މެޖިސްޓްރޭޓުންނަށް ފޯނު އެލަވަންސެއް ދިނުމަށް މަޖިލީހަށް ހުށައަޅަނީ

މެޖިސްޓްރޭޓް ކޯޓުތަކުގައި ތިއްބަވާ މެޖިސްޓްރޭޓަރުންނަށް ފޯނު އެލަވަންސެއް ދިނުމަށް ރައްޔިތުންގެ މަޖިލީހަށް ހުށައެޅުމަށް ޖުޑީޝަލް ސަރވިސް ކޮމިޝަން(ޖޭއެސްސީ)އިން ނިންމައިފިއެވެ.

އެކޮމިޝަނުން ބުދަ ދުވަހު ބޭއްވި ބައްދަލުވުމުގައި ވަނީ އެކަމާއި ގޮތުން މަޝްވަރާ ކުރުމަށް ފަހު ފޯނު އެލަވަންސް ދިނުމަށް ރައްޔިތުންގެ މަޖިލީހަށް ހުށައެޅުމަށެވެ.

މެޖިސްޓްރޭޓަރުންނަށް މުސާރައިގެ ގޮތުގައި ލިބެނީ 18،500ރ.އެވެ. ލިވިންގ އެލަވަންސްގެ ގޮތުގައި 4،000ރ އަދި ރިސްކް އެލަވަންސްގެ ގޮތުގައި 600ރ. ލިބެއެވެ. ކޯޓުތަކުގެ އިސް މެޖިސްޓްރޭޓަރުންނަށް މުސާރައިގެ ގޮތުގައި ލިބެނީ 21،000ރ. އެވެ. ލިވިންގ އެލަވަންސްގެ ގޮތުގައި 4،000ރ. އަދި ރިސްކް އެލަވަންސްގެ ގޮތުގައި 600ރ. ލިބެއެވެ. އޭގެ އިތުރުން އެއްވެސް އިނާޔަތެއް މެޖިސްޓްރޭޓަރުންނަށް ނުލިބެއެވެ.

މެޖިސްޓްރޭޓަރުންނަށް ފޯނު އެލަވަންސްގެ ގޮތުގައި ދިނުމަށް ޖޭއެސްސީއިން މަޖިލީހަށް ހުށައަޅަން ނިންމާފައިވަނީ ކިހާ އަދަދެއްކަމެއް ހާމައެއް ނުކުރެއެވެ. ޖޭއެސްސީގެ ބައްދަލުވުމުގައި ރ. މާކުރަތު ކޯޓުގެ އިސް މެޖިސްޓްރޭޓް އަދުނާން ހުސެއިން ސަސްޕެންޑް ކުރަން ވެސް ވަނީ ނިންމާފައެވެ.