އެމްޑީޕީ އޮންނާނީ ރައީސް ނަޝީދާއެކުގައި، ރިޔާސީ ކެންޑިޑޭޓަކީވެސް ނަޝީދު: ނިޒާރު

އެމްޑީޕީ އަބަދުވެސް މަސައްކަތްކުރާނީ ރައީސް މުހައްމަދު ނަޝީދުގެ ފަހަތްޕުޅުގައި ކަމަށާއި، އެމްޑީޕީގެ ރިޔާސީ ކެންޑިޑޭޓަކީވެސް އެ މަނިކުފާނު ކަމަށް ވިދާޅުވެ، ހިތަދޫ ދެކުނު ދާއިރާގެ މެމްބަރު އަލީ ނިޒާރު ރައީސް އަބްދުﷲ ޔާމީނަށް ރައްދުދެއްވައިފި އެވެ.

ބުދަ ދުވަހު، ޕީޕީއެމްގެ މެމްބަރުންނާއި ވާހަކަދައްކަވަމުން ރައީސް އަބްދުﷲ ޔާމީން ވިދާޅުވީ، އިދިކޮޅު އެމްޑީޕީން ފެންނަނީ "އެންމެ މީހަކު ވަށައިގެން ތޮވާފްކުރާ ތަން" ކަމަށެވެ. އަދި މިހާރު ގާނޫނުތައް އޮތް ގޮތުން 2018 ގައި ރައީސް ނަޝީދަށް ވާދަ ނުކުރެއްވޭނެ ކަމަށް ރައީސް ޔާމީން ވިދާޅުވި އެވެ.

ލޯކަލް ކައުންސިލް އިންތިހާބަށް ތައްޔާރުވުމަށް އިދިކޮޅު، އެމްޑީޕީން ބޭއްވި ހަރުގެ ޖަލްސާގައި ވާހަކަ، ރައީސް ޔާމީންގެ ވާހަކަފުޅުތަކަށް ރައްދުދެއްވައި ހިތަދޫ ދެކުނު ދާއިރާގެ މެމްބަރު ނިޒާރު ވިދާޅުވީ އެމްޑީޕީގެ ރިޔާސީ ކެންޑިޑޭޓަކީ ކޮންބޭފުޅެއްކަމާމެދު ބައެއް ފަރާތްތަކުން ސުވާލު އުފައްދާކަމަށެވެ. ނަމަވެސް އެކަމުގައި ސުވާލު އުފައްދާނެޖާގައެއް ނެތް ކަމަށާއި، އެމްޑީޕީގެ ރިޔާސީ ކެންޑިޑޭޓަކީ ރައީސް މުހައްމަދު ނަޝީދު ކަމަށް އޭނާ ވިދާޅުވި އެވެ.

"ވަރަށް ރަނގަޅު ވާހަކައެއް އެއީ، މި ޕާޓީ އޮތީ ރައީސް މުހައްމަދު ނަޝީދުގެ ފަހަތުގައި. މިހާރުވެސް، އޭރުވެސް، މާދަންވެސް، އޮންނާނީ އެގޮތުގައި" އެމްޑީޕީން ފެންނަނީ "އެންމެ މީހަކު ވަށައިގެން ތޮވާފްކުރާ ތަން" ކަމަށް ރައީސް އަބްދުﷲ ޔާމީން ބުދަ ދުވަހު ވިދާޅުވި ވިދާޅުވުމަށް އިޝާރަތްކުރައްވާ އަލީ ނިޒާރު ވިދާޅުވި އެވެ.

ނިޒާރު ވިދާޅުވީ، ދިވެހި ރައްޔިތުން އެންމެ ލޯބިވާ ސިޔާސީ ބޭފުޅަކީ ރައީސް ނަޝީދުކަމަށާއި، އެއީ ޝައްކެއް ވެސް އޮތް ކަމެއް ނޫން ކަމަށެވެ. އެކަން އިތުރަށް ހާމަކޮށްދެނީ ރައީސް އަބްދުﷲ ޔާމީން، ރައީސް ނަޝީދަށް ކަންތައްތައް ކުރައްވަމުންގެންދަވާ ގޮތުންނާއި، އެމަނިކުފާނަށް ޖެއްސުންކުރެއްވުމަށް ކުރައްވަމުން ގެންދާ ކަންތައްތަކުގެ ސަބަބުން ކަމަށް ނިޒާރު ވިދާޅުވި އެވެ.

މިހާރު ވެރިކަމުގައި ތިއްބެވި ފަރާތްތަކުން ވެރިކަން ކުރައްވަމުންގެންދަވަނީ، ނިޒާރު ވިދާޅުވި ގޮތުގައި، ޤާނޫނު އަސާސީ އާއި، ޤާނޫނުތަކުގެ އިމުގެ ތެރެއިން ނޫނެވެ. އެއްވެސް މިންވަރަކަށް އިންސާފު ނުލިބޭ ކަމަށާއި، "ރާއްޖޭގެ ކޯޓުތަކުން ކުރަނީ ސަދޫމު ބާގައިގެ ކޯޓުތަކުން ކުރާ ފަދަ ހުކުމްތައް" ކަމަށް އޭނާ ވިދާޅުވި އެވެ. އެގޮތުން މިސާލު ނަންގަވަމުން ނިޒާރު ވިދާޅުވީ ބަޔަކު މަގުމަތީގައި ކުރި ސަމާސާއެއްގެ ސަބަބުން، އުކުޅަހު ރައްޔިތުންތަކެއް ނާއިންސާފުން ޖަލަށްލެވިފައިވާ ކަމަށެވެ. އަދި އެކަމުގައި ދެއްކޭނެ އެއްވެސް ހެއްކެއް ނޯންނާނެ ކަމަށް ނިޒާރު ވިދާޅުވި އެވެ.