވަޑައިގަންނަވަނީ

ޕީޕީއެމް- ޕީއެންސީ އިސްނަގައިގެން މި ސަރުކާރު ޒިންމާދާރު ކުރުމަށް ރާއްޖޭގެ ރަށްތަކަށް ކުރާ ދަތުރުތަކުގެ ތެރެއިން ކ އަތޮޅުގެ ހަތަރު ރަށަކަށް ވަޑައިގަންނަވަން ކުރީގެ ރައީސް އަބްދުﷲ ޔާމީން ނިންމަވައިފިއެވެ.

ޕީޕީއެމް-ޕީއެންސީއިން ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވީ ރައީސް ޔާމީން ކ. އަތޮޅަށް ކުރައްވާ ދަތުރު ފުޅުގައި ވަޑައިގަންނަވާނީ ތުލުސްދޫ ދާއިރާގައި ހިމެނޭ ދިއްފުށި، ތުލުސްދޫ, ހުރާގެ އިތުރުން ހިންމަފުއްޓަށް ކަމަށެވެ.

ބުރާސްފަތި ދުވަހު ރައީސް ޔާމީން ދިއްފުއްޓާއި ތުލުސްދޫއަށް ވަޑައިގަންނަވާއިރު އެ ދުވަހުގެ ރޭ ތުލުސްދޫގައި ޖަލްސާއެއް ބޭއްވުމަށް ހަމަޖެހިފައިވާ ކަމަށް ޝުޖާއު ވިދާޅުވިއެވެ. އަދި ހުކުރު ދުވަހު ރައީސް ޔާމީން ހުރާއަށާއި ހިންމަފުއްޓަށް ވަޑައިގަންނެވުމަށް ހަމަޖެހިފައިވާ ކަމަށް އޭނާ ވިދާޅުވިއެވެ.

ތުލުސްދޫ ދާއިރާގެ މަޖިލިސް މެމްބަރަކީ މިނިވަން މެމްބަރެއް ކަމަށްވާ އިބްރާހިމް ނަސީމްއެވެ.

ޝުޖާއު ވިދާޅުވީ މީގެ ކުރިން ރައީސް ޔާމީން ރަށްތަކަށް ވަޑައިގެންނެވުމުން ސަރުކާރަށް ޕްރެޝަރ ބޮޑުވި ކަމަށެވެ. އެގޮތުން މ. އަތޮޅަށް ދަތުރު ކުރެއްވުމުން އެއަތޮޅު މި ސަރުކާރަށް މުހިއްމުވެފައިވާ ކަމަށާއި އޭގެ ފަހުން ޚާއްސަ އަހަމިއްޔަތެއް މ. އަތޮޅަށް މި ސަރުކާރުން ދޭ ކަމަށް ވިދާޅުވިއެވެ.

ޝުޖާއު ވިދާޅުވީ މިސަރުކާރަށް ރައްޔިތުންގެ ކަންބޮޑުވުންތަކާއި ޝަކުވާތަށް އަޑު ނީވޭ ކަމަށެވެ. އަދި ރަށްރަށަށް ދިމާވެފައިވާ މައްސަލަތައް ހައްލު ކުރަން މިސަރުކާރުން ކުރާ މަސައްކަތެއް ނުފެންނަ ކަމަށް އޭނާ ވިދާޅުވިއެވެ.

ކ. އަތޮޅަށް ރައީސް ޔާމީން ދަތުރުފުޅު ކުރައްވަން ނިންމަވާފައިވާއިރު އެމަނިކުފާނުގެ މައްޗަށް އުފުލާފައިވާ މަނީ ލޯންޑަރިން ދައުވާގެ ޝަރީއަތުގެ ޚުލާސާ ބަޔާން އިއްވުން މިމަހުގެ 9 ވަނަ ދުވަހަށް ވަނީ އަވަސް ކޮށްފައެވެ.