ސެޕްޓެމްބަރު މަހު މާފަރު އެއާޕޯޓް ހުޅުވައި މާވަރުލު އެއާޕޯޓް އަންނަ އަހަރު ހުޅުވަނީ

އަބޫދާބީ ފަންޑުން ހިލޭ އެހީގެ 60 މިލިއަން ޑޮލަރުން ނ. މާފަރުގައި އަޅަމުން އަންނަ އިންޓަނޭޝަނަލް އެއާޕޯޓް އަންނަ ސެޕްޓެމްބަރު މަހު ހުޅުވާނެ ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެ އެވެ.

ނަހުލާ ވަނީ ބުދަ ދުވަހު އޮތް މަޖިލީހުގެ ޖަލްސާއަށް ހާޒިރު ކޮށްފައެވެ. މެމްބަރަކު ދެންނެވި ސުވާލަކަށް ޖަވާބު ދެއްވަމުން ނަހުލާ ވިދާޅުވީ މާފަރު އެއާޕޯޓް އަންނަ ސެޕްޓެމްބަރު މަހު ހުޅުވާނެ ކަމަށެވެ.

Advertisement

އަބޫދާބީ ފަންޑުން ހިލޭ އެހީގެ ގޮތުގައި ދީފައިވާ 60 މިލިއަން ޑޮލަރުން ހަދާ މިއެއާޕޯޓްގައި އެންމެ ބޮޑެތި މަތިންދާ ބޯޓްތައް ކަމަށްވާ އެއާބަސް އޭ 320 އާއި، ބޮއިން 737 މަރުކާގެ ބޯޓު ފަހަރު ޖެއްސޭނެ ކަމަށް އޭރު ސަރުކާރުން ބުނެފައި ވެއެވެ.

މާފަރުގައި އިންޓަނޭޝަނަލް އެއާޕޯޓު ހެދުމަށް ޓަފް ކުންފުންޏާ ހަވާލު ކުރީ ޑިސެމްބަރު 24، 2017 ގައެވެ. ނިމިދިޔަ ރިޔާސީ އިންތިޚާބާއި ދިމާކޮށް މިދިޔަ އަހަރުގެ އޮގަސްޓް މަހުގެ 28 ގައި މާފަރު އެއާޕޯޓްގެ މަސައްކަތް އެއްކޮށް ނުނިމެނީސް ކުރީގެ ރައީސް އަބްދުﷲ ޔާމީން ވަނީ ހުޅުއްވައި ދެއްވާފައެވެ. މިދިޔަ އަހަރުގެ އޮގަސްޓް މަހުގެ ނިޔަލަށް އެއާޕޯޓްގެ މަސައްކަތް ނިންމުމަށް ޓަފް ކުންފުންޏާއި ހަވާލު ކުރި ނަމަވެސް މަސައްކަތް ނިންމާފައެއް ނުވެއެވެ. އެމަސައްކަތް ނިންމަން އެއްބަސްވި ތާރީޚުގައި މަސައްކަތް ނުނިންމާ ބީލަން ކާމިޔާބު ކުރުމުގައި އޮޅުވާލުމާއި ސަބް ކޮންޓްރެކްޓަރުން ލައްވައި މަސައްކަތް ކުރުވުމަށްފަހު އެމީހުންނަށް ދޭން ޖެހޭ އެތައް ފައިސާއެއް ނުދީ އޮތްކަން ވަނީ އެނގިފައެވެ. އަދި އެމައްސަލަ އެންޓި ކަރަޕްޝަން ކޮމިޝަން (އޭސީސީ)އިން ވެސް ދަނީ ތަހުގީގު ކުރަމުންނެވެ.

ނަހުލާ ވިދާޅުވީ މާފަރު އެއާޕޯޓުގެ މަސައްކަތް ހުއްޓިފައި އޮތުމަށްފަހު މަސައްކަތްތައް މިހާރު ނިމިފައިވާ ކަމަށެވެ. މިނިސްޓަރުކަމާ ހަވާލުވެ ވަޑައިގަތުމަށްފަހު މާފަރު އެއާޕޯޓާއި ބެހޭ ގޮތުން ވާހަކަ ދެއްކެވުމަށް ނަހުލާ ވަނީ މިދިޔަ ޑިސެމްބަރ މަހުގެ ތެރޭގައި އަބޫދާބީއަށް ވެސް ވަޑައިގަންނަވާފައެވެ.

މީގެ އިތުރުން ނަހުލާ ވިދާޅުވީ ގދ. ގައި ތަރައްގީ ކުރާ، މާވަރުލު އެއާޕޯޓް އަންނަ އަހަރު ކުރީ ކޮޅުގައި ހުޅުވާނެ ކަމަށެވެ.

މާވަރުލު އެއާޕޯޓް ހުޅުވާނީ ކޮން ދުވަހަކުތޯ ގައްދޫ ދާއިރާގެ މެމްބަރު އަހުމަދު ޒާހިރު ކުރެއްވި ސުވާލަކަށް ޖަވާބު ދެއްވަމުން ނަހުލާ ވިދާޅުވީ އަންނަ އަހަރުގެ ކުރިއަށް އެއާޕޯޓް ނިންމުމުގެ ޔަގީންކަން ދެއްވާ ކަމަށެވެ.

މާވަރުލު އެއަރޕޯޓްގެ ރަންވޭ އާއި އޭޕްރަން އަދި ޓެކްސީވޭ އެޅުމުގެ މަސައްކަތް 57 މިލިއަން ރުފިޔާއަށް އެމްޓީސީސީއާ ހަވާލުކޮށްފައި ވަނީ މިދިޔަ އަހަރުގެ މާޗް މަހުގެ ތެރޭގައެވެ.