އަފްގާނިސްތާނުގައި ހޮނިހިރު ދުވަހު އޮންނަ ރިޔާސީ އިންތިހާބާއި ދިމާކޮށް އެގައުމުން ސަލާމަތީ ފިޔަވަޅުތައް ވަރުގަދަ ކޮށްފިއެވެ.

އަފްގާނިސްތާނުގައި ހޮނިހިރު ދުވަހު އޮންނަ ރިޔާސީ އިންތިހާބުގައި ޖުމްލަ 15 ކެނޑިޑޭޓުން ވާދަކުރާއިރު މި އިންތިހާބުގައި 9.5 މިލިއަން މީހުން ވަނީ ވޯޓުލުމަށް ރަޖިސްޓަރީ ކޮށްފައެވެ.

ރިޔާސީ އިންތިހާބު ކާމިޔާބު ކުރުމަށް ކޮންމެ ކެނޑިޑޭޓަކުވެސް ވޯޓުގެ 50 އިންސައްތަ ހޯދަން ޖެހޭ އިރު މީޑިއާ ރިޕޯޓްތައް ބުނާ ގޮތުން މި އިންތިހާބުގައި އެއްވެސް ކެނޑިޑޭޓަކަށް ފުރަތަމަ ބުރުން ކާމިޔާބެއް ނުކުރެވޭނެއެވެ. އިންތިހާބު ފުރަތަމަ ބުރުން ކާމިޔާބު ނުކުރެވިއްޖެ ނަމަ ދެވަނަ ބުރުގެ ވޯޓުލުން ކުރިޔަށް ދާނީ ފުރަތަމަ ބުރުން އެންމެ ގިނަ ވޯޓު ހޯއްދެވި ދެ ކެނޑިޑޭޓުންގެ މެދުގައެވެ.

މި ފަހަރުގެ ރިޔާސީ އިންތިހާބުގައި އަފްގާނިސްތާނުގެ މިހާރުގެ ރައީސް އަޝްރަފް ޣަނީވެސް ވާދަ ކުރައްވާނެއެވެ.

ސަރުކާރުގައި އާންމުވެފައިވާ ކޮރަޕްޝަނާއި، ހަނގުރާމަ ވެރިންގެ ކަންކަން ނުހުއްޓުވި ދިއުމުގެ ސަބަބުން އަފްގާނު ރައްޔިތުން ސަރުކާރަށް ފާޑު ކިޔަމުންދާއިރު ރައީސް އަޝްރަޕް ވިދާޅުވީ ސަރުކާރުން އަންނަނީ ކޮރަޕްޝަން ހުއްޓުވުމަށް ހަރުކަށި ފިޔަވަޅުތަކެއް އެޅުމަށް ތައްޔާރުވަމުން ކަމަށެވެ.

އަފްގާނިސްތާނުގައި ހޮނިހިރު ދުވަހު ބާއްވަން ތައްޔާރުވެފައިވާ ރިޔާސީ އިންތިހާބު ބޮއިކަޓް ކުރުމަށް ތާލިބާން ޖަމާއަތުން ގޮވައިލައިފައިވާއިރު، އެޖަމާއަތުން ނެރުނު

ބަޔާނެއްގައި ބުނެފައިވަނީ އަފްގާނިސްތާނުގައި ބާއްވަނީ ސައްހަ އިންތިހާބެއް ނޫން ކަމަށާއި އަދި އެ އިންތިހާބު ބާއްވައިފިނަމަ ބޮންގޮއްވާނެ ކަމުގެ އިންޒާރު އެ ޖަމާއަތުން ވަނީ ދީފައެވެ.

އަފްގާނިސްތާނުގެ ރިޔާސީ އިންތިހާބުގެ ވޯޓުލުން އެ ގައުމުގެ ގަޑިން ހެދުނު ވޯޓުލާން ފަށާއިރު ވޯޓުލައި ނިމޭނީ އެގައުމުގެ ގަޑިން ހަވީރު ފަހެއް ޖެހުމުންނެވެ.