އުމުރުން 130 އަހަރުގެ އިންޑޮނޭޝީޔާ ފިރިހެނަކު ހައްޖުގެ މަތިވެރި އަޅުކަން އަދާކުރުމަށް ސައުދިއަރަބިޔާ އަށް ގޮސްފިއެވެ. މިއީ މިހާތަނަށް ހައްޖުގެ އަޅުކަން އަދާކުރަން ދިޔަ އެންމެ ދުވަސްވި މީހާއެވެ.

އިންޑޮނޭޝިޔާ އިން ސައުދީގެ ކިންގް އަބްދުލް އަޒީޒް އިންޓަނޭޝަނަލް އެއާޕޯޓަށް އައިދްރޯސް ސަމްރީ ގޮސްފައިވަނީ އާއިލާގެ ހަ މެމްބަރުންނާ އެކުއެވެ. އެއާޕޯޓަށް ސަމްރީ ފޭބުމުން ހޫނު މަރުހަބާއެއް ވަނީ ކިޔާފައެވެ.

ސައުދީގެ ނޫހަކަށް ދިން އިންޓަވިއުއެއްގައި ސަމްރީގެ އާއިލާއިން ވަނީ، ރަސްގެފާނު ސަލްމާން ބިން އަބްދުލް އަޒީޒް އާއި ޕްރިންސް މުހައްމަދު ބިން ސަލްމާން (އެމްބީއެސް) ހައްޖާޖީންނާ މެދު ބަހައްޓަވާ ގާތްކަމަށާއި، މެހެމާންދަރީ އަށް ޝުކުރު އަދާކޮށްފައެެވެ. ފްލައިޓް ސައުދީ ގައި ޖެއްސި ހިސާބުން ފެށިގެން، ސަރުކާރުގެ އޮފިޝަލުން ދެމުންދާ ހިދުމަތަށްވެސް އެއާއިލާއިން ވަނީ ޝުކުރު އަދާކޮށްފައެވެ.

މި އަހަރުގެ ހައްޖުގެ މަތިވެރި އަޅުކަން އަދާކުރުމަށް ހުކުރު ދުވަހާ ހަމަޔަށް 926،726 (ނުވަލައްކަ ސައްބިސް ހާސް ހަތް ސަތޭކަ ސައްބީސް) ހައްޖާޖީން ސައުދީއަރަބިއްޔާ އަށް ގޮސްފައިވާ ކަމަށް ސައުދީގެ ޑައިރެކްޓަރ ޖެނެރަލް އޮފް ޕާސްޕޯޓް އޮފީހުން ބުނެފައެވެ.

އޭގެ ތެރެއިން 881،229 ( އަށް ލައްކަ އަށްޑިހަ އެއްހާސް ދުއިސައްތަ ނަވާވީސް) ހައްޖާޖިން އެތެރެވެފައިވަނީ ޖިއްދާގެ ކިންގް އަބްދުލްއަޒީޒް އިންޓަނޭޝަނަލް އެއާޕޯޓު އާއި މަދީނާގެ ޕްރިންސް މުހައްމަދު ބިން އަބްދުލްއަޒީޒް އިންޓަނޭޝަނަލް އެއާޕޯޓުންނެވެ.

އެއްގަމާއި ކަނޑުގެ މަގުންވެސް ވެސް ބައެއް ހައްޖާޖިން ވަނީ އެތެރެވެފައެވެ. ޕާސްޕޯޓު އޮފީހުން އަންދާޒާ ކޮށްފައިވާ ގޮތުން ސައުދީ ބޯޑަރު ހުރަސްކޮށް 35،148( ތިރީސްފަސްހާސް ސަތޭކަ ސާޅީސްއަށް) ހާއްޖާޖީން އެތެރެވިއެވެ. އަދި ކަނޑުމަގުން 10،349 ( ދިހަހާސް ތިންސަތޭކަ ތިންސަތޭކަ ސާޅިސްނުވަ) ހައްޖާޖިން އެތެރެވެފައިވެއެވެ.