ސަރުކާރުގެ ލަސްކަމެއް އުޅޭހެން ހީވޭ: ރައީސް ނަޝީދު
13 ސެޕްޓެމްބަރު 2019 | ހުކުރު 19:39ރައްޔިތުން އުއްމީދު ކުރިވަރަށް މަސައްކަތް ނުކުރެވުނު ކަމަށް ވިދާޅުވި
ރައީސް ނަޝީދު އާއި ރައީސް ސޯލިހު
ސަރުކާރު ތެރޭގައި ކޮންމެވެސް ވަރަކަށް ލަސްކަމެއް އުޅޭކަމަށް ހީވާކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހުކުރު ދުވަހުގެރޭ މައްޗަންގޮޅި މެދު ދާއިރާގެ ރައްޔިތުންނާ އެކު ބޭއްވި ބައްދަލުވުމުގައި މަޖިލީހުގެ ސްޕީޑާ އެއްވަރަށް ސަރުކާރުގެ ސްޕީޑް ހިނގައިގަންނަން ކިހާ ދުވަހެއް ނަގާނެތޯ މީހާކު ސުވާލު ކުރުމުން ނަޝީދު ވިދާޅުވީ، ސަރުކާރުގެ ތެރޭގައި ކޮންމެވެސް ވަރަކަށް ''ޓައިމްލެގެއް'' ނުވަތަ ލަސްކަމެއް އުޅޭ ކަމަށް ހިވޭފައިވާ ކަމަށެވެ. އެހެން ނަމަވެސް ކޮންމެ ސަރުކާރަކުންވެސް ކަންތައްތައް ކުރަން ދުވަސްކޮޅެއް ނަގާނެކަމަށާއި، ސަރުކާރުގެ ޕްލޭންތައް ވަރުގަދަވާނެ ކަމަށް ގަބޫލުފުޅު ކުރައްވާ ކަމަށެވެ. މަޖިލީހުގެ ރައީސް ވިދާޅުވީ، މަޖިލީހާ އެއްވަރަށް ސަރުކާރުގެ މަސައްކަތް ކުރިއަށް ގެންދެވޭނީ، ސަރުކާރުގެ ހުރިހާ ވުޒާރާތަކެއް އެކަތިގަނޑެއްގެ ގޮތުގައި މަސައްކަތް ކޮށްގެން ކަމަށެވެ.
ކުރިޔަށް އޮތް މަސްތަކުގައި ސަރުކާރުގެ ސްޕީޑް ހަލުވިވެގެން ދާނެ ކަމަށް ގަބޫލުފުޅު ކުރައްްވާ ކަމަށް އެމަނިކުފާނު ވިދާޅުވިއެވެ.
ދާއިރާގެ ރައްޔިތުންނާ މުހާތަބުކޮށް ވާހަކަ ދައްކަވަމުން ނަޝީދު ވިދާޅުވީ، ވީވަރަކުން ދާއިރާގެ ރައްޔިތުންނާ ބައްދަލުކުރައްވާފައިވާނެ ކަމަށާއި، ރައްޔިތުން ބޭނުންވާ ކަންތައްތަކަށް ހައްލު ހޯދައިދިނުމުގެ މަސައްކަތްވެސް ކުރެއްވި ކަމަށެވެ. އެހެން ނަމަވެސް ދާއިރާގެ ރައްޔިތުން ބޭނުންވާ މިންވަރަށް އެކަންތައްތައް ކުރެވިފައި ނެތް ކަމަށެވެ. ކުރިޔަށް އޮތްތަނުގައި ރައްޔިތުންގެ އުއްމީދު ތަކާއި އެކު މަސައްކަތް ކުރައްވާނެ ކަމުގެ ޔަގީންކަން ނަޝީދު ވަނީ އަަރުވާފައެވެ.
