ނޭމާ 170 މިލިއަން ޔޫރޯއަށް ވިއްކާލަން ޕީއެސްޖީ ތައްޔާރު
28 އޯގަސްޓު 2019 | ބުދަ 13:33ނޭމާ ހޯދުމަށް ރެއާލް އާއި ބާސާއިން އަންނަނީ މަސައްކަތް ކުރަމުން
ނޭމާ
ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ނޭމާ 170 މިލިއަން ޔޫރޯއަށް ވިއްކާލަން އެ ކްލަބް ތައްޔާރު ކަމަށް ރިޕޯޓްތައް ބުނެފިއެވެ.
ފްރާންސްގެ ނޫހަކުން ބުނީ، ނޭމާ 170 މިލިއަން ޔޫރޯއަށް ބާސެލޯނާއަށް ވިއްކާލަން ޕީއެސްޖީ އޮތީ ތައްޔާރަށް ކަމަށާއި، އެ އަގާމެދު ދެ ކްލަބުން މަޝްވަރާ ކުރަމުން އަންނަ ކަމަށެވެ.
ހޯމަ ދުވަހު ޓްރާންސްފާގެ ބާޒާރު ބަންދުވާއިރު، ނޭމާގެ ޓްރާންސްފާއަކީ މިފަހަރުގެ ޓްރާންސްފާގެ ދޮރުތައް ބަންދުވުމުގެ ކުރިން ގިނަ ބައެއްގެ ލޯތައް އަމާޒުވެފައިވާ ޓްރާންސްފާއެވެ.
އެގޮތުން ބާސާގެ އިތުރުން ރެއާލް މެޑްރިޑުންވެސް ނޭމާ ހޯދުމަށް އަންނަނީ މަސައްކަތް ކުރަމުންނެވެ. ނަމަވެސް ޕީއެސްޖީން ނޭމާ ވިއްކާލާނީ ކޮން ކްލަބަކަށް ކަމެއް އަދި ސާފެއް ނުވެއެވެ.
ބްރެޒިލްގެ ސަންޓޯސްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާއަށް ބަދަލުވީ 2013 ވަނަ އަހަރެވެ.
އެގޮތުން އޭނާ ވަނީ އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް އެޓީމާއެކު ސްޕެނިޝް ލީގު ދެފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕަރކަޕް ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕް ވެސް ކާމިޔާބު ކޮށްފައެވެ.
ނޭމާ އަންނަނީ ޕީއެސްޖީއަށް ބަދަލުވެ، އެ ކްލަބުގައި މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ އެ ކްލަބަށް މިހާތަނަށް ކުޅުނު 58 މެޗުގައި 51 ލަނޑު ކާމިޔާބު ކޮށްފައެވެ.
ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 97 މެޗުގައި 60 ލަނޑު ކާމިޔާބު ކޮށްފައެވެ. މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު ކާމިޔާބު ކޮށްފައެވެ.
