ޖަޕާނުގައި އޮންނަ ވޯލްޑް ސަރފިންގ ގޭމްސްގައި ވާދަކުރާ ރާޅާ އެޅުންތެރިން ޖަޕާނަށް ދިޔުމަށް ފުރައިފިއެވެ.

ސެޕްޓެމްބަރ ހަތަކުން 14 އަށް ކުރިޔަށްދާ މި މުބާރާތުގައި ރާއްޖޭގެ ހަތަރު ރާޅާ އެޅުންތެރިން ބައިވެރިވާއިރު މި މުބާރާތުގައި ދުނިޔޭގެ 55 ގައުމަކުން 250 ސަރފަރުން ވާދަކުރާނެއެވެ.

މި މުބާރާތުގައި ވާދަކުރާ ރާއްޖޭގެ ރާޅާ އެޅުންތެރިންނަކީ:-

1. ހުސެއިން އަރީފް (ކެޕްޓަން) / ރ. ރަސްމާދޫ

2. އިސްމާއީލް ރަޝީދު / ގދ. ގައްދޫ

3. އަހްމަދު އާގިލް / ކ. ތުލުސްދޫ

4. ހަސަން ނާސިހް / ކ.ތުލުސްދޫ

ރާއްޖޭގެ ސާރފިންގ ޓީމުގެ ކެޕްޓަން ހުސެއިން އަރީފް ބުނީ މި މުބާރާތައް ރާއްޖޭގެ ޓީމުން ކަނޑައަޅައިފައިވާ ޓާރގެޓަކީ 2020 ވަނަ އަހަރު އޮންނަ އޮލިމްޕިކް ގޭމްސްއަށް ކޮލިފައިވުން ކަމަށެވެ. މީގެ އިތުރުން އޭނާ ބުނީ މި މުބާރާތުގެ ސަބަބުން ރާއްޖޭގެ ރާޅާ އެޅުންތެރިން މިވަގުތު ތިބި ހިސާބު ދަނެގަނެވޭނެ ކަމަށެވެ.

ރާއްޖޭގެ ޓީމުގެ އާގިލް ބުނީ މި މުބާރާތުގައި ބައިވެރިވުން މިއީ އޭނާ ކުރި ދިގު އިންތިޒާރެއް ކަމަށާއި މި މުބާރާތުގެ ދެވަނަ ބުރަށް ދިޔުމަކީ ވެސް އޭނާ އަށް ލިބޭ ކުރި އެރުމެއް ކަމަށެވެ. މީގެ އިތުރުން އޭނާ ވަނީ ރާއްޖޭގައި ރާޅާ އެޅުން ކުރިއެރު ވުމަށް ވައިޑީޕީ ޕްރޮގްރާމެއް އޮތުން މުހިންމުކަމަށް ވެސް ބުނެފައެވެ.

މި މުބާރާތަކީ ދުނިޔޭގެ މިވަގުތު ތިބި އެންމެ މޮޅު ރާޅާ އެޅުންތެރިން ވާދަކުރާ މުބާރާތެކެވެ. އެގޮތުން މި މުބާރާތުގައި، ދުނިޔޭގެ ޗެމްޕިއަންކަން 11 ފަހަރު ހޯދައިފައިވާ އެމެރިކާގެ ކެލީ ސްލޭޓަރ އަދި ދުނިޔޭގެ ޗެމްޕިއަންކަން ދެ ފަހަރު ހޯދައިފައިވާ ބްރެޒިލްގެ ގެބްރިއެލް މެޑީނާ ވާދަކުރާނެއެވެ.