ރިލްވާންގެ ތަހުގީގަށް ހުރަސްއެޅި ދައުލަތުގެ އިސްވެރިންނަށް ފިޔަވަޅު އަޅަންޖެހޭ: އާއިލާ
2 ސެޕްޓެމްބަރު 2019 | ހޯމަ 12:54ތަހްގީގަށް ހުރަސް އަޅާފައިވާ ސަރުކާރާއި މެދު ފިޔަވަޅު އަޅަން ޖެހޭ
ރިލްވާނަށް އިންސާފު ހޯދައިދިނުމަށް މީގެކުރިން ބޭއްވުނު ހިނގާލުމެއްގެ ތެރެއިން ރިލްވާންގެ އާއިލާގެ ބައެއް މެމްބަރުން
މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާން އަބްދުﷲގެ ތަހުގީގަށް ހުރަސްއެޅި ދައުލަތުގެ އިސްވެރިންނަށް ފިޔަވަޅު އަޅަން ޖެހޭކަމަށް ގަބޫލުކުރާކަމަށް ރިލްވާންގެ އާއިލާއިން ބުނެފި އެވެ.
ރިލްވާންގެ އާއިލާއިން ނެރުނު ބަޔާނެއްގައި ބުނެފައިވަނީ އެ އާއިލާގެ އުންމީދަކީ އާދީއްތަ ދުވަހުގެ މެންދުރު މަރާލަފައިވާ މިހުންނާއި ގެއްލުވާލައިފައިވާ މީހުންގެ މައްސަލަތައް ތަހުގީގުކުރާ ކޮމިޝަނުން ކުށުގެ ތުހުމަތުގައި ޝާމިލްވާކަމަށް ފާހަގަކޮށްފައިވާ މީހުންނާއި މެދު ލަސްނުކޮށް ގާނޫނުގެ ދަށުން ފިޔަވަޅު އެޅުންކަމަށެވެ. އަދި ރިލްވާން ގެއްލުވާލުމާއި، އެކަންރާވައި، ހަރަދު ހިންގި ފަރާތްތައް ފިލައިގެން ދެވެން އޮތް ހުރިހާ ދޮރުތަކެއް ބަންދުކޮށް، ފުރިހަމަ ޖިނާއީ ތަހްގީގަކަށް ފަހު އިންސާފުގެ ކުރިމައްޗަށް ގެނައުން ކަމަށް އައިލާން ބުންޏެވެ.
ރިލްވާން ގެއްލުވާލުމުގެ މައްސަލަ ތަހްގީގުކުރަމުން ގެންދިޔައިރު އެ ތަހްގީގަށް ހުރަސް އަޅާފައިވާ ސަރުކާރާއި، ދައުލަތުގެ އިސްވެރިންނާއި މެދު ގާނޫނީ ފިޔަވަޅު އަޅަން ޖެހޭ ކަމުގައި ގަބޫލުކުރާކަމަށްވެސް އައިލާގެ އެ ބަޔާނުގައި ބުނެފައިވެއެވެ.
ބަޔާނުގައި އިތުރަށް ބުނެފައިވަނީ ރިލްވާން ގެއްލުވާލުމުގެ ފަހަތުގައި ފޮރުވިފައިވާ ކަންތައްތަކުގެ ތަފްސީލު އާއިލާއިން އަޑު އެހީ ނުހަނު ފުން ހިތާމައާއިއެކު ކަމަށާއި ރިލްވާނަށް އިންސާފު ހޯދުމަށް މަސަތްކަތްކުރީ އިތުރު އާއިލާއަކަށް މިފަދަ ހިތާމައެއް ބަރުދާސްތުކުރަން ނުޖެހޭނެކަން ކަށަވަރުކުރުމަށްކަމަށެވެ. އަދި ރިލްވާނަށް އިންސާފު ނުލިބި ފާއިތުވަމުންދާ ކޮންމެ ދުވަހަކުން ފެނި ހާމަވެގެންދަނީ މި ރާއްޖޭގައި ދިރިއުޅޭ މީހުންނަށް ރާއްކައުތެރިކަން ފޯރުކޮށްދިނުމަށް ދައުލަތް ނުކުޅެދިފައިވާކަމަށެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި މަރުތަކާއި، ގެއްލުވާލައިފައިވާ މީހުންގެ މައްސަލަތައް ބަލާ ކޮމިޝަނުން ބުނެފައިވަނީ އޭނާ މަރާލައިފައިވާކަމަށެވެ. އަދި މަރާލިގޮތާއިމެދު ބައެއް ފަރާތްތަކުގެ ވާހަކަތަކުގައި ފުށުއެރުންތަކެއް އުޅޭކަމަށާއި، މަރާލީ ދަލެއް އޮޅުމަށްފަހުގައިކަމަށް ބައެއް ފަރާތްތަކުން ބުނެފައިވާކަމަށް ކޮމިޝަނުން ބުންޏެވެ.
