އިންޓަ ދޫކޮށް އިކާޑީ ޕީއެސްޖީއަށް ބަދަލުވެއްޖެ

އިންޓަ މިލާން ދޫކޮށް އެ ކްލަބަށް ކުޅެމުން އައި ސްޓްރައިކަރ މައުރޯ އިކާޑީ ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވެއްޖެއެވެ.

އުމުރުން 26 އަހަރުގެ އިކާޑީ ޕީއެސްޖީއަށް ލޯން އެއްބަސްވުމެއްގެ ދަށުން ބަދަލުވެފައިވާއިރު، އޭނާގެ އެއްބަސްވުން ދާއިމީ ކުރަން ބޭނުންވާނަމަ 65 މިލިއަން ޔޫރޯ ހަރަދުކުރަން ޕީއެސްޖީ ޖެހޭނެއެވެ.

އިކާޑީ ޕީއެސްޖީއަށް ބަދަލުވުމުގެ ކުރިން އޭނާ ވަނީ އިންޓައާއެކު ހަދާފައިވާ އެއްބަސްވުން 2022 ވަނަ އަހަރުގެ ނިޔަލަށް އާކޮށްފައެވެ.

އިކާޑީ ޕީއެސްޖީއަށް ބަދަލުވީ އޭނާ ހޯދުމަށް ގިނަ ކްލަބްތަކުން މަސައްކަތް ކުރަމުންދިޔަ ދަނޑިވަޅެއްގައެވެ. އޭނާ ހޯދުމަށް ރެއާލް މެޑްރިޑްގެ އިތުރުން ޗެލްސީ އާއި ޔުވެންޓަސް އަދި ނަޕޯލީންވެސް ވަނީ މަސައްކަތް ކޮށްފައެވެ.

ސަމްޕްޑޯރިއާއިން ސީނިއާ ކެރިޔަރު ފެށި އިކާޑީ އިންޓައާ ގުޅުނީ 2013 ވަނަ އަހަރެވެ. އޭނާ ވަނީ މިހާތަނަށް އިންޓައަށް ކުޅުނު 219 މެޗުގައި 214 ލަނޑު ކާމިޔާބުކޮށްފައެވެ.އިކާޑީ ވަނީ އާޖެންޓީނާ ގައުމީ ޓީމަށް މިހާތަނަށް 8 މެޗު ކުޅެފައެވެ. އޭނާ ވަނީ އިޓާލިއަން ލީގުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު އެއްފަހަރު ހޯދާފައެވެ.

އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ، އިކާޑީ ވަނީ ފާއިތުވެދިޔަ ދެ ސީޒަނުގައި ވެސް އިޓަލީ ލީގުގައި މޮޅު ކުޅުމެއް ދައްކާފައެވެ.