ހާޝިމް ގަވަރުނަރު ކަމަށް އައްޔަން ކުރުމަށް ކޮމިޓީން ރުހުން ދީފި
ނަން ފޮނުއްވާފައިވަނީ ރައީސް ސޯލިހު
މަޖިލީހުގެ މާލި ކޮމިޓީގައި އަލީ ހާޝިމް
ހުސްވެފައިވާ ދިވެހިރާއްޖޭގެ މަރުކަޒީ ބޭންކް (އެމްއެމްއޭ) ގެ ގަވަރުނަރު ކަމަށް އަލީ ހާޝީމް އައްޔަން ކުރުމަށް ފެންނަ ކަމަށް ރައްޔިތުންގެ މަޖިލީހުގެ މާލިއްޔަތު ކޮމީޓީން ފާސްކޮށްފިއެވެ.
އާދިއްތަ ދުވަހު ބޭއްވި މާލިއްޔަތު ކޮމިޓީ އަށް ހާޝިމް ވަނީ ހާޒިރު ކޮށްފައެވެ. އޭނާއާ ސުވާލު ކުރެއްވުމަށް ފަހު ގަވަރުނަރުކަމުގެ މަގާމަށް އައްޔަން ކުރުމަށް ކޮމިޓީގެ ހުރިހާ މެމްބަރުންގެ އިއްތިފާގުން ފާސްކޮށް ތަޅުމަށް ރިޕޯޓް ހުށައެޅުމަށް ވަނީ ނިންމާފައެވެ.
ހާޝިމްގެ ނަން ދިރާސާ ކުރުމަށް، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މާލިއްޔަތު ކޮމިޓީއަށް ފޮނުއްވާފައިވަނީ ނިމިގެންދިޔަ ހަފްތާގައެެވެ.
އޭނާ އަކީ މީގެ ކުރިން ރައީސް ނަޝީދުގެ ވެރިކަމުގައި ފިނޭންސް މިނިސްޓަރު ކަމުގެ މަގާމު ފުރުއްވާފައިވާ ބޭފުޅެކެވެ. އެމްއެމްއޭއަށް ގަވަރުނަރު ކަމުގެ މަގާމު ހުސްކޮށް އޮންނަތާ މަހަކަށް ވުރެ ގިނަ ދުވަސް ވެއްޖެއެވެ.
އައު ގަވަރުނަރަލު އައްޔަން ކުރުމަށް ނަން ފޮނުވާފައިވަނީ ކުރިން އެ މަގާމުގައި ހުންނެވި އަލީ ނަސީރު ޖުލައި މަހު އިސްތިއުފާ ދެއްވުމާއި ގުޅިގެންނެވެ.
