ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބ. އޭދަފުށީ ކައުންސިލާ ބައްދަލުކުރައްވައިފިއެވެ.
މިބައްދަލުކުރެއްވުމުގައި ރަށުގެ ތަރައްގީއަށް ބޭނުންވާ ކަންކަމާ އަދި ރަށުގެ ރައްޔިތުންގެ ހުރި ކަންބޮޑުވުންތައް ކައުންސިލުގެ ފަރާތުން ރައީސުލްޖުމްހޫރިއްޔާއާ ހިއްސާކުރެވިއެވެ.
ރާއްޖެއެމްވީއަށް މައުލޫމާތުދެއްވަމުން އޭދަފުށީގެ ކައުންސިލްގެ ރައީސް ތޮލާލް އަބްދުއްރަހްމާން ވިދާޅުވީ ކައުންސިލް ހިއްސާކުރި ކޮންމެ ކަމަކަށް ވެސް ރައީސް އުއްމީދީ ޖަވާބެއް ދެއްވާފައިވާ ކަމަށާއި، އުންމީދުކުރަނީ މައްސަލަތަކަށް ދާދި އަވަހަށް ހައްލެއް ލިބޭނެ ކަމަށެވެ. އެގޮތުން އެރަށުގައި ގޯތި ދުނުކުރާތާ 28 އަހަރުވެފައިވާކަން ފާހަގަކުރައްވައި ތޮލާލް ވިދާޅުވީ ބޯހިޔާވަހިކަމުގެ ދަތިންކަން ބޮޑުވެފައިވާ ކަމަށާއި، މިމައްސަލައަށް ވެސް އަވަސް ހައްލެއް ހޯއްދަވައިދެއްވުމަށް އެދިފައިވާ ކަމަށެވެ.
މީގެ އިތުރުން މިހާރު އެރަށުގެ ބަނދަރުގައި ޖާގަނެތުމުން އައު ބަނދަރެއް އަޅައި ދިނުމަށާއި، ކަރަންޓުގެ ކަނޑޭ މައްސަލައަށް ދާއިމީ ހައްލެއް ހޯއްދައިދެއްވުމަށް އެދިފައިވާ ކަމަށެވެ. އަދި ގަބުރުރަސްތާން ފުރޭތީ ވެލި އަޅާގެން އެމަސައްކަތް ކުރެވޭނެ ގޮތާއި، ކުނީގެ މައްސަލަތަކަށް ހައްލެއް ހޯއްދަވައިދެއްވުމަށް އެދޭ ކަމަށެވެ.
ތޮލާލް ވިދާޅުވީ މަގު ހެދުމުގެ މަސައްކަތުގެ ސްޕީޑް ލަސްވާތީ އެކަން ވެސް ބަލައިދިނުމަށް އެދިފައިވާ ކަމަށާއި، ހޮސްޕިޓަލްގެ އައު އިމާރާތް އެޅުމާ ބެހޭ ގޮތުން ވެސް މަޝްވަރާ ކުރެވިފައިވާ ކަމަށެވެ.
ތޮލާލް ވިދާޅުވީ ކައުންސިލް އެދުނު ހުރިހާ ކަމަކަށް އެކަމެއް ކޮށްދެއްވާނެ ކަމަށް ވިދާޅުވި ކަމަށާއި، ކަމާ ބެހޭ މިނިސްޓްރީތަކާއެކު ގުޅިގެން މަސައްކަތް ކުރުމަށް އެދިފައިވާ ކަމަށެވެ. އަދި ހުރިހާ ކަމަކަށް އެއްބާރުލުން ދެއްވާނެކަމުގެ ޔަގީންކަން ރައީސް ދެއްވި ކަމަށް ތޮލާލް ވިދާޅުވިއެވެ.
ރައީސް ސޯލިހު ބ.އަތޮޅުގެ ބައެއް ރަށްތަކަށް ކުރައްވާ މިދަތުރުފުޅުގައި ފެހެންދޫ އަދި ފުޅަދޫއަށް ވަޑައިގެންނެވިއެވެ. އަދި އެދެރަށުގެ ކައުންސިލްއާ މުއައްސަސާތަކުގެ ވެރިންނާ ބައްދަލުކުރައްވާ ރަށުގެ ހާލަތު ވަނީ ބައްލަވާލައްވާފައެވެ.
