ނޯތު ހާބަރުގައި އޮތް "ބެސްޓް ލައިން" ނަމަކަށް ކިޔާ ބޯޓެއްގައި ގޭސްފުޅިއެއް ގޮވައިގެން ހިނގި ހާދިސާގައި އައިސީޔޫގައި ފަރުވާދެމުން އަންނަ މީހާ އަދިވެސް އޮތީ ކްރިޓިކަލް ހާލަތުގައި އައިޖީއެމްއެޗުން ބުނެފިއެވެ.
އައިޖީއެމްއެޗްގެ މީޑިއާ އޮފިޝަލް ރާއްޖެއެމްވީއަށް ވިދާޅުވީ ގޭސްފުޅިއެއް ގޮވައިގެން ހިނގި ހާދިސާގައި އަނިޔާވެގެން އެ ހޮސްޕިޓަލަށް އަށް މީހަކު ގެނައި ކަމަށެވެ. އޭގެތެރެއިން ހަތަރު މީހަކު ފަރުވާ ހޯދުމަށްފަހު ދޫކޮށްލާފައިވާއިރު ހަތަރު މީހަކަށް ދަނީ ފަރުވާ ދެމުންނެވެ.
އެ ހަތަރު މީހުންގެ ތެރެއިން އެކަކު އަދިވެސް އޮތީ އައިސީޔޫގައި ކަމަށާއި އެމީހާގެ ހާލު ސީރިއަސް ކަމަށް އޭނާ ވިދާޅުވިއެވެ. އޭނާ ވިދާޅުވީ އައިސީޔޫގައި ފަރުވާދެމުން އަންނަ މީހާގެ 80 ޕަސެންޓް ވަނީ އަނދާފައި ކަމަށެވެ. އެހާދިސާގައި އައިސީޔޫގައި ފަރުވާދެމުން އަންނަނީ ބިދޭސީ ފިރިހެނެކެވެ.
ފުލުހުން ބުނީ ބުދަ ދުވަހުގެ ރޭ 7:15 ހާއިރު ހިނގި އެހާދިސާގައި އަނިޔާވެފައިވަނީ ފަސް ދިވެހި ފިރިހެނުންނަށާއި ދެ ބަންގްލަދޭޝް މީހުންނަށް ކަމަށެވެ. ފުލުހުން ބުނީ މިހާތަނަށް ބެލި ބެލުމުން ބޯޓުގައި ހުރި ގޭސްފުޅިތައް މަތީގައި ގިނަ އަދަދެއްގެ މުދާ ޖަހާފައި ހުރިކަން ފާހަގަވެފައިވާ ކަމަށެވެ.
