ޕްރައިވެޓައިޒޭޝަން ބޯޑުން ނިޒާރު އިސްތިއުފާ ދެއްވައިފި

ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑް (ޕީސީބީ) ގެ ރައީސް މުހައްމަދު ނިޒާރު އިސްތިއުފާ ދެއްވައިފިއެވެ.

ނިޒާރު އިސްތިއުފާ ދެއްވިކަމަށް ހާމަކުރެއްވީ އޭނާ ކުރެއްވި ޓްވީޓަކުންނެވެ.

ނޫކުލައިގެ ޓައި އެއް ފެންނަ ފޮޓޯއަކާއި އެކު ޓްވީޓު ކުރައްވަމުން ނިޒާރު ވިދާޅުވީ އޭނާ އެޓައި ނެންގެވީ އެމަގާމުގައި ފަސް އަހަރާއި 26 ދުވަހު ހޭދަކުރެއްވުމަށްފަހު ކަމަށެވެ. އަދި ދައުލަތަށް 34 އަހަރު ހިދުމަތް ކުރެވިއްޖެ ކަމަށް އޭނާގެ ޓްވީޓުގައި ފާހަގަ ކުރައްވާފައިވެއެވެ. އެޓްވީޓުގައި ނިޒާރު ވަނީ ދައުލަތަށާއި ޕީސީބީގެ މުއައްޒަފުންނަށް ޝުކުރު އަދާކުރައްވާފައެވެ.

ނިޒާރު މިމަގާމުން އިސްތިއުފާދެއްވާފައިވާއިރު ޕީސީބީގެ މިހާރުގެ ބޯޑް އުވާލަ، އި އަލުން އެ ބޯޑު އެކުލަވާލުމަށް މަޖިލީހުން ފާސްކޮށް، ރައިސޫލްޖުމްހޫރިއްޔާއަށް ވަނީ ލަފާ އަރުވާފަ އެވެ. އެގޮތަށް ލަފާއަރުވައިަފއިވަނީ ދެ ފަހަރެއްގެ މަތިން އެ ބޯޑަށް މެމްބަރުން އައްޔަންކުރިިއިރު މަޖިލީހުގެ ރުހުން ހޯދާފައީ ނުވާތީ އެވެ. އަދި އެ ބޯޑް މަސްއޫލިއްޔަތުތައް އެ ބޯޑުން އަދާކޮށްފައިނުވާތީ އެވެ.

ދައުލަތުގެ ވިޔަފާރީ ކުންފުނިތައް ޕްރައިވެޓައިޒް ކުރުމާއި ކޯޕަރަޓައިޒް ކުރުން އަދި މޮނިޓާކޮށް އިވެލުއޭޓްކުރުމުގެ ގާނޫނުގެ ދަށުން އެކުލަވާލާފައިވާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުގައި 7 މެމްބަރުން ހިމެނޭއިރު، ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމުގެ ކަންކަން ރާވާ ހިންގުމުގެ އިތުރުން، ޕްރައިވެޓައިޒް ކުރުމުގެ ސިޔާސަތުތައް ކަނޑައަޅައި ރައީސްގެ ހުއްދަ އެ ސިޔާސަތުތަކަށް ހޯދުމަކީ އެ ބޯޑުގެ ޒިންމާއެކެވެ.

ޕްރައިވަޓައިޒޭޝަން ބޯޑު މެންބަރުންގެ ދައުރަކީ ހަތަރު އަހަރެވެ.