ރާއްޖޭ ކަނޑުގެ ލޮނުގަނޑު އުފުލެމުންދާތީވޭ ކަންބޮޑުވޭ، އަވަސް ހައްލެއް ބޭނުން: ސިންގަޕޫރް
3 ސެޕްޓެމްބަރު 2019 | އަންގާރަ 17:26ޕެރިސް އެގްރީމެންޓަށް އަމަލުކުރަން ޖެހޭ
ސިންގަޕޫރްގެ ފޮރިން މިނިސްޓަރު ބާލަ ކްރިޝްނަން
ރާއްޖޭގެ ކަނޑުގެ ލޮނުގަނޑު އުފުލެމުންދާތީވެ އެކަމާއިމެދު ކަންބޮޑުވާކަމަށާއި، އަވަސް ހައްލެއް ހޯދަން ޖެހޭ ކަަމަށް ސިންގަޕޫރްގެ ފޮރިން މިނިސްޓަރު ވިވިއަން ބާލަކްރިޝްނަން ވިދާޅުވެއްޖެއެވެ.
އެމަނިކުފާނު އެހެން ވިދާޅުވީ، އަންގާރަ ދުވަހު ފެށި އިންޑިއަން އޯޝަން ކޮންފަރެންސް ގައި ވާހަކަދައްކަވަމުންނެވެ.
އެ ރަސްމިއްޔާތުގައި ވާހަކަ ދައްކަވަމުން ސިންގަޕޫރުގެ ފޮރިން މިނިސްޓަރު ވިދާޅުވީ، މޫސުމަށް އަންނަ ބަދަލުތަކުގެ ސަބަބުން އިންޑިއާ ކަނޑުގެ ސަރަހައްދު ހޫނުވެ ކަނޑުގެ ލޮނުގަނޑު އުފުލި މުރަކަތަށް ހަލާކުވަމުންދާ ކަމަށެވެ. ކޮންމެ އަހަރަކުވެސް ހޫނުމިން މަތިވަމުންދާ ކަމަށާއި، އެކަމުގެ ސަބަބުން ކަނޑުގެ ދިރުންތަކަށް އަސަރުކޮށް ކަނޑުގެ މަސްތައް މަދުވަމުންދާކަން އެމަނިކުފާނު ފާހަގަކުރެއްވިއެވެ. ދިވެހިރާއްޖެ އަކީ ދުނިޔޭގެ އެންމެ ރީތީ މުރަކަތަށް ހުރި ގައުމަށްވާއިރު ރާއްޖޭގެ މުރަކަތަށް ހަލާކުވެގެންދާތީވެ އެކަމާއި މެދު ކަންބޮޑުވުން ފާޅުކުރެއްވިއެވެ.
ރާއްޖެއަކި ދުނިޔޭގެ އެންމެ ތިރި ގައުމަށްވާއިރު، ކަނޑުގެ ލޮނުގަނޑު މަތިވަމުންދާ ވަރަކަށް ރާއްޖޭގެ ބޮޑު ބައެއް އަޑިއަށްދާނެ ކަމަށާއި، ގަރުނު ނިމޭއިރު 80 ޕަސެންޓް ކަނޑު އަޑިއަށް ހިނގާދާނެ ކަމަށް ބާލަކްރިޝްނަން ވިދާޅުވިއެވެ. އެކަމާއި މެދު ކަންބޮޑުވުން ފާޅުކުރައްވަމުން ބާލަކްރިޝްނަ ވިދާޅުވީ، މިހާރު މިހާރަށް ފިޔަވަޅު އަޅަން ޖެހޭ ކަމަށާއި، ޕެރިސް އެގްރީމެންޓަށް އަމަލުކުރުން މުހިއްމު ކަމަށް ވިދާޅުވިއެވެ.
މޫސުމީ ބަދަލަށް ހައްލެއް ބޭނުންވާ ކަމަށް ބާލަކްރިޝްނަން ވިދާޅުވެފައިވާިއރު، ދުނިޔޭގެ މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ދިމާވާ ކަންތައްތަކަށް ހައްލެއް ބޭނުންވާ ކަމަށް ކަމަށް ފޮރިން މިނިސްޓަރު އަބްދުﷲ ޝާހިދު ވަނީ އދ. ގައި ތަގްރީރު ކުރައްވަމުން ވިދާޅުވެފައެވެ.
