ލޯން އެއްބަސްވުމެއްގެ ދަށުން ސަންޗޭޒް އިންޓައަށް ބަދަލުވެއްޖެ

ލޯން އެއްބަސްވުމެއްގެ ދަށުން މެންޗެސްޓަރ ޔުނައިޓެޑަށް ކުޅެމުން އަންނަ ޗިލީގެ ފޯވާޑް އެލެކްސަސް ސަންޗޭޒް އިންޓަ މިލާނަށް ބަދަލުވެއްޖެއެވެ.

އަންނަ އަހަރުގެ ޖޫން މަހުގެ ނިޔަލަށް ލޯން އެއްބަސްވުމެއްގެ ދަށުން ސަންޗޭޒް އިންޓައަށް ބަދަލުވެފައިވާއިރު، އޭނާ ވަނީ އިންޓަގެ ކުޅުންތެރިޔެއްގެ ގޮތުން ރަސްމީކޮށް ދައްކާވެސްލާފައެވެ.

އިންޓައަށް ސަންޗޭޒް ބަދަލުވެފައިވާއިރު، އޭނާއާއެކު ޔުނައިޓެޑަށް ކުޅުނު ރޮމެލޫ ލުކާކޫ ވަނީ 74 މިލިއަން ޕައުންޑުގެ އަގަކަށް ދާދި ފަހުން އިންޓައަށް ބަދަލުވެފައެވެ.

މިދިޔަ އަހަރުގެ ޖެނުއަރީ މަހު އަހަރަކު 14 މިލިއަން ޕައުންޑު މުސާރައިގެ ގޮތުގައި ލިބޭ ގޮތަށް ސަންޗޭޒް ޔުނައިޓެޑަށް ބަދަލުވީ ހަތަރު އަހަރުގެ އެއްބަސްވުމެއްގެ ދަށުންނެވެ. އެގޮތުން އޭނާގެ އެއްބަސްވުން ހަމަވާނީ 2022 ވަނަ އަހަރެވެ.

މީގެ ކުރިން ބާސާ އަށް ވެސް ކުޅެފައިވާ ސަންޗޭޒް ވަނީ އެ ކްލަބާ އެކު ވެސް ގިނަ ކާމިޔާބީތައް ހޯދާފައެވެ. ބާސާގައި ކާމިޔާބީތައް ހޯދުމަށް ފަހު ސަންޗޭޒް ބަދަލުވީ އާސެނަލަށެވެ.

ސަންޗޭޒް ވަނީ އާސެނަލް އަށް ކުޅުނު 166 މެޗުގައި 80 ލަނޑު ކާމިޔާބު ކޮށްފައެވެ. އާސެނަލް ދޫކޮށް ސަންޗޭޒް ޔުނައިޓެޑަށް ބަދަލުވެފައި ވާއިރު، އޭނާ ވަނީ މިހާތަނަށް ޔުނައިޓެޑަށް ކުޅުނު 45 މެޗުގައި ފަސް ލަނޑު ކާމިޔާބު ކޮށްފައެވެ.

ޗިލީގެ ގައުމީ ޓީމަށް ކުޅުނު 130 މެޗުގައި 43 ލަނޑު ކާމިޔާބު ކޮށްފައިވާ ސަންޗޭޒް ވަނީ އެ ޓީމާއެކު ކޮޕާ އެމެރިކާ ކާމިޔާބު ކޮށްފައެވެ.