ފައިސާގެ އަގު ހިފެހެއްޓޭނެ ކަމުގެ ޔަގީންކަން އެބައޮތް: މިނިސްޓަރ އަމީރު
27 އޯގަސްޓު 2019 | އަންގާރަ 02:52ސަރުކާރުގެ އަމާޒަކީ ގައުމީ އުފެއްދުންތެރިކަން އިތުރުން ކަމަށް ވިދާޅުވި
ފިނޭންސް މިނިސްޓަރު އަމީރު މަޖިލީހުގައި ވަހަކަ ދައްކަވަނީ
އާ ހަރަދުތަކުން ރާއްޖޭގެ ފޮރިން އެކްސްޗޭންޖް ރިޒާވްއަށް އެއްވެސް ލޮޅުމެއް ނާންނާނެ ކަމަށާއި ފައިސާގެ އަގު ހިފެހެއްޓޭނެ ކަމުގެ ޔަގީންކަން އެބައޮތް ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
2019 ވަނަ އަހަރުގެ ބެޖެޓަށް ހަރަދުގެ ގޮތުގައި އިތުރު 1.70 ބިލިއަން ރުފިޔާ ހިމެނުމަށް ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހަޅާފައިވާއިރު އެ ބަޖެޓު މާލިއްޔަތު ކޮމިޓީގައި ދިރާސާކުރުމަށްފަހު ރިޕޯޓެއް ވަނީ އެކުލަވާލާފައެވެ. އެގޮތުން، ފިނޭންސް މިނިސްޓަރު އަމީރު ވަނީ ހޯމަ ދުވަހުގެ ރޭ މަޖިލީހުގައި މިކަމާއި ބެހޭ ގޮތުން އޮތް ބަހުސް މަރުހަލާއަށް ވަޑައިގެން މެމްބަރުންނާއި މުހާތަބު ކުރައްވާފައެވެ.
ސަރުކާރުގެ އަމާޒަކީ ގައުމީ އުފެއްދުންތެރިކަން އިތުރުކޮށް އިގްތިސާދީ އިތުރު ހަރަކާތްތަކެއް އުފެދި އެކްސްޕޭންޝަނަކަށް ދިއުން ކަމަށް މިނިސްޓަރު އަމީރު ވިދާޅުވިއެވެ. އަދި އޭގެން ދަރަނި 60 އިންސައްތައިގަ ހިފެހެއްޓުމުގެ ފުރުސަތު ލިބިގެންދާނެ ކަމަށް ވިދާޅުވިއެވެ.
ސައުދީ ފަންޑުން ހިލޭ އެހީގެ ގޮތުގައި 40 މިލިއަން ޑޮލަރު ލިބިފައިވާ ކަމަށާއި އިންޑިއާ ސަރުކާރުން 100 މިލިއަން ރުފިޔަގެ ހިލޭ އެހީ ލިބިފައިވާ ކަމަށާ އަދި އެސްއެމްއީ ބޭންކުގެ ތެރެއިން ކުދި ވިޔަފާރިތަކަށް ލޯނު ދިނުމަށް އެސްބީއައިއިން 25 މިލިއަން ޑޮލަރުގެ ކުރިޑިޓް ފެސިލިޓީއެއް ލިބިފައިވާކަމަށް މިނިސްޓަރު ވިދާޅުވިއެވެ. އެހެންނަމަވެސް އެ ހަރަދު ކުރެވޭނީ މަޖިލީހުން އެކަމުގެ ހުއްދަ ލިބިގެން ކަމަށް މިނިސްޓަރު ވިދާޅުވިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ރިޒާވް ބޭންކް އޮފް އިންޑިއާ (އާރްބީއައި) އާއި ދެމެދު 400 މިލިއަން ޑޮލަރުގެ ކަރަންސީ ސްވަޕް އެގްރީމެންޓަކާ 2011 ވަނަ އަހަރު ހެދުނު ސާކް ފެސިލިޓީއެއްގެ ތެރެއިން މިހާރުވެސް 200 މިލިއަން ޑޮލަރުގެ ކަރަންސީ ސްވެޕް ފެސިލިޓީއަކަށް ޓެޕްއިން ކުރެވޭ ކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ މިހާރުގެ ސަރުކާރުން ދެފުށް ފެންނަ ގޮތަކަށް ޓެންޑަރިން ޕްރޮސެސް ކުރިއަށް ގެންދާތީ ކުރީގަ އަގުބޮޑުކޮށް ކުރެވުނު މަސައްކަތްތައް މިހާރު ވަރަށް އަގު ކުޑަކޮށް ކުރެވޭ ކަމަށެވެ. މިސާލެއްގެ ގޮތުން ވިދާޅުވީ، ފެނާއި ނަރުދަމާގެ މަސައްކަތް ކުރިން 70 މިލިއަން ރުފިޔާއަށް ކުރެވުނު ނަމަވެސް މިހާރު 30 މިލިއަނަށް ކުރެވޭ ކަމަށެވެ.
ބަޖެޓު އިތުރު ކުރަން ޖެހެނީ މައިގަނޑު ތިން ކަމަކަށް ބޭނުންތެރިވާތީ ކަމަށާއި އެކަންކަމަކީ މިއަހަރު ދައުލަތަށް ލިބޭ އާމްދަނީން ކުރަން ބޭނުންވާ ހަރަދުތައް ބަޖެޓުގައި ހިމެނުމަށާއި ރައީސް އިބްރަހިމް މުހައްމަދު ސޯލިހުގެ ސަރުކާރުގެ ވައުދުތައް ފުރިހަމަ ގޮތުގައި ތަންފީޒު ކުރުމަށްޓަކައި ކަމަށާއި މަޖިލީހުން ފާސްކޮށްގެން ހަރަދު ކުރުމުގެ އުސޫލު ހިފެހެއްޓުމަށްޓަކައި ކަމަށެވެ.
ސަޕްލިމަންޓްރީ ބަޖެޓްގެ ބަހުސްގެ މަރުހަލާ އަދިވެސް މަޖިލީހުގައި ކުރިއަށްދާތީ، އެ ބަޖެޓް މަޖިލީހުގެ ތަޅުމުން ފާސްކުރަން ހަމަޖެހިފައި އޮތީ އަންގާރަ ދުވަހުއެވެ.
