ދުނިޔޭގެ ފެތުމުގެ މައި ޖަމިއްޔާ، ފީނާ އިން ކަނޑައެޅި އުސޫލުތަކާ ގުޅިގެން މި އަހަރުގެ ޖުލައި މަހު ބާއްވާ ޓޯކިއޯ އޮލިމްޕިކް ގޭމްސްގައި ރާއްޖެ ތަމްސީލުކުރާ ފެތުންތެރިންގެ ގޮތުގައި އައިޝަތު ސާޖިނާ އާއި މުބާލް އައްޒާމް އިބްރާހީމް ހަމަޖައްސައިފިއެވެ.
މީގެ ކުރިން މިދިޔަ މެއި މަހު ސްވިމިން އެސޯސިއޭޝަން އޮފް މޯލްޑިވްސްއިން ވަނީ އޮލިމްޕިކްސްގެ ފުރުސަތު އަލީ އިމްއާނާއި އައިޝަތު ސައުސަން ދީފައެވެ. އެ ދެ ފެތުންތެރިންނަށް އެ ފުރުސަތު ދިނީ އޭޕްރީލް މަހުގެ 23 ވަނަ ދުވަހުން ފެށިގެން މެއި މަހުގެ ފަސްވަނަ ދުވަހުގެ ނިޔަލަށް ބޭއްވުނު ޓްރަޔަލުގެ ނަތީޖާއަށް ބަލައިގެންނެވެ.
އެގޮތުން ޓްރަޔަލުގައި އިމްއާނަށް ވަނީ 3،140 ޕޮއިންޓް ލިބިފައެވެ. ދެން އޭނާއާ ވާދަކުރި މުބާލަށް ލިބިފައިވަނީ 3،024 ޕޮއިންޓެވެ. މީގެ އިތުރުން އޮލިމްޕިކްސްއިން ސައުސަން ޖާގަ ހޯދީ ޓްރަޔަލުގައި 2،997 ޕޮއިންޓް ހަމަކޮށްގެންނެވެ. އަންހެން ބައިގައި ދެން ވާދަކުރި ސާޖިނާއަށް ލިބިފައިވަނީ 2،905 ޕޮއިންޓެވެ.
އެކަމަކު އާދީއްތަ ދުވަހު ސްވިމިން އެސޯސިއޭޝަނުން ނެރުނު ބަޔާނެއްގައި ބުނެފައިވަނީ ޓްރަޔަލްތަކުގެ ނަތީޖާއަށް ބަލައި އިއްމާނާއި ސައުސަންގެ ނަން އޮލިމްޕިކް ކޮމިޓީ އާއި ފީނާއަށް ފޮނުވައި، އޮލިމްޕިކްސްގައި ރާއްޖެ ތަމްސީލްކުރާނީ އެ ދެ ފެތުންތެރިން ކަމުގައި ކަނޑައެޅިއެވެ. އެކަމަކު އެއީ އޮލިމްޕިކްސްއަށް ކޮލިފައިނުވާ ގައުމުތަކުގެ ފެތުންތެރިން ހޮވުމުގައި އަމަލުކުރާނީ ފީނާގެ ގަވާއިދުގައި އޮންނަގޮތުން އެ ފެޑެރޭޝަނުގެ ރޭންކިންއަށް ބަލައި، އެންމެ މަތިން ޕޮއިންޓް ހޯދާފައިވާ ފެތުންތެރިންނަށް ފުރުސަތު ދޭ ގޮތަށް ކަމަށް މިިދިޔަ މަހު 25 ވަނަ ދުވަހު ފީނާއިން އެންގި ކަމަށްވެސް ވަނީ ބުނެފައެވެ.
