ރިސޯޓްތަކުގައި ސާރވިސް ޗާޖް 10 ޕަސެންޓް ނަގަން ގާނޫނަށް އިސްލާހު ގެންނަން ފާސްކޮށްފި
ގާނޫނަށް އެފަދަ އިސްލާހެއް ގެނައުމަށް 75 މެމްބަރުން ވަނީ ތާއީދްކުރައްވާފައި
ސާރވިސް ޗާޖް އެއް ހަމައަކުން ނުދޭތީ، އެ ދާއިރާގައި މަސައްކަތް ކުރައްވާ ފަރާތްތަކުން އަންނަނީ ހިތްހަމަނުޖެހުން ފާޅުކުރަމުން
ރިސޯޓް ތަކުގައި ސާރވިސް ޗާޖްގެ ގޮތުގައި އެންމެ މަދުވެގެން ނެގޭނެ މިންވަރަކީ 10 އިންސައްތަ ކަމަށް ކަނޑައަޅައި ,ގާނޫނަށް އެފަދަ އިސްލާހެއް ގެނައުމަށް ރައްޔިތުންގެ މަޖިލީހުން ފާސްކޮށްފިއެވެ.
ރިސޯޓްތަކުގައި އެއް ހަމައަކުން ސާރވިސް ޗާޖް ދެމުން ނާންނާތީވެ ، އެހެނިހެން މައްސަލަތަކުގެ ތެރެއިން އިގްތިސާދީ ކޮމިޓީއަށް އެ މައްސަލަ ހުށަހެޅުއްވީ މާފަންނު މެދު ދާއިރާގެ މެމްބަރު މުހައްމަދު ރަޝީދު( ބޮންޑެ) އެވެ. މި މައްސަލަ ކޮމިޓީއަށް ހުށަހެޅުން ކޮމިޓީން ވަނީ، މި މައްސަލަ ދިރާސާ ކުރުމަށް ކޮމިޓީގެ ސަބް ކޮމިޓީއެއް އެކުލަވާލާފައެވެ. ކޮމިޓީން ވަނީ މީރާ އާއި ކަމާއި ގުޅުން ހުރި ދާއިރާތަކުގެ ބޭފުޅުންނާއި, ބައްދަލުކޮށް މަޝްވަރާ ކޮށްފައެވެ.
މި މައްސަލަ ދިރާސާ ކުރުމަށް ފަހު ކޮމިޓީން ނިންމި ގޮތުގެ ރިޕޯޓް ވަނީ އަންގަރާދުވަހުގެ މަޖިލީހުގެ ޖަލްސާއަށް ހުށަހަޅާފައެވެ. ކޮމިޓީގެ ރިޕޯޓް މަޖިލީހަށް ހުށަހަޅާފައިވަނީ އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ)އެވެ.
ކޮމިޓީގެ ރިޕޯޓް މަޖިލީހުގެ ތަޅުމަށް ހުށަހަޅުއްވަމުން މުހައްމަދު ރަޝީދު ހުސެއިން ވިދާޅުވީ ހުރިހާ ރިސޯޓްތަކުން އެއް ހަމައަކުން އަމަލުކުރުމަށް ބާރުއެޅުމުގެ ގޮތުން ރިސޯޓްތަކުން ސާރވިސް ޗާޖް ނެގުން ލާޒިމް ކުރުމަށް ކޮމިޓީއަށް ފެންނަ ކަމަށް ނިންމާފައިވާ ކަމަށެވެ. އަދި ސާރވިސް ޗާޖްގެ ގޮތުގައި އެންމެ މަދުވެގެން ނެގޭނެ މިންވަރަކީ 10 އިން ސައްތަ ކަމަށް ކަނޑައެޅުމަށް، ގާނޫނަށް އެފަދަ އިސްލާހެއް ގެނައުމަށް ކޮމިޓީން ނިންމި ކަމަށެވެ. މީގެ އިތުރުން ރިސޯޓްތަކުގައި މަސައްކަތްކުރާ މުވައްޒިފުންނަށް ގަވާއިދުން ސާރވިސް ޗާޖް ނުދޭ މައްސަލަ ބަލައި އެ ފަރާތްތަކަށް ސާރވިސް ޗާޖް ދިނުމުގައި ގެންގުޅޭ އުސޫލް ދިރާސާ ކުރުމަށްވެސް ނިންމާފައިވާ ކަމަށެވެ.
ސާރވިސް ޗާޖްގެ ގޮތުގައި އެންމެ މަދުވެގެން ނެގޭނެ މިންވަރަކީ 10 އިން ސައްތަ ކަމަށް ކަނޑައެޅުމަށް، ގާނޫނަށް އެފަދަ އިސްލާހެއް ގެނައުމަށް، ފެންނަ ކަމަށް 75 މެމްބަރުން ވަނީ ތާއީދްކުރައްވާފައެވެ.
ރިސޯޓްތަކުގައި ގަވާއިދުން ސާރވިސް ޗާޖް ދެމުން ނުގެންދާތީވެ، އެ ދާއިރާގައި މަސައްކަތް ކުރައްވާ ގިނަ މުވައްޒަފުން ދަނީ ހިތްހަމަނުޖެހުން ފާޅުކުރަމުންނެވެ.
