ގެއްލިގެން ހޯދަމުން ދިޔަ އަޓްސޫ މަރުވެފައި އޮއްވާ ފެނިއްޖެ

ތުރުކީ އާއި ސީރިއާ އަށް އައި ބިންހެލުމުގައި ވެއްޓުނު އިމާރާތެއްގެ ތެރޭގައި ތާށިވެ، ގެއްލިގެން ހޯދަމުން އައި ކްރިސްޓިއަން އަޓްސޫ މަރުވެފައި އޮއްވާ ފެނިއްޖެ އެވެ.

އަޓްސޫ ގެއްލުމާއެކު އޭނާ ހޯދުމުގެ މަސައްކަތް އެކި ފަރާތްތަކުން އައީ ކުރަމުންނެވެ. މީގެ ދެ ދުވަސް ކުރިން އަޓްސޫގެ އެޖެންޓް ބުނީ، އަޓްސޫ ހުރި ކަމަށް ބެލެވޭ އިމާރާތް ދެނެގަނެވިފައިވާ ކަމަށާއި، އެހާތަނަށް ފެނުނީ އަޓްސޫގެ ދެ ބޫޓު އެކަނި ކަމަށެވެ. ހޮނިހިރު ދުވަހު އަޓްސޫގެ އެޖެންޓް ވަނީ އިމާރާތްތަކުގެ ދަށުން އަޓްސޫ ފެނިފައިވާ ކަމަށާއި، ފެނުނުއިރު އޮތީ މަރުވެފައި ކަމަށް ބުނެފަ އެވެ. އުމުރުން 31 އަހަރުގެ ގާނާ ގައުމީ ޓީމުގެ ކުޅުންތެރިޔާ ވަނީ ޕްރިމިއާ ލީގުގެ އެވަޓަން،، ޗެލްސީ އަދި ނިއުކާސަަށް ވެސް ކުޅެފަ އެވެ. އަޓްސޫ މަރުވުމާ ގުޅިގެން އޭނާގެ ކުލަބް، ތުރުކީގެ ހަތެޔާސްޕޯ އިން ބުނީ އެމީހުންގެ ހިތާމަ ސިފަކޮށްދޭނެ ބަހެއް ނެތް ކަމަށެވެ. މީގެ އިތުރުން އެ ކުލަބުން ބުނީ އެމީހުން އަޓްސޫގެ ހަނދާނެއް ނުނެތޭނެ ކަމަށެވެ.

އަޓްސޫގެ އެޖެންޓް ބުނީ ހިތާމައާއެކު އަޓްސޫގެ ހަށިގަނޑު ހޮނިހިރު ހެނދުނު ހޯދިކަން އެންމެ ބަރު ހިތަކުން ހެޔޮއެދުންތެރިންނަށް އިއުލާން ކުރަން ޖެހޭ ކަމަށެވެ. މީގެ އިތުރުން އޭނާ ބުނީ، އޭނާގެ އެންމެ ފުން ތައުޒިޔާ އަޓްސޫގެ އާއިލާއަށާއި ލޯބިވާ މީހުންނަށް ފޮނުވާ ކަމަށެވެ. ހަމައެއާއެކު މިފުރުޞަތުގައި އެންމެންގެ ދުޢާއާއި އެއްބާރުލުމަށް ޝުކުރު އަދާ ކުރާ ކަމަށް ވެސް އެޖެންޓް ބުންޏެވެ.

ސައުދީ ދޫކޮށް އަަޓްސޫ މިހާރުގެ ކުލަބަށް ބަދަލުވީ ވެސް މިދިޔަ އަހަރު އެވެ. އެއް އަހަރު ދުވަހުގެ އެއްބަސްވުމުއްގެ ދަށުން އޭނާ އެ ކުލަބަށް ބަދަލުވީއިރު، އޭނާ ވަނީ ގާނާގެ ޤައުމީ ޓީމަށް ވެސް ކުޅެދީފަ އެވެ. ގާނާގެ ޤައުމީ ޓީމަށް ކުޅެދިން 65 މެޗުގައި އަޓްސޫ ވަނީ ނުވަ ލަނޑު ޖަހައިފަ އެވެ.