މަސްވެރިކަމާއި ބެހޭ ބިލް ބަލައިގަނެ ކޮމިޓީއަށް
20 އޯގަސްޓު 2019 | އަންގާރަ 12:12ބިލް ބަލައިގަންނަން ފެންނަ ކަމަށް 72 މެމްބަރުން ވަނީ ވޯޓް ދެއްވާފައި
މާލޭ ބަނދަރުގައި މަސް ދޯންޏެއް
މަސްވެރިކަމުގެ ބިލް މަޖިލީހަށް ބަލައިގަނެ, ދިރާސާކުރުމަށް އިޤްތިސާދީ ކޮމެޓީއަށް ފޮނުވައިފި އެވެ.
މި ބިލް ބަލައިގަންނަން ފެންނަ ކަމަށް 72 މެމްބަރުން ވަނީ ވޯޓް ދެއްވާފައެވެ. ބިލް އިތުރަށް ދިރާސާ ކުރުމަށް ވަނީ އިގްތިސާދީ ކޮމިޓީއަށް ފޮނުވާފައެވެ. މި ބިލް ސަރުކާރުގެ ފަރާތުން މަޖިލީހަށް ހުށަހަޅުއްވާފައިވަނީ އިހަވަންދޫ ދާއިރާގެ މެމްބަރު މުހައްމަދު ޝިފާއު އެވެ.
މި ބިލަކީ ދިވެހިރާއްޖޭގެ ކަނޑުގެ ސަރަހައްދުގައިވާ މަސްވެރިކަމުގެ ދިރުންތަކާއި އެތަކެތީގެ މާހައުލު މުސްތަގްބަލްގެ ޖީލުތަކަށް ފޯރުކޮށްދިނުމަށްޓަކައި، ދެމެހެއްޓެނިވި ގޮތެއްގައި އެތަކެއްޗާއި އެތަކެތީގެ މާހައުލު ބެލެހެއްޓުމާބެހޭ އުސޫލުތައް ކަނޑައެޅުމުގެ ހުށަހެޅުނު ބިލެކެއެވެ.
މީގެ އިތުރުން މި ބިލްގައި ދިވެހިރާއްޖޭގެ ސަރަހައްދުގައި އެންމެހައި ފަރާތްތަކުން ކުރާ މަސްވެރިކަމާއި، މާކަނޑުގައި ދިވެހިން ކުރާ މަސްވެރިކަމާއި، އަދި ދިވެހި އުޅަނދުފަހަރުގައި މާކަނޑުގައި ކުރާ މަސްވެރިކަން ކޮންޓްރޯލް ކުރުމާއި، ގާނޫނާއި ގަވާއިދާއި ޚިލާފަށް، ބެލެހެއްޓުމެއް އަދި ރިޕޯޓް ކުރުމެއްނެތި ކުރާ މަސްވެރިކަން މަދުކޮށް، އެފަދަ ކަންކަން ހުއްޓުވުމަށްޓަކައި އަޅަންޖެހޭ ފިޔަވަޅުތައް ވަނީ ބަޔާންކޮށްފައެވެ. އަދި އެކުއަރކަލްޗަރގެ ސިނާއަތު ރާވައި ހިންގައި ބެލެހެއްޓުމަށް ފުރިހަމަ ގޮތްތައްވެސް ބިލްގައި ވަނީ ކަނޑައަޅާފައެވެ.
ބިލްގައި ވަނީ ރާއްޖޭގެ ކަނޑުގެ ސަރަހައްދުގައި ކުރުން މަނާ މަސްވެރިކަން ކަނޑައަޅާފައެވެ. ރާއްޖޭގެ ކަނޑުގެ ސަރަހައްދުގައި ކުރުން މަނާ މަސްވެރިކަންގެ ގޮތުގައި ބިލްގައި ކަނޑައަޅާފައިވަނީ ބޮޑު ދަލުގެ މަސްވެރިކަން، އޮޔާދާ ދަލުގެ މަސްވެރިކަން، ދަމާ ދަލުގެ މަސްވެރިކަން، އަމިއްލަ ބޭނުމަށް ކުރާ މަސްވެރިކަމާއި އެންވެރިކަން ފިޔަވައި ދާ ބޭނުންކޮށްގެން މަސްވެރިކަންކަމެވެ. އޭގެއިތުރުން ދޫކުރާ ދަގަނޑު ބޭނުންކޮށްގެން ކުރާ މަސްވެރިކަން، ގޮވާ އެއްޗެއް ނުވަތަ ވިހައެއް ނުވަތަ އެހެންވެސް އެފަދަ ކެމިކަލެއް ބޭނުންކޮށްގެން މަސްވެރިކަން ކުރާ މަސްވެރިކަންވެސް އެއީ މަނާކަމެއްކަމަށް ބިލްގައި ހިމަނާފައިވެއެވެ.
މަސްވެރިކަން މޮނިޓަރކޮށް ކޮންޓްރޯލް ކުރުމަށްޓަކައި، މޮނިޓަރިންގ، ކޮންޓްރޯލް އަދި ސަރވޭލެންސް އާއި ބެހޭ ނިޒާމެއް ސިފައިންގެ ކޯސްޓްގާރޑް އާއި، މޯލްޑިވްސް ޕޮލިސް ސާރވިސް އާއި މޯލްޑިވްސް ޓްރާންސްޕޯޓް އޮތޯރިޓީ އާއި ގުޅިގެން މިނިސްޓްރީން ހަދައި ތަންފީޒް ކުރަންވާނެ ކަމަށް ބިލްގައި ވަނީ ބުނެފައެވެ.
މިނިސްޓްރީން ދޫކުރާ ލައިސަންސް ނެތި ނުވަތަ ލައިސަންސްގައި ބަޔާންކޮށްފައިވާ ޝަރުތުތަކާއި ޚިލާފަށް އެއްވެސް އުޅަނދަކުން މަސްވެރިކަން ކުރުމާއި އެއާއި ގުޅުން ހުރި ހަރަކާތެއް ހިންގުމަކީ މަނާކަމެއް ކަމުގައި ބިލްގައި ވަނީ ކަނޑައަޅާފައެވެ. ބިލްގައިވާ ގޮތުން އެފަދަ ކުށެއް ކޮށްފިނަމަ، އެ ކުށެއް ކުރި އުޅަނދުގެ މާސްޓަރ، ވެރިފަރާތް އަދި އޮޕަރޭޓަރުވެސް ހިމެނޭ ގޮތުން، އެއިން ކޮންމެ ފަރާތެއް ވަކިވަކިން ހަތަރު ލައްކަ ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާކުރުމުގެ އިޚްތިޔާރް މިނިސްޓްރީއަށް ލިބިގެންދެއެވެ.
