ޑިބާލާ ގެންދިޔުމަށް މަސައްކަތެއް ނުކުރަން: ޕީއެސްޖީގެ ޗެއާމަން

ޔުވެންޓަސްއަށް ކުޅެމުން އަންނަ އާޖެންޓީނާގެ ޒުވާން ފޯވާޑް ޕައުލޯ ޑިބާލާ ގެންދިޔުމަށް މަސައްކަތް ކުރަމުން ނުދާ ކަމަށް ފްރާންސްގެ ޕީއެސްޖީގެ ޗެއާމަން ނާސިރު އަލް ޚެލައިފީ ބުނެފިއެވެ.

މިދިޔަ ނޮވެމްބަރު މަހުގެ ތެރޭގައި ދިން އިންޓަވިއުއެއްގައި ޑިބާލާ ވަނީ ނޭމާއާއެކު ކުޅުމަކީ ހުވަފެނެއް ކަމަށް ބުނެފައެވެ. މިކަމުގެ ސަބަބުން ޕީއެސްޖީއިން ޑިބާލާ ގެންދިޔުމަށް މަސައްކަތް ފެށިއެވެ. ވޭތުވެދިޔަ ހަފްތާތަކުގައި ޑިބާލާގެ ފަރާތުން އެންމެ އެދެވޭ ކުޅުމެއް ފެނިފައިނުވާއިރު އޭނާ ހޯދުމަށް ޕީއެސްޖީގެ އިތުރުން ޔޫރަޕުގެ ބޮޑެތި ޓީމުތައް މަސައްކަތް ކުރަމުންދާ ކަމަށް ރިޕޯޓުތައް ބުނެއެވެ. އޭގެތެރޭގައި ސްޕެއިންގެ ގަދަ ދެ ބާރު ކަމަށްވާ ބާސެލޯނާއާއި ރެއާލް މެޑްރިޑްގެ އިތުރުން އިނގިރޭސިވިލާތުގެ މެންޗެސްޓާ ޔުނައިޓެޑް ހިމެނެއެވެ.

ނޫސްވެރިންނާއި ވާހަކަ ދައްކަމުން ޙެލައިފީ ބުނީ އިޓަލީގެ ލީގުގައި ވަރަށް ގިނައިން މޮޅު ކުޅުންތެރިން ކުޅެމުން އަންނަ ކަމަށާއި އެ ލީގުގައި ކުޅޭ ހަމައެކަނި މޮޅު ކުޅުންތެރިޔަކީ ޑިބާލާ ކަމަށް ނުބުނެވޭނެ ކަމަށެވެ. ހަމައެހެންމެ ޔުވެންޓަސްގެ ރައީސް އަންދްރެއާ އަނޭލީއަކީ ވަރަށް ގާތް އެކުވެރިޔެއް ކަމަށާއި އެހެން ނަމަވެސް ޕީއެސްޖީގެ ކުރިމަގަށް މިވަގުތު ޑިބާލާއަކީ ބޭނުން ކުޅުންތެރިޔެއް ނޫންކަން ކަނޑައެޅިގެން ބުނަން އެނގޭ ކަމަށް ޚެލާފީ ހާމަކުރިއެވެ.

މި ނޫސްވެރިންގެ ބައްދަލުވުމުގައި ޚެލާފީ ވަނީ ޕީއެސްޖީގެ ކޯޗުގެ މަގާމުގައި ހުރި އުނައި އެމެރީ އެ މަގާމުން ދުރުކޮށް އެހެން ކޯޗަކު ގެނައުމަށް އެ ޓީމުން މަސައްކަތްކުރަމުންދާ ކަމަށް ބުނެ މީޑިއާތަކުން ފަތުރާފައިވާ ރިޕޯޓުތައް ދޮގުކޮށްފައެވެ. ބައެއް މީޑިއާތަކުން ރިޕޯޓުކޮށްފައިވާ ގޮތުގައި އެމެރީއާ ބައެއް ކުޅުންތެރިންނާއި މައްސަލަ ޖެހިފައިވުމާއެކު އޭނާ އެ މަގާމުން ވަކިކުރުމަށް ޕީއެސްޖީގެ މެނޭޖްމަންޓުން ނިންމާފައިވެއެވެ. އަދި އެމެރީގެ ބަދަލުގައި ޗެލްސީގެ ކޯޗު އެންޓޯނިއޯ ކޮންޓޭ ނުވަތަ ބަޔާން މިއުނިކް އަދި ރެއާލް މެޑްރިޑްގެ ކުރީގެ ކޯޗު ކާލޯ އަންޗެލޯޓީ އެ މަގާމަށް ގެނައުމަށް އެ ޓީމުން މަސައްކަތް ކުރަމުންދާ ކަމަށް ބައެއް މީޑިއާތަކުން ބުނެއެވެ. މި ދެ ކޯޗުންނަކީ ވެސް އިޓަލީއަށް ނިސްބަތްވާ ދެ ކޯޗުންނެވެ.

މި ވާހަކަތައް ދޮގުކުރަމުން ޙެލާފީ ބުނީ އިޓަލީގެ ލީގުގައި މޮޅު ކުޅުންތެރިންގެ އިތުރުން މޮޅު ކޯޗުން ވެސް ތިބޭ ކަމަށާއި އެ ގައުމުގެ ޓީމުތަކަކީ ވެސް މޮޅެތި ޓީމުތައް ކަމަށެވެ. އެހެން ނަމަވެސް އިޓަލީގެ ކޯޗެއް މިވަގުތު ޕީއެސްޖީއަށް ބޭނުންނުވާ ކަމަށާއި އެ މަގާމުގައި އެމެރީ އަދާކުރަމުން އަންނަ ވަޒީފާއާ މެދު ވަރަށް ހިތްހަމަޖެހޭ ކަމަށް ޚެލާފީ ހާމަކުރިއެވެ.

ޑިބާލާ ހޯދުމަށް ދުނިޔޭގެ އެންމެ ބޮޑު ޓީމުތަކުން މަސައްކަތް ކުރަމުން އަންނައިރު އޭނާ ޕަލެރާމޯ ދޫކޮށް ޔުވެންޓަސްއަށް ބަދަލުވީ 2015 ވަނަ އަހަރުއެވެ. އޭނާވަނީ މިހާތަނަށް އެ ޓީމަށް ކުޅުނު 82 މެޗުގައި 42 ލަނޑު ޖަހާފައެވެ. ހަމައެހެންމެ މި ސީޒަނުގައި އެ ޓީމަށް ކުޅުނު 26 މެޗުގައި އޭނާވަނީ 15 ލަނޑު ޖަހާފައެވެ.