ފަނޑިޔާރުކަމަށް ރައީސަށް ލަފާއެރުވި ދެ ބޭފުޅުންގެ ތެރެއިން އެއްވެސް ނަމެއް އިސްކޮށްފައެއް ނުވާނެ: ޖޭއެސްސީ
17 ސެޕްޓެމްބަރު 2019 | އަންގާރަ 03:54ޖޭއެސްސީން ރައީސަށް ލަފާއެރުވީ ދިޔާނާ ނުވަތަ މަހާޒު ސުޕްރީމް ކޯޓަށް އައްޔަންކުރެއްވުމަށް
ދިޔާނާ(ކ) އަދި މަހާޒު
ސުޕްރީމް ކޯޓުގެ ހުސްވެފައިވާ މަގާމަށް ފަނޑިޔާރަކު އައްޔަން ކުރެއްވުމުގައި ޖުޑީޝަލް ސަރވިސް ކޮމިޝަން (ޖޭއެސްސީ) އިން ރައީސް އިބްރާހިމް މުހައްމަދު ސޯލިހަށް ލަފާ އެރުވުމުގައި އެ ކޮމިޝަނުން އިސްކަންދީފައިވާ ދެ ބޭފުޅުންގެ ތެރެއިން ވަކި ބޭފުޅެއްގެ ނަމަށް އިސްކަން ދީފައި ނުވާނެ ކަމަށް ބުނެފިއެވެ.
ސުޕްރީމް ކޯޓުގެ ހުސްވެފައިވާ ފަނޑިޔާރު ކަމަށް އައްޔަން ކުރެއްވުމަށް "ހައިލީ ރެކޮމެންޑް ކުރާ" ފުރަތަމަ ނަމެއްގެ ގޮތުގައި ކުރީގެ ބަންޑާރަ ނައިބު ދިޔާނާ ސައީދާއި, ޑްރަގް ކޯޓުގެ ފަނޑިޔާރު މަހާޒު އަލީ ޒާހިރުގެ ނަން ޖޭއެސްސީ އިން ވަނީ ރައީސް އަށް އަރުވާފައެވެ. ޖޭއެސްސީ އިން ބުނީ ދިޔާނާ އާއި މަހާޒުގެ ތެރެއިން އެއްވެސް ބޭފުޅެއްގެ ނަމަކަށް އިސްކަން ދީފައި ނުވާނެ ކަމަށެވެ. އަދި ދެ ނަން ބަޔާން ކުރުމުގައި އިސްފަސްކޮށްފައިވަނީ ވަކި ތަރުތީބެއްގެ ގޮތުން ނުވަތަ އިސްކުރުމެއްނެތި އެއް ހަމައެއްގައި ދަރަޖަ ކޮށްފައިވާ ދެ ބޭފުޅުން ކަމަށެވެ.
ޖޭއެސްސީ އިން ބުނީ ރައީސަށް ލަފާ އެރުވުމުގައި ރައްޔިތުންގެ މަޖިލީހަށް ވަކި އަދަދަކަށް ނަން ފޮނުވުމަށް ކޮމިޝަނުން މަޝްވަރާ ދީފައި ނުވާނެ ކަމަށާއި އެ ކޮމިޝަނުގެ މަޝްވަރާއަށް ރިއާޔަތް ކޮށް މަޖިލީހަށް ފޮނުވާނެ ނަމަކާއި ފޮނުއްވާނެ ނަމުގެ އަދަދު ކަނޑައަޅަނީ ރައީސް ކަމަށް ޖޭއެސްސީ އިން ވަނީ ބުނެފައެވެ.
އެ ކޮމިޝަނުން ރައީސަށް ރެކޮމެންޑްކުރި ތިންވަނަ ނަމެއްގެ ގޮތުގައި އެ މަގާމަށް ކުރިމަތިލައްވާފައި ތިއްބެވި ބޭފުޅުންގެ ތެރެއިން ހައިކޯޓުގެ ފަނޑިޔާރު މުހައްމަދު ނިޔާޒާއި، އެ ކޯޓުގެ ފަނޑިޔާރު އަލީ ސަމީރު އަދި ފަނޑިޔާރު ޝުއައިބު ހުސެއިން ޒަކަރިއްޔާއެވެ.
ކޯޓުތަކުގެ ގާނޫނަށް ގެނައި އިސްލާހު ރައީސް ތަސްދީގު ކުރެއްވުމާއި ގުޅިގެން ސުޕްރީމް ކޯޓުގެ ބެންޗް 7 އަށް ވަނީ އިތުރުކޮށްފައެވެ. އެ ކޯޓުގެ ފަނޑިޔާރު އަބްދުﷲ ޑީޑީ މަގާމުން ވަކި ކުރެއްވުމާއި ގުޅިގެން އެ މަގާމު އޮތީ މިހާރު ހުސްކޮށެވެ. މިހާރު ސުޕްރީމް ކޯޓުގެ ބެންޗުގައި ތިއްބަވަނީ ހަ ފަނޑިޔާރުންނެވެ.
ޤާނޫނު އަސާސީގެ 148 ވަަނަ މާއްދާގެ (ހ) ގެ ބުނެފައިވާ ގޮތުން ސުޕްރީމް ކޯޓުގެ އެންމެހާ ފަނޑިޔާރުން އައްޔަންކުރާނީ ދައުލަތުގެ އެންމެ އިސްވެރިޔާގެ ހައިސިއްޔަތުން ރައީސުލްޖުމްހޫރިއްޔާ ކަމަށެވެ. މިގޮތުން ސުޕްރީމް ކޯޓުގެ ފަނޑިޔާރުކަމުގެ މަގާމަށް އައްޔަންކުރާ މީހުން ކަނޑައަޅާނީ ޖުޑީޝަލް ސަރވިސް ކޮމިޝަންގެ މަޝްވަރާގެ މަތިން ރައްޔިތުންގެ މަޖިލީހަށް ހުށަހެޅުމަށް ފަހު، ޖަލްސާއަށް ހާޒިރުވެ ވޯޓުގައި ބައިވެރިވި މެންބަރުންގެ އަގުލަބިއްޔަތުން އެ ނަންތަކެއް ފާސްވުމުން ކަމަށް ބުނެފައިވެއެވެ. އަދި މަޖިލީހުގެ ރުހުން ހޯދުމަށް ފޮނުވާ ބޭފުޅުންނަށް މަޖިލީހުން ރުހުން ދިނުމުން އެބޭފުޅުން ހަތް ދުވަހުގެ ތެރޭގައި ސުޕްރީމް ކޯޓުގެ ފަނޑިޔާރު ކަމަށް އައްޔަންކުރަން ޖެހެ އެވެ.
