ކަނޑޫދޫގެ ދަނޑުވެރިންގެ ކަންބޮޑުވުންތައް ނައިބު ރައީސް ފައިސަލްއާ ހިއްސާ ކުރައްވައިފި
15 ސެޕްޓެމްބަރު 2019 | އާދީއްތަ 08:25އެރަށުގެ ތަރައްގީއަށް ރާއްވަފައިވާ މަސައްކަތްތަކާ ބެހޭ ގޮތުން މަޝްވަރާކުރި
ކަނޑޫދޫ ކައުންސިލްއާ އެކު ބޭއްވުނު ބައްދަލުވުމުގެ ތެރެއިން
ތ. ކަނޑޫދޫ ދަނޑުވެރިންގެ ކަންބޮޑުވުންތައް ރައީސުލްޖުމްހޫރިއްޔާގެ ނައިބް ފައިސަލް ނަސީމްއާ ހިއްސާކުރައްވައިފިއެވެ.
އާދިއްތަ ދުވަހު ނައިބު ރައީސް ފައިސަލް ކަނޑޫދޫ ކައުންސިލަރުންނާ ބައްދަލުކުރައްވައި އެ ރަށުގެ ގިނަ ކަންތައްތައް ވަނީ އޮޅުންފިލުއްވާފައެވެ.
ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލުކުރެއްވުމުގައި، ކަނޑޫދޫ ކައުންސިލަރުން ވަނީ އެ ރަށުގެ ތަރައްގީއަށް ރާވާފައިވާ މަސައްކަތްތަކާއި، ރައްޔިތުންގެ ހުރި ކަންބޮޑުވުންތަކުގެ މައުލޫމާތާއި ރަށުގެ ތަރައްގީއަށް ބޭނުންވާ ކަންކަމާ ބެހޭގޮތުން ނައިބު ރައީސްއާ މަޝްވަރާ ކުރައްވާފައެވެ.
ކަނޑޫދުއަށް ދިމާވެފައިވާ މައްސަލަތަކުގެ ތެރެއިން ކައުންސިލަރުން އެންމެ ބޮޑަށް ފާހަގަކުރައްވާފައިވާ ކަންތައްތަކުގެ ތެރޭގައި ކަރަންޓުގެ ޚިދުމަތް އެންމެ ފުރިހަމަ ގޮތުގައި ފޯރުކޮށްދިނުމަށް ކުރިމަތިވެފައިވާ ގޮންޖެހުންތަކާއި، ކަނޑޫދު އަކީ ފުޅާ ދާއިރާއެއްގައި ދަނޑުވެރިކަން ކުރާ ރަށަކަށްވާއިރު، ދަނޑުވެރިންގެ ބައެއް ކަންބޮޑުވުންތައް ވެސް ނައިބު ރައީސް ފައިސަލްއާ ހިއްސާ ކުރެއްވިއެވެ. އަދި ދަނޑުވެރިކަން ފުޅާ ކުރާނެ ގޮތްތަކާ ބެހޭ ގޮތުން މަޝްވަރާ ކުރެއްވިއެވެ.
މި ބައްދަލުކުރެއްވުމުގައި ނައިބު ރައީސް ފައިސަލް ދެއްކެވި ވާހަކަފުޅުގައި، ކަނޑޫދޫ ކައުންސިލަރުން އެދިވަޑައިގެންނެވި ކަންކަމުގައި ކަމާގުޅޭ މިނިސްޓްރީތަކާ މަޝްވަރާ ކުރައްވައިގެން އެކަންކަމަށް ހައްލެއް ހޯއްދަވައިދެއްވަން މަސައްކަތް ކޮށްދެއްވާނެ ކަމުގައި ވިދާޅުވިއެވެ. އަދި، ލާމަރުކަޒީ ގާނޫނަށް ސަރުކާރުން ހުށަހަޅުއްވާފައިވާ އިސްލާހުތަކަކީ ކައުންސިލްތައް ބާރުވެރިކުރުވުމަށް ސަރުކާރުން ކަނޑައަޅާފައިވާ އަމާޒަށް ވާސިލުވުމަށް ލިބޭ އިތުރު ހިތްވަރެއްކަން ފާހަގަކުރައްވާ، ކައުންސިލްތަކުން އިތުރަށް ޒިންމާދާރުވާން ކުރެވެން ހުރި މަސައްކަތްތައް ފާހަގަކުރައްވާ، އެކަންކަމަށް ޚާއްސަ އިސްކަމެއް ދިނުމަށް އެދިވަޑައިގެންނެވިއެވެ.
