ކ. މާލެ
|
14 ސެޕްޓެންބަރ 2019 | ހޮނިހިރު 18:01
މިނިސްޓަރ މަހްލޫފް
މިނިސްޓަރ މަހްލޫފް
ފޭސްބުކް
ފުޓްސަލް ދަނޑުތައް
މާލެ ސަރަހައްދުގެ ފުޓްސަލް ދަނޑުތަކުން ނަގާ އަގު ކޮންޓްރޯލްކުރާނަން: މިނިސްޓަރ މަހްލޫފް
 
ފައިސާ ދީގެން ބޮޑު އަގުގައި ކުޅެން ދާން ޖެހޭ ޝަކުވާ ވަރަށް ބޮޑު

މާލެ ސަރަހައްދުގެ ފުޓްސަލް ދަނޑުތަކުން ނަގާ އަގު ކޮންޓްރޯލް ކުރާނެ ކަމަށް ޔޫތު މިނިސްޓަރ އަހުމަދު މަހްލޫފް ވިދާޅުވެއްޖެއެވެ.

އެމްއެންޔޫ އެސްޔޫ ފުޓްސަލް ފިއެސްޓާ ހުޅުވުމުގެ ރަސްމިއްޔާތުގައި ވާހަކަ ދައްކަމުން މިނިސްޓަރ މަހްލޫފް ވިދާޅުވީ، ފައިސާ ދީގެން ބޮޑު އަގުގައި ކުޅެން ދާން ޖެހޭ ޝަކުވާ ވަރަށް ބޮޑު ކަމަށާއި، އެގޮތުން އެންމެ ބޮޑަށް ޝަކުވާ ލިބެމުން އަންނަނީ މާލެއިންނެވެ.

މިކަމާ ގުޅިގެން މާލޭގައި ދަނޑުތައް ހުރި ފަރާތްތަކާވެސް ބައްދަލުކުރި ކަމަށް ފާހަނގަކުރައްވާ މިނިސްޓަރ މަހްލޫފް ވިދާޅުވީ، މާލެ ސަރަހައްދުގައި އަޅާފައިހުރި ހުރިހާ ފުޓްސަލް ދަނޑުތަކުން ފީ ނެގުމަށް ވަކި އުސޫލެއް ހަދަމުން އަންނަ ކަމަށާއި، އެ އުސޫލުގެ ދަށުން ހުރިހާ ދަނޑަކުންވެސް ނަގާނީ އެއް އަގެއް ކަމަށެވެ.

މިހާރު ފުޓުބޯޅަ ކުޅެން ދާން 5،000 ރުފިޔާ ނުވަތަ 7،000 ރުފިޔާ ހަރަދުކުރަން ޖެހޭ ކަމަށް ފާހަނގަކުރައްވަމުން މިނިސްޓަރ މަހްލޫފް ވިދާޅުވީ، ރަށްޓެހިންނާއެކު އެބޭފުޅާވެސް ކުޅެން ދަނީ ފައިސާ ހަރަދުކޮށްގެން ކަމަށެވެ.

މީގެއިތުރުން މިނިސްޓަރ މަހްލޫފް ވިދާޅުވީ، ފުޓްސަލް ކުޅެން ދާން ބޭނުންވާ ކުޅުންތެރިންނަށް ލުޔެއް ހޯދައިދިނުމުގެ ގޮތުން މެރީ ބްރައުން ފުރަގަހުގައި އޮންނަ ބޮޑު ވެލި ދެ ދަނޑުގެ އިތުރުން ހެންވޭރު ދަނޑުގައި ޓާފް އެޅުމުގެ ކަންތައް ކުރިޔަށްދާނެ ކަމަށެވެ.

މީގެއިތުރުން މިނިސްޓަރ މަހްލޫފް ވިދާޅުވީ، ޔޫތު މިނިސްޓްރީން ހަމައެކަނި ކުރަންޖެހެނީ ފުޓުބޯޅަ އާއި ކުޅިވަރުގެ ކަންތައްތައް ނޫން ކަމަށާއި، އެހެން ކަންތައްތައްވެސް ކުރިޔަށްދާ ކަމަށެވެ. އަދި ކުޅިވަރު މިހާރު އޮތް ހިސާބުން އެހެން ހިސާބަކަށް ގެންދިޔުމަށްވެސް މަސައްކަތް ކުރަމުން ގެންދާ ކަމަށް މިނިސްޓަރ ވިދާޅުވިއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަމަން ހަލީމް
0%
0%
0%
0%
0%
0%
ކޮމެންޓް