ރައީސްގެ ދެކަނބަލުން ސީޝެލްސްއަށް ވަޑައިގެންފި
ސީޝެލްސް ސަރުކާރުގެ ބައެއް ވަޒީރުންނާއި އިއްޒަތްތެރިން ވަނީ ސީޝެލްސް އިންޓަރނޭޝަނަލް އެއާޕޯޓުން ރައީސްގެ ދެކަނބަލުންނަށް މަރުހަބާ ދަންނަވާފަ
މި ދަތުރުފުޅުގައި ރައީސްގެ ދެ ކަނބަލުން ސީޝެލްސްގެ މަޝްހޫރު ސަރަހައްދުތަކަށް ޒިޔާރަތްކުރައްވާނެއެވެ.
ރައީސުލްޖުމްހޫރިއްޔާ އިބްރާހީމމުހައްމަދު ސޯލިހްއާއި އަނބިކަނބަލުން ފަޒްނާ އަހްމަދު ސީޝެލްސްއަށް ކުރައްވާ ފުރަމާނަ ދަތުރުފުޅެއްގައި އެ ގައުމަށް ވަޑައިގެންފިއެވެ.
ސީޝެލްސް ސަރުކާރުގެ ބައެއް ވަޒީރުންނާއި އިއްޒަތްތެރިން ވަނީ ސީޝެލްސް އިންޓަރނޭޝަނަލް އެއާޕޯޓުން ރައީސްގެ ދެކަނބަލުންނަށް މަރުހަބާ ދަންނަވާފައެވެ. ރައީސްގެ ދެ ކަނބަލުންގެ އަރިހުގައި ސަރުކާރުގެ އިސް ބޭފުޅުންގެ ވަފުދެއްވެސް މިދަތުރުފުޅުގައި ބައިވެރިވެ ވަޑައިގަންނަވައެވެ.
ސީޝެލްސްގެ ރައީސް ޑެނީ ފޯރގެ ދައުވަތަކަށް ރައީސް ސޯލިހް ކުރައްވާ މި ދަތުރުފުޅުގައި ދެގައުމުގެ ދެމެދުގައި ބައެއް އެއްބަސްވުން ތަކުގައި ސޮއިކުރެއްވުމާއި، މަޝްވަރާތައް ބޭއްވެވުމާއި ދެ ގައުމުގެ ރައީސުންގެ ގުޅިފައިވާ ބަޔާނެއް މީޑިޔާއަށް ދެއްވުމަށް ވަނީ ހަމަޖެހިފައިވެއެވެ. މީގެ އިތުރުން ރައީސް ސޯލިހްއާ އަނބިކަނބަލުން ފަޒްނާ އަދި އަރިހުގާ ބައިވެރިވެ ވަޑައިގަންނަވާ ވަފުދުގެ ޝަރަފުގައި ސީޝެލްސްގެ ރައީސް މެންދުރުގެ ރަސްމީ ފަރިއްކޮޅެއްވެސް އެރުވުމަށްވަނީ ހަމަޖެހިފައެވެ.
މި ދަތުރުފުޅުގައި ރައީސްގެ ދެ ކަނބަލުން ސީޝެލްސްގެ އެކި ސަރަހައްދުތަކަށް ޒިޔާރަތްކުރައްވާނެއެވެ.
