އައިވޮރީ ކޯސްޓުގެ މަޝްހޫރު ލަވަ ކިއުންތެރިޔާ ޑީޖޭ އަރަފާތް މަރުވެއްޖެއެވެ.
އޭނާ މަރުވެފައިވަނީ ސައިކަލުގައި ދަނިކޮށް ކާރެއްގައި ޖެހި އެކްސިޑެންޓް ވެގެންނެވެ. އަދި އެކްސިޑެންޓުގައި އޭނާގެ ބޮލަށް ވަނީ އަނިޔާވެފައެވެ.
އެކްސިޑެންޓުވުމުން، އޭނާ ވަނީ ވެރިރަށް އަބިޖާންގެ ހޮސްޕިޓަލަކަށް ގެންގޮސްފައެވެ. އަރަފާތް މަރުވެފައިވަނީ ހޯމަ ދުވަހުގެ ވަގުތެއްގައެވެ.
އުމުރުން 33 އަހަރުގެ އަރަފާތު މަޝްހޫރު ވެފައިވަނީ "ކޫޕް ޑި ކޭލް" ޑާންސް މިއުޒިކްގެ ރަސްގެފާނުގެ ގޮތުގައެވެ. އަދި އޭނާގެ އެންމެ ފަހުގެ މަޝްހޫރު ލަވަތަކުގެ ތެރެއިން "ޑޯސަބަޑޯ" އަށް ފަސް މިލިއަނަށްވުރެ ގިނަ ޔޫޓިއުބް ވިއުސް ލިބިފައިވެއެވެ.
އޭނާއަކީ ސައިކަލަށް ވަރަށް ލޯބިކުރާ ފަންނާނެއްކަން ފަހަގަ ކޮށްލެވެއެވެ. މޭ މަހުގައި ނެރުނު، އޭނާގެ ފަހުގެ ލަވަ "މޮޓޯ މޮޓޯ" ގައި ވެސް ސައިކަލުތަކެއް ފެނިގެންދެއެވެ.
11 ވަރަކަށް އަލްބަމް ނެރެފައިވާ، އަރަފާތަށް 2016 އަދި 2017 ގެ ކޫޕް ޑި ކޭލް އެވޯޑްސްގެ އެންމެ މޮޅު ފަންނާނު ކަމުގެ އެވޯޑް ވެސް ލިބިފައިވެއެވެ.
އޭނާގެ މަރަށް ފަހު 1000 އެއްހާ ފޭނުން ވަނީ އޭނާ ގެންދެވުނު ހޮސްޕިޓަލުގެ ކައިރިއަށް އެއްވެ އޭނާ އަށް މަރުނުވެވޭނެ ކަމަށް ބުނެ ހިތާމަ ފާޅުކޮށްފައެވެ.
