ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ތިމާވެއްޓާ ގުޅުން ހުރި މަސައްކަތްތައް ކުރެއްވުމަށް އުފެއްދެވި "މޯލްޑިވްސް ކޮރަލް އިންސްޓިޓިއުޓް"ގެ ޖަމިއްޔާ ރަޖިސްޓްރީ ކޮށްދީފި އެވެ.

މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގައި އެޖަމިއްޔާ ރަޖިސްޓްރީކޮށްދީފައި ވަނީ މިދިޔަ ޖުލައި 25 ވަނަ ދުވަހު އެވެ.

މިޖަމިއްޔާގެ އިދާރާއަކީ ރައީސް ނަޝީދުގެ ގެކޮޅު، ގ. ކެނެރީގެ އެވެ.

ރައީސް ނަޝީދުގެ އިތުރުން މިޖަމިއްޔާގެ އަނެއް މުއައްސިސަކީ ގ. އާނޫރާނީ މަރްޔަމް ރާޙިލް ނަސީމް އެވެ.

މިޖަމިއްޔާއަކީ އަކީ ދުނިޔޭގެ މޫސުމަށް އަންނަ ބަދަލުތަކާ ގުޅިގެން ދެމެހެއްޓެނިވި ގޮތެއްގައި ގައުމު ތަރައްގީ ކުރާނެ ގޮތް ހޯދުމެވެ. އަދި ރަށްތައް ތަރައްގީ ކުރުމުގައި ތިމާވެއްޓަށް އެންމެ ގެއްލުން ކުޑަކޮށް މަސައްކަތް ކުރެވޭނެ ގޮތްތައް ހޯދުމާއި، ފަރުތައް ހިމާޔަތް ކުރުމުގެ މަސައްކަތް ކުރާނެ އެވެ.

މޯލްޑިވްސް ކޮރަލް އިންސްޓިޓިއުޓްގެ ނަމުގައި ޖަމިއްޔާއެއް އުފައްދާފައިވާއިރު، އައްޑޫސިޓީގެ ހިތަދޫ ގައި ތިމާވެއްޓާ ބެހޭ މަސައްކަތް ކުރުމަށް ކޮރަލް އިންސްޓިޓިއުޓްގެ ނަމުގައި ވެސް ވަނީ ޚާއްސަ އޮފީހެއް ހުޅުވާފައެވެ.

ރައީސް ނަޝީދަކީ ތިމާވެއްޓާ ގުޅުން ހުރި ކަންކަމަށް ޚާއްސަ ސަމާލުކަމެއް ދެއްވައިގެން މަސައްކަތް ކުރައްވާ ބޭފުޅެކެވެ.