މަނީ ލޯންޑްރިން ކުރިކަމުގެ ތުހުމަތުގައި ގިނީގެ ރައީސްގެ ދަރިކަލުން އަތުން ފުލުހުން އަތުލައިގަތް އަގުބޮޑެތި ކާރުތައް ސްވިޒަލޭންޑްގައި ނީލަމަށް ހުޅުވާލައިފިއެވެ.

މުޅި ޖުމްލަ 25 ކާރެއް ނީލަން ކިޔާއިރު، އޭގެ ތެރޭގައި ފެރާރީ އާއި ލަމްބޯގިނީ ކާރުތައް ހިމެނޭއެވެ. އޮކްޝަން ކުރާ ފަރާތުން ބުނެފައިވަނީ 25 ކާރު ވިއްކައިގެން 18.5 މިލިއަން ޑޮލަރު ލިބޭނެ ކަމަށެވެ.

އެތަކެތި ނީލަމަށްލާން ނިންމާފައިވަނީ، ގިނީގެ ރައީސްކަން 40 އަހަރުވަންދެން ގިނީގެ ކުރައްވަމުން ގެންދަވާ ޓެޑޯރޯ އޮބިއާންގް އެންގެމާގެ ދަރިފުޅު އޮބިއަންގޭ މަންބަޒޯގްއާގެ އިތުރުން އެހެން މީހެއްގެ މައްޗަށް ފައިސާ އަށް ހިޔާނަތެރިވި ކަމުގެ ކުށުގެ ދައުވާގެ މައްސަލަ، މި އަހަރުގެ ފެބުރުއަރީ މަހު ޖެނީވާގެ ޕްރޮސެކިއުޓާ އޮފީހުން ނިންމުމާއި ގުޅިގެންނެވެ.

ޕްރޮސެކިއުޓާ އޮފީހުން ބުނީ، ގިނީގެ ނާއިބް ރައީސް އޮބިއަންގާއާ ދެކޮޅަށް އުފުލާފައިވާ ދައުވާ އަނބުރާ ގެންގޮސްފައިވާ ކަމަށާއި، އެހެން ނަމަވެސް އެ މައްސަލަ އާއި ގުޅުން ހުރި ކާރުތައް ހިފަހައްޓާފައިވާ ކަމަށެވެ.

ޖެނިވާ އާއި ކައިރީ އޮންނަ ޗެރެސެކް އަވަށުގެ ގޯލްފް ކުލަބުގައި ނީލަން ކިޔާފައިވާ ކާރު ތަކުގެ ތެރޭގައި ހަތް ފެރާރީ، ތިން ލަމްބޯގިނީ، ފަސް ބެންޓްލީ އަދި މަސަރާޓީ ބްރޭންޑުގެ ކާރެއްގެ އިތުރުން މެކްލޭރެން އެއް ހިމެނޭއެވެ.

އެ ކާރުތަކުގެ ތެރެއިން އެންމެ އަގުބޮޑު އެއްކާރު ކަމަށްވާ ލަމްބޯގިނި ވެނީނޯ ރޯޑްސްޓާރގެ އަގު އުޅެނީ ފަސް މިލިއަނާާއި ހަ މިލިއަން ދެމެދުގެ އަގެއްގައެވެ. އަދި ޔެލޯ ފެރާރީ ހައިބްރިޑްގެ އަގު އުޅެނީ 2.6 އަކާއި 2.8 މިލިއަނާއި ދޭތެރޭގައެވެ.