ހަންބަންޓޯޓާ ޑިސްޓްރިކްޓްގެ މޭޔަރު ފަސް އަހަރަށް ޖަލަށް!

ސްރީލަންކާގެ ވެރިކަން ކުރާ ޔުނައިޓެޑް ނެޝަނަލް ޕާޓީ (ޔޫއެންޕީ) ގެ ގާނުނޫ ހަދާ މަޖިލީހުގެ މެމްބަރުންތަކަކަށް ބިރު ދެއްކި ކަމުގެ ތުހުމަތުގައި ހަންބަންޓޯޓާ ޑިސްޓްރިކްޓްގެ މޭޔަރު އެރާޖް ރަވިންދްރަ ފެނާންޑޯ ފަސް އަހަރަށް ޖަލަށް ލާން އެ ޑިސްޓްރިކްޓުގެ ހައި ކޯޓުން ހުކުރު ދުވަހު ހުކުމް ކޮށްފިއެވެ.

2014 ވަނަ އަހަރުގެ އޭޕްރީލް މަހުގެ 17 ވަނަ ދުވަހު ޔޫއެންޕީ އަށް ނިސްބަތްވާ މެމްބަރުންތަކެއް ހަންބަންޓޯޓާ ބަނދަރަށް ކުރި ޒިޔާރަތުގައި އެ މެމްބަރުންނަށް ބިރު ދެއްކި ކަމުގެ ތުހުމަތުގައި އޭނާއަ ދެކޮޅަށް ފުލުހަށް ވަނީ މައްސަލައެއް ހުށައަޅާފައެވެ.

އެ ޓީމް މައްތަލަ އެއާޕޯޓް އާއި ހަންބަންޓޯޓާ ބަނދަރުގެ އިންސްޕެކްޝަން ޓުއާ އެއްގައި ތިއްބާ ބަނޑިއެއް ބޭނުންކޮށްގެން އެ މެމްބަރުންނަށް ހަމަލާދޭން މޭޔަރު އުޅުއްވި ވީޑިއޯއެއް އާއްމުވިއެވެ. އެރާޖް ވިދާޅުވެފައިވާ ގޮތުން އޭނަ އަތުގައި އޮތީ ކުޅެކުޅޭ ބަޑިއެކެވެ. ބަނދަރު ދޫކޮށްދާން ފެށުމުން އޭނާގެ ސަޕޯޓަރުން ވަނީ އެމީހުން ގަޔަށް ބިސް ޖަހައި ގާއުކާފައެވެ.

އެ މައްސަލާގައި ހުކުމް އިއްވި ހައި ކޯޓުގެ ގާޒީ ޗަމާރަ ޓެންނާކުން ވަނީ، މޭޔަރުގެ އިތުރުން އެކަމުގައި ހިމެނޭ އިތުރު މީހަކު ފަސް އަހަރަށް ޖަލަށް ލާން ހުކުމް ކޮށްފައެވެ. މައްސަލާގައި ތުހުމަތު ކުރެވޭ ތިން މީހަކު ކޯޓުން ދޫކޮށްލާފައިވާ ކަމަށް ރިޕޯޓްތައް ބުނެއެވެ.

ފެނާންޑޯ މޭޔަރު ކަމަށް ހޮވިވަޑައިގެންނެވީ މިދިޔަ އަހަރު ބޭއްވި މުނިސިޕަލް ކައުންސިލް އިންތިހާބުގައި ޔުނައިޓެޑް ޕީޕީލްސް ފްރީޑަމް އެލައިންސް (ޔޫޕީއެފްއޭ) އިން ވާދަކޮށެވެ.