އިންފޮމޭޝަން ކޮމިޝަނަރުގެ މަޤާމަށް މަޖިލީހަށް ރައީސުލްޖުމްހޫރިއްޔާ ހުށަހަޅުއްވާފައިވަނީ 4 ބޭފުޅެއްގެ ނަންފުޅު
ރައްޔިތުންގެ މަޖިލީހުގެ ޗެމްބަރުގައި މެމްބަރުން
އިންފޮމޭޝަން ކޮމިޝަނަރުކަމުގެ މަގާމަށް އައްޔަން ކުރެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ފޮނުއްވާފައިވާ ނަންފުޅުތަކާ ގުޅޭ ގޮތުން އާންމުންގެ ޚިޔާލު ހުށަހެޅުމަށް ރައްޔިތުންގެ މަޖިލީހުން ހުޅުވާލައިފިއެވެ.
ރައްޔިތުންގެ މަޖިލީހުން ބުނީ އިންފޮމޭޝަން ކޮމިޝަނަރުގެ މަޤާމަށް އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތަކާއި ގުޅޭ ގޮތުން އެއްވެސް ފަރާތެއްގެ ޝަކުވާއެއްވާނަމަ، ސެޕްޓެމްބަރުމަހުގެ 1 ވާ އާދީއްތަދުވަހުގެ މެންދުރު 2:00 ގެ ކުރިން މަޖިލީހުގެ އިދާރާއަށް ހުށަހެޅޭނެ ކަމަށެވެ. ޝަކުވާ ހުށަހަޅަން ބޭނުންވާ އާންމުން
އެ ފަރާތެއްގެ ފުރިހަމަނަމާއި، ދާއިމީ އެޑްރެސް އަދި ގުޅޭނެ ފޯން ނަމްބަރު އެނގޭ ގޮތަށް ކޮމިޓީގެ މެއިލް އެޑްރެސްcommittee@majlis.gov.mvއަށް ނުވަތަ ރައްޔިތުންގެ މަޖިލީހުގެ އިދާރާއަށް ލިޔުމުން ފޮނުވުމަށް މަޖިލީހުގެ އިދާރާއިން ވަނީ އެދިފައެވެ.
އިންފޮމޭޝަން ކޮމިޝަނަރުކަމުގެ މަގާމަށް އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކޮށް ގޮތެއް ނިންމެވުމަށް މިނިވަން މުއައްސަސާތަކުގެ ކޮމިޓީއަށް ފޮނުއްވާފައިވަނީ 29 ޖުލައިގައި އޮތް ޖަލްސާގައެވެ.
އިންފޮމޭޝަން ކޮމިޝަނަރުގެ މަގާމް މިވަގުތު ގާނޫނީ ހުސްކަމެއްގެ ތެރޭގައެވެ. އިންފޮމޭޝަން ކޮމިޝަނަރުގެ މަގާމް ޤާނޫނީ ހުސްކަމެއްގެ ތެރެއަށް ދިޔައީ ކުރިން އެ މަޤާމުގައި ހުންނެވި ރައްޔިތުންގެ މަޖިލީހުގެ މާވަށު ދާއިރާގެ ކުރީގެ މެމްބަރު އަބްދުލް އަޒީޒު ޖަމާލު އަބޫބަކުރުގެ ދައުރުގެ މުއްދަތު ހަމަވުމުންނެވެ. އެ މަޤާމަށް އޭނާ އައްޔަންކުރީ 5 އަހަރަށް ޖޫން 22، 2014 ގައެވެ
