"އަނދުން ހުސެއިން ފައުންޑޭޝަން" ގެ ފަރާތުން ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރ ހުސެއިން ޝަހީމް، އީދު ހަދިޔާގެ ގޮތުގައި އޭނާ ނިސްބަތްވާ ދާއިރާގެ ފަސް ކުދިންނަށް ސްކޮލޮޝިޕް ހަމަޖައްސައިދީފިއެވެ.
ސައިރިކްސް ކޮލެޖުގައި މި ފަސް ކުދިން ތައުލީމު ހާސިލްކުރުމަށް ހަމަޖެހިފައިވާއިރު، މާސްޓާސް ލެވެލްގައި ކިޔެވުމަށް ދެ ކުދިން، ބެޗްލާސް ޑިގްރީގައި ކިޔެވުމަށް ކުއްޖެއް އަދި ޑިޕްލޮމާ ފެންވަރުގައި ކިޔެވުމަށް ދެ ކުއްޖަކަށް ފުރުސަތު ވަނީ ދީފައެވެ.
މި އުފާވެރި ހަބަރު ދާއިރާގެ ކުދިންނަށް ހާއްސަކުރުމުގެ އިތުރުން އަނދުން ހުސެއިން ވަނީ އީދުގެ ތަހުނިޔާ ދާއިރާގެ ރައްޔިތުންނަށް އަރިސްކޮށްފައެވެ.
ރާއްޖޭގައި މިހާތަނަށް ހެންވޭރު ދެކުނު ދާއިރާއަށް ނިސްބަތްވާ މެމްބަރަކު ތައުލީމީ ދާއިރާއިން ޒުވާނުން ބިނާކޮށް މަތީ ތައުލީމް ހާސިލް ކުރުމަށް ފުރުސަތު ހޯދައިދެއްވުމަށް ހިދުމަތެއްކޮށްފައި ނުވާއިރު، މެމްބަރު އަނދުން ހުސެއިން ވަނީ އަނދުން ހުސެއިން ފައުންޑޭޝަންގެ ނަމުގައި މީގެ ކުރިން ފަސް ކުއްޖަކަށް އިންޑިއާގެ ބެންގަލޫރުގެ ގާރޑަން ސިޓީ ޔުނިވާސިޓީގައި ތައުލީމު ހާސިލްކުރުމުގެ ފުރުސަތުވެސް ހޯދައިދެއްވާފައެވެ.
