ބަންދުގެ އަމުރު ނުނެރުނީ އޭރު އަދީބު ހުކުމް ތަންފީޒު ކުރައްވަމުން ދާތީ: ސުޕްރީމް ކޯޓު

ކުރީގެ ނައިބު ރައީސް އަހުމަދު އަދީބު ބަންދުގައި ބެހެއްޓުމަށް އެދި ދައުލަތުގެ ފަރާތުން ކޯޓުގައި އެދުނުނަމަވެސް އެ އަމުރު ނުނެރުނީ އޭރު އެމަނިކުފާނު ހުކުމް ތަންފީޒު ކުރައްވަމުން ގެންދަވާތީ ކަމަށް ސުޕްރީމް ކޯޓުން ބުނެފިއެވެ.

ސުޕްރީމް ކޯޓުން ބަންދުގެ އަމުރު ނެރެދިން ނަމަ އަދީބަށް ނުފިއްލެވޭނެކަމަށް މީޑިއާތަކަށް ޕްރޮސެކިއުޓަރ ޖެނެރަލް އައިޝަތު ބިޝާމް ވިދާޅުވެފައިވާތީ އެއަށް ރައްދު ދެއްވައި އެކޯޓުން ނެރުނު ބަޔާނެއްގައި ބުނެފައިވަނީ ބަންދުގައި ބެހެއްޓުމުގެ އަމުރަށް ދައުލަތުން އެދުނީ އަދީބު ހުކުމް ތަންފީޒު ކުރައްވަމުން ގެންދަވަނިކޮށް ކަމަށްވާތީ އެއީ ބޭނުންތެރިކަމެއް ކަމެއް ނޫންކަމަށް ފެންނާތީ ކަމަށެވެ.

Advertisement

އެބަޔާނުގައި ބުނެފައިވަނީ ކޯޓު އަމުރެއް ނުނެރުނީ ދައުލަތުން އަދީބުގެ ބަންދުގައި ބެހެއްޓުމުގެ އަމުރަކަށް އެދުނީ އަދީބު ބޭސްފަރުވާއަށް ވަޑައިގެން އުޅުއްވަނިކޮށް ކަމަށާއި އޭރު އެމަނިކުފާނު އެކޯޓަށް ހާޒިރުވެވޭކަށްވެސް ނެތްކަމަށެވެ. އަދި ބަންދާ މެދު ޣައިރު ހާޒިރުގައި ގޮތެއް ކަނޑައެޅުމަކީ ޖިނާއީ އިޖުރާއަތާއި ޚިލާފު ކަމެއް ކަމަށާއި ޖަލު ހުކުމެއް ތަންފީޒު ކުރަމުންދާ މީހަކަށް ބަންދުގެ މުއްދަތު ޖެހުމަކީ ބޭނުންތެރި ކަމަކަށް ނުވާ ކަމަށެވެ.

ނަމަވެސް ދައުލަތުން އެދުނު ދެވަނަ ކަންތައް ކަމަށްވާ އަދީބުގެ ޕާސްޕޯޓް ހިފެހެއްޓުމުގެ އަމުރު އެކޯޓުން ނެރެދިނީ އެމައްސަލައިގައި އެދުނުގޮތަށް އެންމެ ރައްކާތެރި ފިޔަވަޅުކަމަށް އެ ކޯޓަށް ފެންނާތީ ކަމަށް ބަޔާނުގައި ބުނެފައިވެއެވެ.

އަދީބުގެ ޖަލު ހުކުމް ތަންފީޒުކޮށް ނިމުމުން އެކަން އެކޯޓަށް އަންގާފައި ނުވާ ކަމަށާއި އަދި އަދީބު މިނިވަންވެވަޑައިގަތް ފަހުން ދައުލަތުން އެމަނިކުފާނު ބަންދުގައި ބެހެއްޓުމުގެ އަމުރަކަށް އެދިފައި ނުވާ ކަމަށް ވެސް ސުޕްރީމް ކޯޓުގެ ބަޔާނުގައި ބުނެފައިވެއެވެ.

އަދީބު ފިއްލެވީ އޭނާ ބަންދު ކުރުމަށް ސުޕްރީމް ކޯޓުގެ އަމުރަކަށް އެދިފައިވަނިކޮށް ކަމަށް ބިޝާމް ވިދާޅުވުން އެއީ ހަގީގަތާއި ޚިލާފު ވާޙަކައެއް ކަމަށް ވެސް އެބަޔާނުގައި ވެއެވެ.

އަދީބު ޚިޔާނާތްތެރިވި މައްސަލަ ދައުލަތުން ސުޕްރީމް ކޯޓުގައި އިސްތިއުނާފު ކުރި މައްސަލައިގެ އަޑުއެހުމެއް އެކޯޓުގައި އަންގާރަ ދުވަހުގެ ހެނދުނު 10:15 އަށް އެ ކޯޓުގައި ވަނީ ތާވަލް ކޮށްފައެވެ.