ރައީސް ސޯލިހު ނ. މަނަދޫއަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފި
15 ސެޕްޓެމްބަރު 2019 | އާދީއްތަ 05:17ރައީސް މާލެ ވަޑައިގެންފައިވަނީ މިއަދުގެ ހެނދުނުގެ ވަގުތެއްގައި
ރައީސް ސޯލިހު މަނަދޫއަށް ކުރެއްވި ދަތުރުފުޅުގެ ތެރެއިން
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މިލަދުންމަޑުލު ދެކުނުބުރީ ކުރެއްވި ދަތުރުފުޅު ނިންމަވާލެއްވުމަށްފަހު އާދިއްތަ ދުވަހުގެ ހެނދުނު މާލެ ވަޑައިގެންފިއެވެ.
ރައީސުލްޖުމްހޫރިއްޔާ މަނަދޫއަށް ކުރެއްވި މި ދަތުރުފުޅަކީ 'މިލަދެކުނު އަދަބީ ޢީދު 2019' ނިންމުމުގެ ޖަލްސާ ޝަރަފުވެރިކޮށްދެއްވުމަށް ކުރެއްވި ދަތުރުފުޅެކެވެ. މަނަދޫ ބަނދަރު ސަރަޙައްދުގައި ބޭއްވި ޖަލްސާގައި، ރައީސް ސޯލިހު ވަނީ ޢީދުގެ އަދަބީ އެކި މުބާރާތްތަކުން 1 ވަނައަށް ހޯދި ދަރިވަރުންނާއި ސްކޫލްތަކަށް ހަނދާނީ ލިޔުމާއި އިނާމު ޙަވާލު ކޮށްދެއްވާފައެވެ. އަދި މި އަދަބީ ޢީދުގައި ތަރި ލިބުނު ސްކޫލުތަކަށް އިނާމު ދެއްވީ ވެސް ރައީސުލްޖުމްހޫރިއްޔާއެވެ.
މި ޢީދަކީ މި ސެޕްޓެމްބަރ މަހުގެ 11 ވަނަ ދުވަހުން ފެށިގެން 14 ވަނަ ދުވަހުގެ ނިޔަލަށް ނ. މަނަދޫގައި ކުރިޔަށް ގެންދިޔަ އަދަބީ ޢީދެކެވެ. މިއީ ދިވެހިބަހުގެ އެކެޑަމީއިން ޤައުމީ ފެންވަރުގައި ބާއްވާ 5 ވަނަ އަދަބީ ޢީދެވެ. މީގެ ކުރިން މި އަދަބީ ޢީދު ބާއްވާފައިވަނީ ގއ، ގދ، ޅ އަދި މ އަތޮޅުގައެވެ.
އެ ޖަލްސާގައި ރައީސުލްޖުމްހޫރިއްޔާގެ އަރިހުގައި މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫނާއި، ދިވެހިބަހާއި ތާރީޚަށް ލޯބިކުރައްވާ ގިނަ އަދަދެއްގެ ބޭފުޅުން މި ބައިވެރިވެވަޑައިގެންނެވިއެވެ.
