މޯލްޑިވްސް ސްޕޯޓްސް އެވޯޑްސް 2022: އޮލިމްޕިކް ގޯލްޑް މެޑަލިސްޓް ސާރާ ބައިވެރިވާނެ
ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވޭ
އޮލިމްޕިކް ގޯލްޑް މެޑަލިސްޓް ސާރާ ޝިޔޯސްޓްރޯމް
ކުޅިވަރާއި ބެހޭ ވުޒާރާއިން މި މަހުގެ 17 ވަނަ ދުވަހު ބޭއްވުމަށް ނިންމާފައިވާ މޯލްޑިވްސް ސްޕޯޓްސް އެވޯޑްސް 2022 ގައި އޮލިމްޕިކްސްގެ ގޯލްޑް މެޑަލިސްޓް ސާރާ ޝިޔޯސްޓްރޯމް ބައިވެރިވާނެކަމަށް ކުޅިވަރާއި ބެހޭ ވަޒީރު އަހުމަދު މަހުލޫފު ވިދާޅުވެއްޖެއެވެ.
މިނިސްޓަރ ކުރެއްވި ޓްވީޓެއްގައި ސާރާއަށް ދިން ދައުވަތު ގަބޫލުކޮށް، މިއަހަރުގެ ސްޕޯޓްސް އެވޯޑްސްގައި ބައިވެރިވުމަށް ނިންމުމުން އެކަމަށް ޝުކުރު އަދާކުރައްވާފައިވެއެވެ. ރާއްޖޭގެ ކުޅިވަރު ދާއިރާގައި އުޅޭ ފަރާތްތަކުގެ އަގުވަޒަންކުރުމަށް ބާއްވާ މޯލްޑިވްސް ސްޕޯޓްސް އެވޯޑްސް އަކީ ދުނިޔޭގެ ނިސްބަތުން ބެލިޔަސް ފެންވަރު ރަނގަޅު އިވެންޓަކަށް ހަދައި އަހަރަކު އެއް ފަހަރު މި އިވެންޓް ބޭއްވުމަކީ އެންމެ ބޮޑު ބޭނުން ކަމަށް މީގެ ކުރިންވެސް މިނިސްޓަރ ވަނީ ވިދާޅުވެފައެވެ. އަދި ސްޕޯޓްސް އެވޯޑްސް އިތުރަށް ފުރިހަމަކުރުމައްޓަކައި ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ ކަމަށްވެސް ވިދާޅުވިއެވެ.
ސްވިޑްންގެ ފެތުންތެރިޔާ ސާރާއަކީ ދުނިޔޭގެ ފެންވަރުގައި ބާއްވާ ފެތުމުގެ ބޮޑެތި މުބާރާތްތަކުގައި ރަންވަނަ ހާސިލްކޮށްފައިވާ ކާމިޔާބު އެތުލީޓެކެވެ. އެގޮތުން ސާރާ ވަނީ ވޯލްޑް ޗެމްޕިއަންޝިޕްގައި 14 ރަން މެޑަލް ކާމިޔާބު ކުރުމުގެ އިތުރުން ޔޫރަޕިއަން ޗެމްޕިއަންޝިޕްގައި 26 ރަން މެޑަލް ހާސިލްކޮށްފައެވެ. މިވަގުތު 50 މީޓަރު އަދި 100 މީޓަރުގެ ފްރީސްޓައިލް އާއި ބަޓަފްލައި ކެޓަގަރީގެ ދުނިޔޭގެ ރެކޯޑުވެސް އޮތީ ސާރާ އަތުގައެވެ.
މޯލްޑިވްސް ސްޕޯޓްސް އެވޯޑްގެ ބްރޯޑްކާސްޓިންގ މީޑިއާ ޕާޓްނަރަކަށް ހަމަޖައްސައިފައިވަނީ ރާއްޖެ ޓީވީއެވެ. އަދި އޮންލައިން މީޑިއާ ޕާޓްނަރަކީ އަދަދު ނޫހެވެ. އެހެންކަމުން ރާއްޖެ ޓީވީ އިން މޯލްޑިވްސް ސްޕޯޓްސް އެވޯޑްގެ އެންމެ ފަހުގެ އަޕްޑޭޓްތައް އާންމުންނާއި ހަމަޔަށް ގެނަސްދޭނެއެވެ.
