ފައިސާ އާއި ގުޅުން ހުރި ބިލްތައް ރައްޔިތުންގެ މަޖިލީހަށް ހުށަހެޅޭނީ ހަމައެކަނި ސަރުކާރުން ކަމަށް ކަނޑައަޅައި މަޖިލީހުގެ ގަވާއިދަށް އިސްލާހު ގެނެސްފިއެވެ.
މަޖިލީހުގައި ގަވާއިދަށް ބަދަލުގެނެސް, ދައުލަތުން ޓެކުހެއް ނަގަންޖެހޭނެ ނުވަތަ ރައްޔިތުންގެ އަތުން އިތުރު ފައިސާއެއް ނަގަންޖެހޭނެ ނުވަތަ ދައުލަތުގެ މާލިއްޔަތުން ސީދާ ގޮތުން އެއްވެސް ފަރާތަކަށް ފައިސާއެއް ދޭންޖެހިދާނެ ކަމެއް ނުވަތަ އުނިއިތުރެއް ގެންނަން ޖެހިދާނެ ކަމެއް ހިމެނޭ އެއްވެސް ބިލެއް (މަނީ ބިލު) ހުށަހެޅޭނީ ސަރުކާރުން ކަމަށް ފާސްކޮށްފައިވަނީ އަންގާރަ ދުވަހު އޮތް މަޖިލިސް ޖަލްސާގައެވެ.
"މަނީ ބިލް" ސަރުކާރުން ހުށަހެޅޭ ގޮތަށް މަޖިލީހުގެ ގަވާއިދަށް ގެނައި ބަދަލަށް 73 މެމްބަރުން ވަނީ ތާއީދު ކުރައްވާފައެވެ.
މަޖިލީހުގެ ގަވާއިދުގައި ކުރިން އޮންނަ ގޮތުން ޓެކްސް އާއި ގުޅުން ހުރި ބިލްތައް ހަމައެކަނި ހުށަހެޅޭނީ ސަރުކާރަށެވެ. ނަމަވެސް ދައުލަތުން ދެމުން އަންނަ އިނާޔަތްތައް ބޮޑު ކުރުން ފަދަ ބިލްތައް މެމްބަރުންނަށް ހުށަހެޅޭނެއެވެ. މަޖިލީހުގެ ގަވާއިދަށް މި ގެނައި ބަދަލުގެ ސަބަބުން ދެން ،ސަރުކާރުން ފިޔަވާ އެއްވެސް މެމްބަރަކަށް ފައިސާ އާއި ގުޅުން ހުރި ބިލެއް މަޖިލީހަށް ހުށަނޭޅޭނެއެވެ.
މަޖިލީހުގެ މި ދައުރުގެ ޖަލްސާތަކަށް ބައެއް މެމްބަރުން ފައިސާ އާއި ގުޅުން ހުރި ބިލްތައް ހުށަހެޅުމުން ސަރުކާރު ކޯލިޝަންގައި ހިމެނޭ މައި ޕާޓީ އެމްޑީޕީގެ ގިނަ މެމްބަރުން ވަނީ އެކަމުގެ ކަންބޮޑުވުން ފާޅުކޮށްފައެވެ. އަދި އެ ބިލްތައް މަޖިލީހަށް ބަލައިނުގަނެ ވަނީ ބޭރުކޮށްލާފައެވެ. ދުނިޔޭގެ ތަހްޒީބް ގައުމުތަކުގައި ވެސް ފައިސާ އާއި ބެހޭ ބިލްތައް މަޖިލީހަށް ހުށަހަޅަނީ ސަރުކާރުންނެވެ.
މީގެ އިތުރުން މަޖިލީހުގެ ގަވާއިދު އެކުލަވާލަމުން އަންނަ ކޮމިޓީން މަޖިލީހުގެ ދައުރުތަކަށް ވެސް ވަނީ ބަދަލުގެނެސްފައެވެ. ގަވާއިދު ކޮމިޓީން ދައުރަށް ގެނައި ބަދަލު، އެގޮތަށް މަޖިލީހުގެ ތަޅުމުން ވަނީ ފާސްކޮށްފައެވެ.
ގަވާއިދު ކޮމިޓީން ބަދަލުގެނެސްފައިވަނީ ދެވަނަ ދައުރާއި ތިންވަނަ ދައުރަށެވެ. ކުރިން އޮންނަ ގޮތުން މަޖިލީހުގެ ދެވަނަ ދައުރު ކުރިއަށް ދާނީ 01 ޖޫން ފެށިގެން 06 އޮގަސްޓްގެ ނިޔަލެވެ. އަދި ތިންވަނަ ދައުރު ހިނގާނީ 27 އޮގަސްޓު އިން ފެށިގެން 30 ނޮވެމްބަރުގެ ނިޔަލަށެވެ.
ގަވާއިދު ކޮމިޓީން ބަދަކޮށް މަޖިލީހުން ފާސްކޮށްފައިވާ ގޮތުން މިހާރު ދެވަނަ ދައުރު ހިނގާނީ 01 ޖޫން އިން ފެށިގެން 31 އޮގަސްޓަށެވެ. އަދި ތިންވަނަ ދައުރު ހިނގާނީ 01 އޮކްޓޫބަރު އިން ފެށިގެން 30 ނޮވެމްބަރުގެ ނިޔަލަށެވެ.
