އިސްކަންދަރު ފެއަރ ފަށައިފި
މި އަހަރުގެ ފެއަރ ފެށުމުގެ ރަސްމިއްޔާތު ޝަރަފުވެރި ކޮށްދެއްވީ މާލެ ސިޓީ ކައުންސިލްގެ މޭޔަރ ޝިފާ މުހައްމަދު
އިސްކަންދަރު ސްކޫލުގައި ކުރިއަށްދާ ފެއަރގެ ތެރެއިން
ތަފާތު އެތައް ސްޓޯލްތަކަކާއެކު އިސްކަންދަރު ސްކޫލުގެ ފެއަރ ފަށައިގެން ކުރިއަށް އެބަދެއެވެ.
މި ފެއަރ އަކީ ކޮންމެ އަހަރަކު ވެސް އިސްކަންދަރު ސްކޫލުގެ ޓީޗަރުންނާއި ދަރިވަރުންގެ އިތުރުން ބެލެނިވެރިން ގުޅިގެން ބާއްވަމުން އަންނަ ފެއަރއެކެވެ. މި އަހަރުގެ ފެއަރ ފެށުމުގެ ރަސްމިއްޔާތު ޝަރަފުވެރި ކޮށްދެއްވީ މާލެ ސިޓީ ކައުންސިލްގެ މޭޔަރ ޝިފާ މުހައްމަދެވެ.
މި ފެއަރ ކުރިއަށް ދާނީ ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށެވެ. އަދި ފެއަރގައި ބައިވެރިވުމުގެ ފުރުސަތު ލިބޭނީ ހަވީރު 16:00 ން 18:00 އަށް އަދި 20:00 ން 22:30 އަށެވެ.
ފަންޑް ރެއިޒިންގ ޕްރޮގްރާމެއްގެ ގޮތުން ކުރިއަށްދާ މި ފެއަރގައި ހިމެނޭ ސްޓޯލްތަކުގެ ތެރޭގައި ސިފައިންގެ ފަރާތުން ކުރިއަށްގެންދާ "ވޯލް ކްލައިމްބިންގ ސްޓޯލްގެ އިތުރުން އިސްކަންދަރު ސްކޫލުގެ ދަރިވަރުން ކުރިއަށް ގެންދާ "ހެނާ" ސްޓޯލް އާއި ބެލެނިވެރިންގެ އެހީގައި ކުރިއަށް ގެންދާ ތަފާތު ވައްތަރުގެ ކާބޯތަކެތި ވިއްކާ ސްޓޯލްތަކުގެ އިތުރުން "ބިރުވެރި ހޮހޮޅަ" ފާހަގަކޮށްލެވެއެވެ.
އިސްކަންދަރު ސްކޫލުގެ ފަރާތުން ރާއްޖެ އެމްވީއަށް މައުލޫމާތު ދެއްވަމުން ލީޑިންގ ޓީޗަރ އަބްދުﷲ ޝިހާމް ވިދާޅުވީ މި ފެއަރ ބޭއްވުމުގެ މަގުސަދަކީ އިސްކަންދަރު ސްކޫލުގެ ޓީޗަރުންނާއި ބެލެނިވެރިން އެކުގައި މަސައްކަތް ކުރާނެ މާހައުލެއް ގާއިމު ކުރުން ކަމަށެވެ.
މީގެ އިތުރުން ޝިހާމް ވިދާޅުވީ މި ފެއަރ ގައި ރާއްޖޭގެ ބައެއް މިއުޒިކީ ފަންނާނުންވެސް ތަފާތު ހުށަހެޅުންތައް ހުށަހެޅުމަށް ހަމަޖެހިފައިވާ ކަމަށެވެ.
މި ފެއަރ ގައި އިސްކަންދަރު ސްކޫލުގެ އެކި ގްރޭޑްތަކުގެ ދަރިވަރުންގެ ފަރާތުން ވަނީ ވަރަށް ހިތްގައިމު ނެށުންތައް ހުށަހަޅާދީފައެވެ.
