ޕެރިސް ސެއިންޓް ޖާމަން (ޕީއެސްޖީ) ގެ ހުށަހެޅުމަށް ޔުވެންޓަސްއަށް ކުޅެމުން އަންނަ ކްރޮއޭޝިއާގެ ފޯވާޑް މާރިއޯ މަންޒުކިޗް ފުރަގަސްދީފިއެވެ.

އިޓަލީގެ ނޫސްތަކުން ބުނީ، މި ޓްރާންސްފާ ބާޒާރުގައި މަންޒުކިޗް ހޯދުމަށް ޕީއެސްޖީން ހުށަހެޅި ހުށަހެޅުމަށް އޭނާ ފުރަގަސްދީފައިވާ ކަމަށާއި، އޭނާ ބޭނުންވަނީ ޔުވެންޓަސްގައި މަޑުކުރަން ކަމަށެވެ.

މިއަހަރުގެ އެޕްރީލް ޔުވެންޓަސްއާއެކު ހަދާފައިވާ އެއްބަސްވުން މަންޒުކިޗް އާކޮށްފައިވާއިރު، އޭނާ އެ ކްލަބުގައި 2021 ވަނަ އަހަރުގެ ނިޔަލަށް މަޑުކުރަން ޖެހޭނެއެވެ.

ނަމަވެސް ބައެއް ރިޕޯޓްތައް ބުނާގޮތުން މަންޒުކިޗް ބޭނުންވަނީ މި ޓްރާންސްފާގައި ނުވަތަ ކުރިޔަށް އޮތް ޖެނުއަރީ ޓްރާންސްފާގައި ޔުވެންޓަސް ދޫކޮށް، އެހެން ކްލަބަކަށް ބަދަލުވާށެވެ.

ޑައިނަމޯ ޒަގްރެބް އިން 2007 ވަނަ އަހަރު ކެރިއަރު ފެށި މަންޒުކިޗް ވަނީ ވުލްފްސްބާގް އާއި ބަޔާން މިއުނިކް އަދި އެތުލެޓިކޯ މެޑްރިޑަށް ވެސް ކުޅެފައެވެ. އޭނާ ޔުވަންޓަސް އަށް ބަދަލުވީ 2015 ވަނަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 162 މެޗުގައި 44 ލަނޑު ކާމިޔާބުކޮށްފައެވެ.

ނިމިގެންދިޔަ ފީފާ ވޯލްޑް ކަޕްގައި މޮޅު ކުޅުމެއް ކްރޮއޭޝިއާ ޓީމަށް ދެއްކި މަންޒުކިޗް ގައުމީ ޓީމަށް ކުޅުން ހުއްޓާލާފައިވާއިރު، އޭނާ ވަނީ އެޓީމަށް ކުޅުނު 89 މެޗުގައި 33 ލަނޑު ކާމިޔާބު ކޮށްފައެވެ.