ފުވައްމުލަކު ރިންގް ރޯޑް ހެދުމުގެ މަޝްރޫއުއަށް ބޭނުންވާ މެޝިނަރީސްތައް އެ ރަށަށް ގެންގޮސްފި
ރިންގް ރޯޑްގެ މަސައްކަތް މިހާރު ކުރިއަށްދޭ
ތާރު އެޅުމަށް ބޭނުންވާ މެޝިނަރީސްތައް ގެންނަނީ
ފުވައްމުލަކު ރިންގް ރޯޑް ހެދުމުގެ މަޝްރޫއުއަށް ބޭނުންވާ މެޝިނަރީސްތައް އެ ރަށަށް ގެންނަމުންދާ ކަމަށް ސިޓީ ކައުންސިލުން ބުނެފިއެވެ.
ފުވައްމުލަކު ސިޓީ ކައުންސިލްގެ ޑެޕިޔުޓީ މޭޔަރު މުހައްމަދު ލިރާރް ވިދާޅުވީ ރިންގް ރޯޑްގެ މަސައްކަތް މިހާރު ފަށާފައިވާ ކަމަށެވެ. އެގޮތުން މިހާރު ކުރިއަށްދަނީ މަގު ލެވަލް ކުރުމުގެ މަސައްކަތް ކަމަށާއި، ތާރުއެޅުމަށްޓަކައި ކުރަންޖެހޭ މަސައްކަތްތައް ބާރު ސްޕީޑްގައި ކުރިއަށް ގެންދާ ކަމަށެވެ.
މަސައްކަތް ކުރިއަށްދާ ވަރަކަށް އެމަސައްކަތަކަށް ބޭނުންވާ ސާމާނާއި، މެޝަނަރީސްތައް ގެންނަމުންދާ ކަމަށް އޭނާ ވިދާޅުވި އެވެ.
ރިންގް ރޯޑްގެ މަސައްކަތް ކުރިއަށްދާ ގޮތާއި މެދު ރައްޔިތުންގެ ފަރާތުން އެއްބާރުލުން ލިބޭކަން ފާހަގަކުރައްވައި ލިރާރް ވިދާޅުވީ މިމަޝްރޫއަކީ ރައްޔިތުންގެ ވަރަށް ބޮޑު ހުވަފެނެއް ކަމަށާއި، އުންމީދަކީ ވީހައިވެސް އަވަހަކަށް މަސައްކަތް ނިމުން ކަމަށެވެ.
ފުވައްމުލަކު ރިންގް ރޯޑް ހެދުމުގެ މަޝްރޫއު އެމްޓީސީސީއާ ހަވާލުކޮށްފައިވަނީ 240 ދުވަހުގެ މުއްދަތުގެ ތެރޭގައި ނިންމާ ގޮތަށްށެވެ.
މިމަޝްރޫއުގެ ދަށުން 24،00 ސްކުއާ މީޓަރުގެ ރިންގް ރޯޑެއް ހެދުމާއެކު ލެޑް ބައްތި ޖެހުމާއި ފެން ހިންދާ ނިޒާމް ގާއިމް ގާއިމް ކުރުމުގެ އިތުރުން މަގުތަކުގައި ސްޕީޑް ބްރޭކަރު ހަރުކުރުމުގެ މަސައްކަތްވެސް ކުރިއަށްދާނެއެވެ.
މިމަޝްރޫއުއަށް 32 މިލިއަނަށް ވުރެ ގިނަ ރުފިޔާ ޚަރަދުވާނެއެވެ.