އެހެންކަމުން އެހާ ވަގުތު ކުޑަތަން ވެފައި ވަނިކޮށް ފީނާގެ ނިންމުން އެހެން ގޮތަކަށް ބަދަލުކުރުމުން، ރާއްޖެއިން ފެތުންތެރިން ނެގުމުގައި އަމަލުކޮށްފައިވާ އުސޫލަކީ އޭޕްރީލް މަހުގެ 14 ވަނަ ދުވަހު ފީނާއިން އެންގި އެންގުމާ އެއްގޮތަށް ކުރިއަށް ގެންދިޔަ ކަމެއް ކަމަށް އެ ފެޑެރޭޝަނަށް އަންގާފައިވާނެ ކަމަވެސް ވަނީ ބުނެފައެވެ. އަދި އޮލިމްޕިކްސް ފަދަ ބޮޑު މުބާރާތެއްގައި ރާއްޖެ ތަމްސީލުކުރާ ފެތުންތެރިން އިއުލާނުކޮށް، އެ ފެތުންތެރިން ވާދަކުރާ އިވެންޓުތަކަށް ތަމްރީނު ހަދަމުން ދަނިކޮށް ފެތުންތެރިން ބަދަލުވުމަކީ ފެތުންތެރިންނާއި ކޯޗުންނާއި އާއިލާތަކުން އަދި އެސޯސިއޭޝަންގެ ކަންބޮޑުވުން އިންތިހާއަށް އޮތް ކަމެއް ކަމަށް ފީނާއަށް އަންގާފައިވާނެ ކަމަށްވެސް ސްވިމިން އެސޯސިއޭޝަނުގެ ބަޔާނުގައި ވަނީ ބުނެފައެވެ.
އެކަމަކު ސްވިމިން އެސޯސިއޭޝަނުން އެ ގޮތަށް ފީނާއަށް އެންގި ނަމަވެސް، އޮލިމްޕިކްސްއަށް ކޮލިފައިނުވާ ފެތުންތެރިން ބައިވެރިކުރަން ގައުމުތަކަށް ފުރުސަތު ދޭނީ ފީނާގެ އުސޫލުގައިވާ ގޮތަށް ރޭންކިންއަށް ބަލައިގެން ކަމަށާއި، ކުރިން ވަކިގޮތަކަށް އެންގިފައި އޮތް ނަމަވެސް އެ ގޮތަށް ނުބަލަން ފީނާއިން ނިންމާފައިވާ ކަމަށް ސްވިމިން އެސޯސިއޭޝަނުން ބުނެއެވެ.
އެހެންކަމުން ފީނާ ރޭންކިންއަށް ބަލައި އޮލިމްޕިކްސްގެ ފުރުސަތު ސާޖިނާ އާއި މުބާލަށް ދިނުމަށް ސްވިމިން އެސޯސިއޭޝަނުން ވަނީ ނިންމާފައެވެ. އޮލިމްޕިކްސްގައި މުބާލް ވާދަކުރާނީ 100 މީޓަރު ފްރީސްޓައިލް އިވެންޓުގައެވެ. އަދި ސާޖިނާ ވާދަކުރާނީ 200 މީޓަރު ބްރެސްޓްސްޓްރޯކް އިވެންޓުގައެވެ. މި ދެ ފެތުންތެރިންނަކީ އޮލިމްޕިކް ސްކޮލަޝިޕުގެ ދަށުން ރާއްޖެއިން ބޭރުގައި މަތީ ތައުލީމާއެކު ތަމްރީނު ހެދުމުގެ ފުރުސަތު އިންޓަނޭޝަނަލް އޮލިމްޕިކް ކޮމިޓީން ދިނުމުން، ރާއްޖޭން ބޭރުގައި ތަމްރީނު ހަދަމުންދާ ދެ ފެތުންތެރިންނެވެ.
މި އަހަރުގެ ޖުލައި މަހު ޓޯކިއޯ އޮލިމްޕިކްސް ބާއްވާއިރު، މިއީ މިދިޔަ އަހަރުގެ ގޭމްސްއެވެ. އެކަމަކު ކޮވިޑް-19 ގެ ސަބަބުން އޮލިމްޕިކްސް ފަސްކުރިއިރު، މިހާރު ވަނީ މި އަހަރުގެ ޖުލައި މަހުގެ 23 ވަނަ ދުވަހުން ފެށިގެން އޮގަސްޓް މަހުގެ އަށްވަނަ ދުވަހުގެ ނިޔަލަށް އޮލިމްޕިކްސް ބާއްވަން ތާވަލުކޮށްފައެވެ.
