ލޯން އެއްބަސްވުމެއްގެ ދަށުން ޕެރިސިޗް ބަޔާންއަށް ބަދަލުވެއްޖެ

ލޯން އެއްބަސްވުމެއްގެ ދަށުން އިންޓަ މިލާނަށް ކުޅެމުން އައި ކްރޮއޭޝިއާގެ ފޯވާޑް އިވާން ޕެރިސިޗް ބަޔާން މިއުނިކަށް ބަދަލުވެއްޖެއެވެ.

އުމުރުން 30 އަހަރުގެ ޕެރިސިޗް ބަޔާންއަށް ލޯން އެއްބަސްވުމެއްގެ ދަށުން ބަދަލުވި ނަމަވެސް، އެއް އަހަރު ފަހުން އެއްބަސްވުން ދާއިމީކުރުމުގެ އިހްތިޔާރު ބަޔާނަށް އޮންނާނެއެވެ.

ބަޔާންއަށް ބަދަލުވުމަށްފަހު ޕެރިސިޗް ބުނީ، އަނބުރާ ޖަރުމަނަށް އާދެވުމުން ވަރަށް އުފާވެފައި ހުރި ކަމަށާއި، ބަޔާންއަކީ ޔޫރަޕްގެ ބޮޑެތި ކްލަބްތަކުގެ ތެރޭގައި ހިމެނޭ ކްލަބެއް ކަމަށެވެ.

އެގޮތުން ޕެރިސިޗް ބުނީ، ޖަރުމަން ލީގާއި، ޖަރުމަން ކަޕްގެ އިތުރުން ބަޔާންއާއެކު ޗެމްޕިއަންސް ލީގު ހޯދަން ޓާގެޓް ކުރާނެ ކަމަށެވެ.

ދުނިޔޭގެ ނަން މަޝްހޫރު ގިނަ ކްލަބްތަކުން ހޯދަން މަސައްކަތް ކުރަމުން އަންނަ ޕެރިސިޗް އިންޓައާއެކު ހަދާފައިވާ އެއްބަސްވުން ހަމަވާނީ 2022 ވަނަ އަހަރެވެ.

ބްރޫޝިއާ ޑޯޓްމަންޑް އާއި ވުލްފްސްބާގަށްވެސް ކުޅެފައިވާ ޕެރިސިޗް އިންޓައަށް ބަދަލުވީ 2015 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް ކުޅުނު 163 މެޗުގައި 40 ލަނޑު ކާމިޔާބުކޮށްފައެވެ.

ޑޯޓްމަންޑާއެކު ބުންޑަސް ލީގާ އަދި ޖަރުމަން ކަޕް ކާމިޔާބުކޮށްފައިވާ ޕެރިސިޗް ވަނީ ވުލްސްބާގާއެކު ޖަރުމަން ކަޕް އަދި ޖަރުމަން ސުޕާ ކަޕް ކާމިޔާބުކޮށްފައެވެ.

ކްރޮއޭޝިއާ ގައުމީ ޓީމާއެކު މިދިޔަ އަހަރު ރަޝިއާގައި ބޭއްވި ވޯލްޑް ކަޕްގެ ދެވަނަ ހޯދާފައިވާ ޕެރިސިޗް ވަނީ ގައުމީ ޓީމަށް ކުޅުނު 82 މެޗުގައި 23 ލަނޑު ކާމިޔާބުކޮށްފައެވެ.