ރ. މަޑުއްވަރީ ސިއްހީ މަރުކަޒު ހޮސްޕިޓަލަށް ބަދަލުކުރުމަށް 25 މިލިޔަން ޚަރަދުވާނެ ކަމަށް ހެލްތް މިނިސްޓަރ އަބްދުﷲ އަމީން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ މަޑުއްވަރީ ސިއްހީ މަރުކަޒު ހޮސްޕިޓަލަކަށް ބަދަލުކުރުމާއި ގުޅޭގޮތުން، އެ މަނިކުފާނު މަޖިލީހަށް ހާޒިރުކޮށް، ކުރެވުނު ސުވާލުތަކަށް ޖަވާބު ދެއްވަމުންނެވެ. މަޑުއްވަރީ ސިއްހީ މަރުކަޒާއި ގުޅޭ ގޮތުން، މިނިސްޓަރާއި ސުވާލުކުރައްވަން ހުށަހެޅުއްވީ މަޑުއްވަރީ ދާއިރާގެ މެމްބަރު އާދަމް ޝަރީފްއެވެ.
ރ. މީދޫ ސިއްހީ މަރުކަޒު ހޮސްޕިޓަލަކަށް ބަދަލުކުރުމުގެ މަސައްކަތް ގޮސްފައިވާ މިންވަރަކީ ކޮބައިތޯ އާއި މިކަމަށް މި އަހަރަށް ބޭނުންވާ ފައިސާ ސެކިއުއަރ ކުރެވިފައިވޭތޯ އާއި ހޮސްޕިޓަލަކަށް ބަދަލުކޮށް ޚިދުމަތް ދޭން ފެށޭނީ ކޮން އަހަރަކުތޯ އާއި ގުޅޭ ގޮތުން މަޑުއްވަރީ ދާއިރާގެ މެމްބަރު، ވަނީ މިނިސްޓަރާއި ސުވާލުކުރައްވާފައެވެ.
މިނިސްޓަރ އަމީން ވިދާޅުވީ ސިއްހީ މަރުކަޒު ހޮސްޕިޓަލަކަށް ބަދަލުކުރުމަށް 25 މިލިޔަން ޚަރަދުވާނެ ކަމަށާއި، މަސައްކަތް ފެށި 12 މަސްދުވަސްތެރޭގައި ނިންމާލެވެނޭ ކަމަށެވެ. ސިއްހީ މަރުކަޒު ހޮސްޕިޓަލަކަށް ބަދަލުކުރުމަށް އަޅަންޖެހޭ އިމާރާތް ޑިޒައިންކޮށް ބީ.އޯ.ކިޔު ހެދުމަށް 16 ޖުލައިގައި ވަނީ ބަޔަކާއި ހަވާލުކޮށްފައެވެ.ބީ.އޯ.ކި.ޔު ހަދާދޭނެ ފަރާތެއް ހޯދުމަށް އިއުލާންކޮށްފައިވަނީ 21 މާރޗް ގައެވެ.
ހޮސްޕިޓަލަކަށް ބަދަލުކުރެވޭއިރު އިމާރާތް ކުރެވޭނީ ކިތައް ފަންގިފިލާއަށްތޯ އާއި ގުޅޭ ގޮތުން މަޑުއްވަރީ ދާއިރާގެ މެމްބަރު ކުރެއްވި ސުވާލަށް ޖަވާބުދެއްވަމުން މިނިސްޓަރ ވިދާޅުވީ، އެކަން އިގޭނީ ބީ.އޯ.ކި.ޔު ހަދައި ނިމުމުން ކަމަށެވެ.
ރ. މީދޫ ސިއްހީ މަރުކަޒު ހޮސްޕިޓަލަކަށް ބަދަލުކުރުމަށް އަޅަންޖެހޭ އިމާރާތުގެ މަސައްކަތް ގޮސްފައިވާ ހިސާބާއި ގުޅޭގޮތުން ކުރެވުނު ސުވާލަށް ޖަވާބުދެއްވަމުން މިނިސްޓަރ ވިދާޅުވީ، އިމާރާތުގެ ކުރެހުން އިވެލިއޭޓް ކުަރަމުން އަންނަ ކަމަށެވެ. އެކަމަށް މި އަހަރުގެ ބަޖެޓްގައި 4 މިލިޔަން ރުފިޔާ ހިމަނާފައިވާ ކަމަށާއި، މުޅި ޕްރޮޖެކްޓަށް ޚަރަދުވެގެންދާނެވަރު އިގޭނީ، އިމާރާތުގެ ކުރެހުން އިވެލުއޭޓްކޮށް ނިމުމުން ކަމަށެވެ. ލަފާކުރެވޭ ގޮތުގައި 80 މިލިޔަން ޚަރަދުވެގެންދާނެ ކަމަށާއި، މަސައްކަތް ފެށޭތާ 18 މަސްދުވަސް ތެރޭގައި ނިންމާލެވޭނެ ކަމަށް މިނިސްޓަރ ވަނީ ވިދާޅުވެފައެވެ.
