ލިވަޕޫލްއަށް ކުޅެމުން އަންނަ ބްރެޒިލްގެ ފޯވާޑް ރޮބާޓޯ ފިރްމީނޯއަށް އާ ކޮންޓްރެކްޓެއް ހުށަހެޅުމުގެ މަސައްކަތްކުރަމުން އަންނަ ކަމަށް އެ ޓީމުގެ ކޯޗު ޔާގަން ކްލޮޕް ބުނެފިއެވެ.

ޖަރުމަނުގެ ހޮފެންހައިމް ދޫކޮށް 2015 ވަނަ އަހަރު ލިވަޕޫލްއަށް ބަދަލުވި ފަހުން ފިރްމީނޯ އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. ޕްރިމިއާ ލީގުގައި އަދި އެހެނިހެން މުބާރާތްތަކުގައި ވެސް އޭނާ އަންނަނީ އެ ޓީމަށް ގިނަ ލަނޑުތަކެއް ޖަހައިދެމުންނެވެ. އުމުރުން 26 އަހަރުގެ ފޯވާޑް ވަނީ މި ސީޒަނުގެ މިހާތަނަށް ވެސް 13 ލަނޑު ލިވަޕޫލްއަށް ޖަހައިދީފައެވެ. ފިލިޕޭ ކުޓީނިއޯ ބާސެލޯނާއަށް ބަދަލުވުމާއި ގުޅިގެން ދެވަނަ ފަހަރަށް އެފަދަ ކަމެއް ވިޔަނުދިނުމަށް ކްލޮޕް ބޭނުންވާ ކަމަށް ރިޕޯޓުތައް ބުނެއެވެ.

ފިރްމީނޯއާ ގުޅޭގޮތުން ވާހަކަ ދައްކަމުން ކްލޮޕް ބުނީ ފާއިތުވެދިޔަ ސީޒަންތަކުގައި ދައްކާފައިވާ ކުޅުމާއި ގުޅިގެން އޭނާއަށް އާ ކޮންޓްރެކްޓެއް ހައްގުވާ ކަމަށާއި އެއީ ލިވަޕޫލްއަށް ވެސް ފައިދާހުރި ގޮތް ކަމަށެވެ. އޭނާ ބުނީ ފިރްމީނޯއަކީ ދަނޑުމަތީގައި ވަރަށް މަސައްކަތްކުރާ ކުޅުންތެރިޔެއް ކަމަށާއި ލިވަޕޫލްއަށް ބަދަލުވުމަށް ފަހު އޭނާގެ ކުޅުމުގެ ވައްޓަފާޅި ވެސް އެއްކޮށް ބަދަލުވެފައިވާ ކަމަށެވެ. ކްލޮޕް ބުނީ ލިވަޕޫލްއަށް ބަދަލުވުމާއެކު މޮޅު ކުޅުންތެރިޔެއްގެ ގޮތުގައި ފިރްމީނޯ ދުނިޔެއަށް ތައާރަފް ވެގެން ގޮސްފި ކަމަށެވެ.

ކްލޮޕް ބުނީ ޒުވާން ކުޅުންތެރިންނަށް ފުރުސަތު ދޭން ބޭނުންވާ ކަމަށާއި އެގޮތަށް ފިރްމީނޯއަކީ ވެސް އަދި ވެސް ވަރަށް ގިނަ ކަންކަން ރަނގަޅު ކުރުމުގެ ގާބިލުކަން ލިބިފައިވާ ކުޅުންތެރިޔެއް ކަމަށެވެ. ކްލޮޕް ބުނީ ފިރްމީނޯގެ ކިބައިގައި ހުރި ހުނަރު ކުރިއަރުވަން ބޭނުންވާ ކަމަށާއި އެކަން ކުރުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ. އޭނާ ބުނީ ކުޓީނިއޯ އެހެން ޓީމަކަށް ބަދަލުވުމާއެކު ފިރްމީނޯގެ މުހިންމުކަން ލިވަޕޫލްއަށް މި ސީޒަނުގައި ވަރަށް ބޮޑުވެގެން ގޮސްފި ކަމަށެވެ.

ފިރްމީނޯއާ ގުޅޭގޮތުން އިތުރަށް ވާހަކަ ދައްކަމުން ކްލޮޕް ބުނީ އޭނާއަކީ ތަފާތު ދައްކާ ކުޅުންތެރިޔެއް ކަމަށާއި ނަތީޖާ ބަދަލުކުރެވޭ ފެންވަރުގެ ކުޅުންތެރިޔެއް ކަމަށެވެ. އޭނާ ބުނީ ފިރްމީނޯ އުފުލަމުންދާ ޒިންމާތައް ވަރަށް ރަނގަޅަށް އަދާކުރަމުންދާ ކަމަށާއި ލިވަޕޫލްގެ ފޯވާޑް ލައިނުގެ އެންމެ މައި އެއް ތަނބަކީ ފިރްމީނޯ ކަމަށެވެ. ކުޓީނިއޯ ނެތްތަން އެއްވެސް ވަރަކަށް ނުދައްކާ ކަމަށާއި އެތަން ފޫބެއްދުމަށް އެންމެ ބޮޑު ހިތްވަރެއް ދައްކަމުންދާ ކުޅުންތެރިޔަކީ ވެސް ފިރްމީނޯ ކަމަށް ވެސް ކްލޮޕް ބުނެފައިވެއެވެ.

ބްރެޒިލްގެ ގައުމީ ޓީމުގައި ވެސް މުހިންމު ދައުރެއް އަދާކުރަމުން އަންނަ ފިރްމީނޯ ވަނީ ލިވަޕޫލްއަށް ކުޅުނު 128 މެޗުގައި އެ ޓީމަށް 45 ލަނޑު ޖަހައިދީފައެވެ.