ލޯން އެއްބަސްވުމެއްގެ ދަށުން ސްމޯލިން ރޯމާއަށް ބަދަލުވަނީ

ލޯން އެއްބަސްވުމެއްގެ ދަށުން މެންޗެސްޓަރ ޔުނައިޓެޑަށް ކުޅެމުން އަންނަ އިނގިރޭސި ޑިފެންޑަރ ކްރިސް ސްމޯލިން ރޯމާއަށް ބަދަލުވާން އުޅޭ ކަމަށް ރިޕޯޓްތައް ބުނެފިއެވެ.

އިޓަލީގެ ނޫސްތަކުން ބުނީ، ލޯން އެއްބަސްވުމެއްގެ ދަށުން އުމުރުން 29 އަހަރުގެ ސްމޯލިން ރޯމާއަށް ބަދަލުވާން އެއްބަސްވެފައިވާ ކަމަށާއި، އޭނާ އެ ކްލަބަށް ބަދަލުވަނީ ތިން މިލިއަން ޔޫރޯގެ އަގަކަށް ކަމަށެވެ.

މި ސީޒަނަށް އަމާޒުކޮށް ލެސްޓާ ސިޓީގެ ޑިފެންޑަރ ހެރީ މެގުއާ ޔުނައިޓެޑަށް ގެނައުމާއެކު، ސްމޯލިންއަށް ފުރަތަމަ އެގާރައިން ޖާގަ ލިބުން ވަނީ ދަތިވެފައެވެ. އަދި އޭނާ މި ސީޒަނުގައި ޔުނައިޓެޑަށް މެޗެއްވެސް ކުޅެފައެއް ނުވެއެވެ.

ޔުނައިޓެޑާއެކު ސްމޯލިން ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، ރޯމާގެ އިތުރުން އެހެން ކްލަބްތަކުންވެސް އަންނަނީ އޭނާ ހޯދުމަށް މަސައްކަތް ކުރަމުންނެވެ.

ފުލަމް އިން 2008 ވަނަ އަހަރު ކެރިޔަރު ފެށި ސްމޯލިން ޔުނައިޓެޑަށް ބަދަލުވީ 2010 ގައެވެ. އޭނާ ވަނީ މިހާތަނަށް އެޓީމަށް ކުޅުނު 323 މެޗުގައި 18 ލަނޑު ކާމިޔާބުކޮށްފައެވެ.

ސްމޯލިން ވަނީ ޔުނައިޓެޑާ އެކު ދެ ޕްރިމިއާ ލީގު، ތިން ޔުއެފާ ކޮމިއުނިޓީ ޝިލްޑް، އެފްއޭ ކަޕް، ލީގު ކަޕް އަދި ޔޫރޮޕާ ލީގު ކާމިޔާބުކޮށްފައެވެ.

އިންގްލޭންޑްގެ ޒުވާން ޓީމުތަކަށް ކުޅެފައިވާ ސްމޯލިން ވަނީ އިންގްލޭންޑްގެ ސީނިއާ ޓީމަށް 31 މެޗު ކުޅެފައެވެ.