އުކުޅަސް ކޮންވެންޝަން ސެންޓަރ ހުޅުވައިފި
26 އޯގަސްޓު 2019 | ހޯމަ 06:35އުކުޅަސް ކޮންވެންޝަން ސެންޓަރ ހުޅުވީ އޮގަސްޓް 26 ގައި
އުކުޅަސް ކޮންވެންޝަން ސެންޓަރ ހުޅުވައިދެއްވީ ފޮރިން މިނިސްޓަރ އަބްދުﷲ ޝާހިދު
އުކުޅަސް ކޮންވެންޝަން ސެންޓަރ ރަސްމީކޮށް ހުޅުވައިފިއެވެ.
އޮގަސްޓް 26 ވަނަ ދުވަހު މި ކޮންވެންޝަން ސެންޓަރ ހުޅުވައިދެއްވީ ހާރިޖީ ވަޒީރު އަބްދުﷲ ޝާހިދު އެވެ.
ކޮންވެންޝަން ސެންޓަރ ހުޅުވާދެއްވުމަށްފަހު، މިނިސްޓަރު ޝާހިދު ވަނީ އުކުޅަސް ޓެކް ފެއަރ 2019 އަދި ސައިންސް ވެރިންގެ ކޮންފަރެންސް، އިންޓަރނޭޝަނަލް ކޮންފަރެންސް އޮން ސޮފްޓްވެއަރ ނޮލެޖް، އިންފޮރމޭޝަން މެނޭޖްމެންޓް އެންޑް އެޕްލިކޭޝަންސް ހުޅުވުމުގެ ރަސްމިއްޔާތުގައި ވެސް ބައިވެރިވެ ވަޑައިގެން ވާހަކަފުޅުދައްކަވާފައިވެއެވެ.
ކޮންވެންޝަން ސެންޓަރު ހުޅުއްވައިދެއްވުމަށް ފަހު މިނިސްޓަރ ޝާހިދު ވިދާޅުވީ މި ކޮންވެންޝަންގެ ސަބަބުން މާލޭގެ އިތުރުން ރާއްޖޭގެ އެކި ކަންކޮޅުތަކުގައި ބޮޑެތި ހަފްލާތައް ބޭއްވުމުގެ ފުރުސަތު ލިބިގެންދާނެ ކަމުގައެވެ. އަދި މި ކޮންވެންޝަން ސެންޓަރަކީ ސަރުކާރުން ވައުދުތައް ފުއްދާނެ ކަމުގެ ހެއްކެއް ކަމުގައެވެ.
މިނިސްޓަރ ވަނީ އުކުޅަސް ކޮންވެންޝަން ސެންޓަރުން ދިވެހިންގެ ހުނަރުވެރިކަށް ހުރިހާ ގޮތަކުން ވެސް ފެނިގެންދާކަށް ފާހަގަކުރައްވާފައެވެ.
އުކުޅަސް ކޮންވެންޝަން ސެންޓަރަކީ އިންޑިއާ ސަރުކާރުގެ ހިލޭ އެހީ އާއި ދައުލަތުގެ ބަޖެޓުން ހަރަދުކޮށް، 25 ދުވަހުގެ ތެރޭގައި އިމާރަތްކޮށްފައިވާ ސެންޓަރެކެވެ. އިންޑިއާ ސަރުކާރުން ވަނީ މި ކޮންވެންޝަން ސެންޓަރ އިމާރަތް ކުރުމަށް 7 މިލިއަން ރުފިޔާ ހަދިޔާ ކޮށްފައެވެ. ކޮންވެންޝަން ސެންޓަރު ހުޅުވުމުގެ ރަސްމިއްޔާތުގައި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރުވެސް ބައިވެރިވެވަޑައިގެންނެވި އެވެ.
އުކުޅަސް ކޮންވެންޝަން ސެންޓަރ އިމާރަތް ކޮށްފައިވަނީ ރާއްޖޭގެ އިމާރަތް ކުރުމުގެ ދާއިރާގައި މަޝްހޫރު ކުންފުނި، އަމީން ކޮންސްޓްރަކްޝަން އިންއެވެ. އަދި މި ސެންޓަރަކީ މާލޭގެ އިތުރުން ރާއްޖޭގެ ރަށެއްގައި އެޅުނު ދެވަނަ ކޮންވެންޝަން ސެންޓަރެވެ. ރާއްޖެތެރޭގައި އެޅުނު ފުރަތަމަ ކޮންވެންޝަން ސެންޓަރ އަޅާފައިވަނީ ސާކް ސަމިޓަށް އައްޑޫ ސިޓީގައެވެ.
